Swivumbiwa hinkwaswo a swi ri ni ku rhula ni vun’we, ehansi ka vuhosi bya Xikwembu

Hikwalaho Ka Yini Hi Lava Mfumo Wa Xikwembu?

Loko ku vumbiwa vanhu vo sungula, Muvumbi wa hina, loyi vito ra yena ku nga Yehovha, a ku fuma Yena ntsena. A a fuma hi rirhandzu. U endle kaya ro saseka ku nga ntanga wa Edeni leswaku vanhu va hanya eka rona. U tlhele a va nyika swakudya swo tala. Ku engetela kwalaho, u nyike vanhu ntirho wo tsakisa lowu a va fanele va wu endla. (Genesa 1:28, 29; 2:8, 15) Loko vanhu a va lo pfumela ku fumiwa hi Xikwembu a va ta tiphina hi ku rhula lokukulu.

Adamu a khome muhandzu lowu Xikwembu xi wu yiriseke, lowu a nyikiweke hi Evha. — Vanhu vo sungula va ale ku fumiwa hi Xikwembu

Bibele yi vula leswaku ntsumi yin’wana, leyi xandzukeke leyi hi ku famba ka nkarhi yi vitaniweke Sathana Diyavulosi yi vule leswaku Xikwembu a xi na mfanelo yo fuma vanhu. Yi vule leswaku vanhu va ta tsaka hambiloko va nga kongomisiwi hi Xikwembu ni ku fumiwa hi xona. Lexi twisaka ku vava vatswari va hina vo sungula Adamu na Evha, va yingise Sathana kutani va xandzukela Xikwembu.—Genesa 3:1-6; Nhlavutelo 12:9.

Leswi Adamu na Evha va aleke ku fumiwa hi Xikwembu va lahlekeriwe hi kaya ra vona leri nga Paradeyisi ni ntshembo wo hanya hilaha ku nga heriki va nga vabyi. (Genesa 3:17-19) Xiboho xa vona xi khumbe ni vana lava a va ta va na vona. Bibele yi vula leswaku hikwalaho ka leswi Adamu a dyoheke, ‘xidyoho xi nghene emisaveni ni rifu hikwalaho ka xidyoho.’ (Varhoma 5:12) Xidyoho xi vange vuyelo byin’wana byo vava: ‘Munhu u fuma munhu ku n’wi endla swo biha.’ (Eklesiasta 8:9) Hi marito man’wana loko vanhu va tifuma ku ta va ni swiphiqo swo tala.

LOKO VANHU VA SUNGULA KU TIFUMA

Nimrodo a yime hi ndlela yo kombisa ku tikukumuxa. Le ndzhaku vanhu va ri karhi va aka. — Nimrodo u xandzukele Yehovha

Munhu wo sungula ku fuma loyi a boxiweke eBibeleni a ku ri Nimrodo. U xandzukele vuhosi bya Yehovha. Ku sukela enkarhini wa Nimrodo vanhu lava fumaka van’wana va va khoma hi ndlela yo biha. Kwalomu ka malembe ya 3 000 lama hundzeke, Hosi Solomoni u tsale a ku: “[Ndzi vone] mihloti ya lava va tshikileriwaka, kambe a va nga ri na muchaveleri; naswona lava va va tshikilelaka a va ri ni matimba.’—Eklesiasta 4:1.

Ninamuntlha swilo a swi si cinca. Hi 2009 buku ya Nhlangano wa Matiko yi vule leswaku ku fuma vanhu hi ndlela yo biha hi swona “swi vangaka vubihi emisaveni namuntlha.”

NKARHI WO TEKA GOZA!

Misava yi lava varhangeri lavanene ni mfumo lowunene. Sweswo hi leswi Muvumbi wa hina a hi tshembiseke swona!

Swifaniso: Leswi endliwaka hi mifumo ya vanhu. 1. Wansati wa le Asia a tshame exitarateni lexi thyakeke a khome n’wana wakwe loyi a rilaka. 2. Mukhalabye a ri emubedweni exibedlhele. 3. Masocha ma ri karhi ma duvula swibamu enyimpini. 4. Vanhu lava terekeke va ri karhi va huwelela va khome tibodo. 5. Wansati ni n’wana wakwe va yime ehandle ka kaya ra vona, va kuma nghilazi ya rivanti ra vona ra le mahlweni ri fayekile. 6. Doroba leri nga ni musi ni tiphayiphi leti humesaka musi ni tintambhu ta gezi. — Hambi ku ri mimfumo ya vanhu leyi fumaka hi ndlela leyinene yi tsandzekile ku herisa swiphiqo leswikulu swa vanhu

Xikwembu xi simeke Mfumo lowu nga ta siva mimfumo hinkwayo ya vanhu kutani “wona wu ta tshama hilaha ku nga riki na makumu.” (Daniyele 2:44) Lowu hi wona Mfumo lowu ku nga khale vanhu va timiliyoni va wu khongelela. (Matewu 6:9, 10) Kambe Xikwembu a ku nge fumi xona eka mfumo lowu. Xi hlawule Mufumi loyi a tshameke a hanya tanihi munhu wa nyama. Xi hlawule mani?