Ntlhandlamano Lowu Nga Ta Hi Pfuna eNsin’wini

1. Hi swihi swikongomelo swimbirhi swa ntlhandlamano lowu nge, “Bulo Ni Muakelani”?

¹ Nkarhi na nkarhi, nkandziyiso wa vanhu hinkwavo wa Xihondzo xo Rindza wu ni ntlhandlamano lowu nge, “Bulo Ni Muakelani.” Ntlhandlamano lowu wu ni swikongomelo swimbirhi, ku nga ku hlamusela tidyondzo ta Bibele hi ndlela leyi tsakisaka ni ku hi komba ndlela leyi hi nga burisanaka ni vanhu hi mhaka yo karhi hi vutlhari. (1 Pet. 3:15) Hi nga swi tirhisa njhani swihloko leswi hi ndlela leyinene?

2. Hi nga wu tirhisa njhani ntlhandlamano wa swihloko leswi ensin’wini?

² Swi Tirhise eNsin’wini: U nga ha hlayisa tikopi ta nkandziyiso wa Xihondzo xo Rindza leti nga ni ntlhandlamano lowu katsaka ni xihloko lexi. Loko n’wini wa muti, munhu loyi a tsakelaka kumbe xichudeni xa Bibele xi vutisa xivutiso kumbe xi vulavula hi mhaka leyi ku vulavuriweke ha yona eka swihloko leswi, n’wi nyike kopi ya kona kutani u kombela ku bula na yena ha xona. Loko u nga ri na yona kopi ya magazini lowu nga ni xihloko xexo, kumbexana u nga ha yi kopa eka jw.org/ts.

3. Hi nga bula njhani hi xin’wana xa swihloko leswi ni n’wini wa muti?

³ U nga bula njhani ni munhu hi xin’wana xa swihloko leswi? Van’wana va kombela munhu leswaku a hlayela ehenhla marito ya muakelani, loko vona va hlaya marito ya Mbhoni. Ku bula hi rungula leri swi va ni vuyelo lebyinene hikuva swi endla leswaku munhu a kambisisa leswi hi swi pfumelaka hi ndlela leyi n’wi endlaka a ntshunxeka.—Det. 32:2.

4. Hi nga tidyondzisa njhani hi ku tirhisa ntlhandlamano wa swihloko leswi?

⁴ Tidyondzise U Tlhela U Dyondzisa Van’wana: Loko u ri karhi u hlaya swihloko leswi, kambisisa matsalwa, swikombiso ni ndlela yo bula ni van’wana. Xiya ndlela leyi rungula ri tlhuvutsiweke ha yona. Kutani ringeta ku endla swingheniso hi ndlela yoleyo ensin’wini ya n’wina. (Swiv. 1:5; 9:9) Makwerhu un’wana wa xisati u te, “Ku hlaya swihloko leswi swi fana ni ku dyondza eka phayona leri u tirhaka na rona leri nga ni ‘vutshila’—leri minkarhi hinkwayo ri tivaka swilo leswinene leswi ri nga ta swi vula!”

5. Hi nga swi pfuna njhani swichudeni swa hina swa Bibele leswaku swi lunghiselela ku ya ensin’wini?

⁵ U nga tlhela u tirhisa swikombiso leswi tsariweke leswaku u pfuna swichudeni swa wena swa Bibele leswaku swi lunghiselela ha swona loko swi ya ensin’wini. Hlayani rungula swin’we, endla leswaku xichudeni xi hlaya marito ya muhuweleri. Hi ndlela yoleyo, swichudeni swa Bibele swi nga titoloveta ku vulavula hi leswi swi swi tshembeka hi ndlela ya vutlhari. (Kol. 4:6) I ntiyiso, swihloko leswi ko va yin’wana ya tindlela to tala leti Yehovha a hi pfunaka ha tona leswaku hi byi ‘hetisisa hi xitalo’ vutirheli bya hina.—2 Tim. 4:5.