Xihloko Lexintshwa Lexi Nga Ta Tirhisiwa Ku Sungula Tidyondzo Ta Bibele
1. Hi xihi xihloko lexintshwa lexi nga ta huma enkandziyisweni wa vanhu hinkwavo wa Xihondzo xo Rindza naswona hi xihi xikongomelo xa xona?
1 Ku sukela n’hweti leyi taka, ku ta huma xihloko lexintshwa enkandziyisweni wa vanhu hinkwavo wa Xihondzo xo Rindza lexi nga ta hi pfuna ku sungula tidyondzo ta Bibele. Xi ni nhloko-mhaka leyi nge “Dyondza Eka Rito Ra Xikwembu.” Vanhu van’wana ensin’wini va nga ha tsakela ku hlaya swihloko hinkwaswo swa nkandziyiso lowu, kambe xihloko lexi xi endleriwe leswaku hi xi tirhisa loko hi bula ni n’wini wa muti.
2. I yini leswi nga exihlokweni lexi?
2 Leswi Nga eXihlokweni Lexi: Nhloko-mhaka ni swihlokwana swi tsariwe tanihi swivutiso leswi nga ta vutisiwa n’wini wa muti hi nkarhi wa bulo. Matsalwa ma lo kombisiwa kunene a ma tshahiwanga, ku endlela leswaku n’wini wa muti a tiphina hi ku hlaya Bibele hi ku kongoma. Tindzimana ta kona ti komile lerova mi nga ti kambisisa mi ri enyangweni. Xihloko ha xin’we xi ku yisa ebukwini leyi nge Leswi Bibele Yi Swi Dyondzisaka, ku endlela leswaku mi yisa dyondzo yoleyo emahlweni hi buku leyi loko swi fanerile.
3. Loko hi chumayela hi yindlu ni yindlu, hi nga xi tirhisa njhani xihloko lexi ku sungula dyondzo ya Bibele eka riendzo ro sungula?
3 Ndlela Leyi U Nga Xi Tirhisaka Ha Yona: Loko u fambisa timagazini u nga ha vutisa n’wini wa muti xivutiso lexi tlhontlhaka mianakanyo lexi nga exihlokweni xexo. Hi xikombiso, xihloko lexi nga endzeni ka nkandziyiso wa January 1 xi hlamusela nkoka wa Bibele. U nga ha vutisa n’wini wa muti u ku: “Xana u teka Bibele tanihi Rito ra Xikwembu kumbe tanihi buku ntsena? [Yimela nhlamulo.] Ku ni mhaka yo tsakisa leyi ndzi lavaka ku ku byela yona malunghana ni Bibele.” N’wi kombe xivutiso xo sungula, kutani u hlaya ndzimana ya kona ni tsalwa leri kombisiweke. Tlhela u hlaya xivutiso kutani u kombela n’wini wa muti leswaku a ku nyika nhlamulo. Kambisisani swivutiso leswi hi ku ya hi nkarhi lowu n’wini wa muti a nga na wona. Loko u nga si famba, n’wi vutise xivutiso lexi landzelaka kutani u endla malunghiselelo yo tlhela u vuya mi ta bula ha xona. Endla matshalatshala ya leswaku vhiki na vhiki u tlhelela eka yena leswaku mi bula hi swivutiso leswin’wana loko u nga si n’wi tisela nkandziyiso lowu landzelaka. Ndlela yin’wana leyi u nga xi tirhisaka ha yona i ku kombela ku fambisela n’wini wa muti dyondzo ya Bibele. Kutani tirhisa xihloko xexo leswaku u n’wi komba ndlela leyi yi fambisiwaka ha yona.
4. Hi nga swi tirhisa njhani swihloko leswi loko hi endla maendzo yo vuyela?
4 Swihloko leswi u nga ha tlhela u swi tirhisa eka vanhu lava u va nyikaka timagazini n’hweti na n’hweti ni loko u endla maendzo yo vuyela. U nga ha ku: “Ku ni xihloko lexintshwa eka Xihondzo xo Rindza. I nge ndzi ku komba ndlela leyi u nga xi hlayaka ha yona.” Onge swihloko leswi leswintshwa swi nga pfuna vanhu vo tala leswaku va “fikelela vutivi lebyi kongomeke bya ntiyiso.”—1 Tim. 2:4.