Ntirho Wo Chumayela Wu Lava Leswaku Hi Tiyisela
1 Muapostola Pawulo u hete malembe yo tlula 30 a ri muchumayeri wa mahungu lamanene naswona sweswo swi n’wi nyike ntsako ni ku eneriseka. Hambileswi Pawulo a veke ni swiphiqo, u tikarhatile entirhweni wakwe. (2 Kor. 11:23-29) A nga wu tshikanga. (2 Kor. 4:1) A a swi tiva leswaku Yehovha u ta n’wi nyika matimba leswaku a tiyisela entirhweni wo chumayela. (Filp. 4:13) Leswi a tiyiseleke hi ku tshembeka, swa fanela leswi a nga vula a ku: “Mi va vatekeleri va mina, tanihi leswi mina ndzi nga mutekeleri wa Kreste.”—1 Kor. 11:1.
2 Ku Tiyiselela Miringo Namuntlha: Siku ni siku vamakwerhu vo tala va hlekuriwa, va kanetiwa hi swirho swa mindyangu ya vona, hi vatirhi-kulobye kumbe hi vadyondzi-kulobye. (Mat. 10:35; Yoh. 15:20) Kumbexana na wena u langutane ni xiyimo lexi fanaka. Hi hala tlhelo, swi nga ha endleka u karhatiwa hi rihanyo, kumbexana siku ni siku u lwisana ni swilo leswi lavaka ku ku hambukisa kumbe miringo leyi ringaka ripfumelo ra wena ni ku tiyisela ka wena. Hi nga kuma matimba loko hi kambisisa swikombiso swa malandza ya khale lama nga tshama ma tshembekile ni swa Vakreste-kulorhi va namuntlha lava langutanaka ni swiphiqo swo karhi kutani va swi hlula.—1 Pet. 5:9.
3 Hi nga kuma matimba loko hi tshama hi ri karhi hi chumayela, hi tiyiseka leswaku hi ‘ambala mahavelo hinkwawo lama humaka eka Xikwembu.’ (Efe. 6:10-13, 15) I swa nkoka ku khongelela leswaku Xikwembu xi hi pfuna hi tiyisela. Xikwembu xi hi nyika moya wa xona lowo kwetsima leswaku hi kota ku tiyisela miringo. (2 Kor. 6:4-7) Leswaku hi hlula enyimpini yo lwisana na Sathana ni misava yakwe, hi fanele hi yingisa switsundzuxo swa Xikwembu swa leswaku hi tshama hi tiyile eripfumelweni. (Ps. 119:24, 85-88) Tanihi leswi n’wana a nga ha ri hlayaka hi ku phindha-phindha papila leri tata wakwe la n’wi rhandzaka a n’wi tsaleleke rona, na hina loko hi hlaya Bibele siku ni siku hi ta tiyisa vuxaka bya hina na Yehovha. Dyondzo ya hina vini ya nkarhi na nkarhi yi hi nyika vutlhari byo langutana ni miringo, naswona yi hi pfuna leswaku hi kota ku endla swiboho leswi fambisanaka ni ku rhandza ka Xikwembu naswona sweswo swi endla leswaku hi tshama hi tshembekile eka xona.—Swiv. 2:10, 11.
4 Ku Tiyisela Swi Tisa Mikateko: Hilaha a swi ri hakona eka Pawulo, ku tiyisela ka hina hi ku tshembeka loko hi ri entirhweni wa hina wo chumayela swi tsakisa Yehovha, naswona hi kuma mikateko swin’we ni lava hi va chumayelaka. (Swiv. 27:11) A hi tiyimiseleni ku hambeta hi chumayela, hi kombisa leswaku ripfumelo ra hina ri tiyile naswona i ra “risima lerikulu swinene ku tlula nsuku lowu lovaka hambiloko wu kamberiwe hi ndzilo.”—1 Pet. 1:6, 7.