Vutomi Ni Vutirheli Bya Yesu

XIHLOKO lexi nge “Yesu U Hetisisa Hinkwaswo Leswi Xikwembu Xi N’wi Kombelaka Swona,” lexi nga eka matluka lama landzelaka, i xiphemu xo hetelela xa nongonoko wa hina wa “Vutomi Ni Vutirheli Bya Yesu.” Nhloko-mhaka leyi yi humelele eka Xihondzo xo Rindza ku tlula malembe ya ntsevu, eka minkandziyiso ya 149 leyi landzelelanaka, ku sukela hi April 1, 1985.

Hi ni ntshembo wa leswaku nongonoko lowu eka Xihondzo xo Rindza wu ku pfunile leswaku u landzela xitsundzuxo xa Pawulo xo ‘languta eka Yesu’ ni ku yingisa xileriso xa Xikwembu xo ‘n’wi yingisa.’ (Vaheveru 12:2, 3; Matewu 17:5) Eka malembe lama hundzeke, vo tala va tsarile va vula leswaku va pfunekile ku endla leswi. Muhlayi un’wana u tsarile: “A swi ri tanihi hi loko ndzi n’wi yingisile ni ku vona leswi a swi endlaka. Swi fike laha ndzi n’wi rhandzaka swinene hikwalaho ka swihloko leswi.”

Muhlayi un’wana u te: “Nkandziyiso wun’wana ni wun’wana a wu vonaka wu ri na yinhla leyi a ndzi yi hupile loko ndzi hlaya timhaka ta Bibele. Ndzi tsakele ku tsundzuka swiendlakalo swo hambana-hambana swa vutomi bya Yesu hi ku landzelelana ka swona hi ku hlaya nkandziyiso wun’wana ni wun’wana.” Vo tala va phofule ku tlangela loku fanaka, hi ku dyondza nkarhi ni ndhawu, laha Yesu a a dyondzisa ni ku endla swilo kona hi nkarhi wa vutirheli bya yena.

Wansati wa le Spain u te: “Ndzi hlayise swihloko hinkwaswo ku sukela eku sunguleni. Swa dyondzisa eka lavakulu ni vana. Ndzi na malembe ya 44 naswona ndza nyanyuleka loko ndzi hlaya timhaka leti. Swi endla onge a ndzi ri kona eka xiendlakalo xin’wana ni xin’wana xa matimu.”

Manana wa le United States u tsarile: “Hikwalaho ka ku koma ka swihloko ni swiga swa swona swo olova, nuna wa mina u hi joyinile eka dyondzo ya ndyangu. N’wana wa mina wa mufana wa malembe ya nhungu hi vukhale u ndzi kombele ku tsala ndzi mi nkhensa leswi tata wa yena sweswi a dyondzaka Bibele. U kombela leswaku loko nongonoko lowu wu herile, swihloko swi humesiwa swi ri buku leswaku a ta avelana ni vanghana va yena va xikolo.”

Kumbexana u hlanganyela eka marito ya muhlayi loyi sweswinyana a vileleke a ku: “Swi ndzi twisa ku vava ku ehleketa leswaku nongonoko wu ta hela leswi ku kambisisiwaka masiku ya makumu ya vutomi bya Kriste. Hakunene ndzi ta kayela xivandla xa yona eka Xihondzo xo Rindza.” Hi ni ntshembo wa leswaku u ta tsakela xiphemu lexi xo hetelela xa nongonoko wa hina wa, “Vutomi Ni Vutirheli Bya Yesu.”