Nkandziyiso Wa Vanhu Hinkwavo—Xana U Wu Tirhisa Hi Ndlela Leyi Faneleke?
1 “Ndzi swi yimele hi mahlo-ngati ku ya wu fambisa ensin’wini!” Marito lawa ma vuriwe hi makwerhu un’wana wa xisati endzhaku ka loko a hlaye Xihondzo xo Rindza xa January 1, 2008. Kumbexana, na wena u hlaye swin’wana swa swihloko leswi humaka nkarhi na nkarhi enkandziyisweni wa vanhu hinkwavo, naswona u kume tindlela letinene to swi tirhisa ensin’wini.
2 “Leswi Hi Nga Swi Dyondzaka Eka Yesu”: Swi nga ha endleka leswaku xihloko lexi u xi vona xi pfuna ku sungula tidyondzo ta Bibele. Loko u nga si tshama u xi tirhisa, ringeta ku xi hlayela n’wini wa muti kutani u n’wi komba leswi Yesu a swi vulaka hi mhaka yo karhi hilaha yi hlamuseriweke ha kona eka ndzimana yo sungula. Eka riendzo ro sungula, loko a kombisa ku tsakela tiyimisele ku yisa bulo ra n’wina emahlweni hi ku tirhisa swihlokwana leswi swi nga swivutiso leswi tlhontlhaka mianakanyo. N’wi kombele leswaku a hlamula swivutiso sweswo. Hlamusela swifaniso leswi vulavulaka hi mhaka yoleyo hi ku komisa kutani mi hundzela eka ndzimana leyi landzelaka. Mi nga ha tlhela mi bula hi hafu ya xihloko xexo kutani mi xi hetisa eka riendzo ro vuyela. Loko se mi sungula dyondzo ya Bibele tirhisa buku leyi nge Leswi Bibele Yi Swi Dyondzisaka.
3 “Tindlela To Kuma Ntsako eNdyangwini”: Nxaxamelo wa swihloko leswi lowu humaka endzhaku ka tin’hweti tinharhu, wu endleriwe ku pfuna vavanuna, vavasati ni vatswari leswaku va vona ndlela leyi va nga yi tirhisaka ha yona misinya ya milawu ya Bibele loko va tlhantlha swiphiqo leswi xungetaka ku rhula ka ndyangu. Swihloko sweswo u nga tlhela u swi tirhisa ku pfuna lava nga riki Timbhoni leswaku va vona vutlhari lebyi humaka eBibeleni.—2 Tim. 3:16, 17.
4 Swihloko Swa Vantshwa: Nxaxamelo wa swihloko leswi nge “Ta Vantshwa Va Hina” swi nyika muhlayi nkarhi wo anakanyisisa hi rungula ra Bibele. U nga tirhisa swihloko sweswo leswaku u pfuna vantshwa lava u hlanganaka na vona ensin’wini leswaku va vona nkoka wa ku dyondza Rito ra Xikwembu. (Ps. 119:9, 105) Loko u vulavula ni vatswari u nga ha tirhisa nxaxamelo wa swihloko leswi nge “Dyondzisa Vana Va Wena,” leswi humaka endzhaku ka n’hweti yin’we. Swihloko sweswo swi ta pfuna vana leswaku va dyondza timhaka ta nkoka eka vanhu lava ku vulavuriwaka ha vona eBibeleni. Xana u tivekele pakani yo hlaya swihloko leswi ni vana va wena?
5 Swihloko Swin’wana: N’hweti yin’wana ni yin’wana ku ni xihloko lexi nge “Vahlayi Va Hina Va Vutisa,” lexi hlamulaka swivutiso leswi vanhu lava nga riki Timbhoni va talaka ku swi vutisa. U nga ha tirhisa swihloko sweswo loko u fambisa timagazini hi yindlu ni yindlu. Xihloko lexi nge “Papila leri humaka . . . ” xi swi veka erivaleni swiyimo leswi varhumiwa va langutanaka na swona loko va ri ensin’wini. Swihloko sweswo swi ta pfuna vanhu lava tsakelaka leswaku va swi vona leswaku mahungu lamanene ma chumayeriwa emisaveni hinkwayo tanihi xikombiso xa leswaku Kreste se wa fuma.—Mat. 24:3, 14.
6 Xihloko lexi nge “Tshinela Eka Xikwembu” lexi humelelaka n’hweti yin’wana ni yin’wana lexi sekeriweke eka ku hlaya ka Bibele loku vaka kona eka Xikolo xa Vutirheli bya le Tilweni, xi nga ha susumeta vanhu va timbilu letinene leswaku va navela ku dyondza swo tala hi Yehovha. Nxaxamelo wa swihloko leswi nge, “Tekelela Ripfumelo Ra Vona,” leswi humelelaka ka mune hi lembe, swi endleriwe ku pfuna vahlayi va manguva lawa leswaku va va vona hi mahlo ya mianakanyo vanhu lava ku vulavuriwaka ha vona eBibeleni, va vona swiboho leswi va swi endleke, swiphiqo leswi va langutaneke na swona ni ripfumelo ra vona.
7 Ha tsaka swinene leswi n’hweti yin’wana ni yin’wana hi kumaka nkandziyiso wa Xihondzo xo Rindza lowu endleriweke ku fambisiwa ensin’wini! A hi tikarhateleni ku tolovelana ni leswi wu vulavulaka ha swona leswaku hi ta wu tirhisa hi ndlela leyi faneleke.