Xana U Nga Sungula Dyondzo Ya Bibele Hi October?

1. Hi ta va hi fambisa yini hi October?

¹ Hi October hi ta va hi fambisa timagazini ta Xihondzo xo Rindza ni Xalamuka! Loko hi tlhelela eka vanhu lava kombiseke ku tsakela, hi khutaziwa ku va fambisela xiphephana lexi nge Xana Wa Swi Lava Ku Kuma Tinhlamulo Ta Swivutiso Swa Nkoka Swinene eVuton’wini? hi xikongomelo xo sungula dyondzo ya Bibele. Hi nga swi endlisa ku yini leswi?

2. Hi nga xi tirhisa njhani xiphephana lexi nge Swivutiso Swa Nkoka Swinene leswaku hi sungula dyondzo ya Bibele loko hi tlhelela eka munhu loyi hi n’wi nyikeke timagazini?

² Ndlela Yo Tirhisa Xiphephana: Hi nga ha ku: “Timagazini leti ndzi nga ku siyela tona ti khutaza vanhu va mindhavuko ni vukhongeri byo hambana-hambana leswaku va kambisisa Bibele. [Nyika n’wini wa muti xiphephana lexi nge Swivutiso Swa Nkoka Swinene kutani u n’wi komba swivutiso leswi nga exifunengetweni.] Hi leswi swivutiso swin’wana leswi Bibele yi nyikelaka tinhlamulo ta swona leti enerisaka. Xana u tshame u tivutisa xin’wana xa swona?” Endzhaku ka loko a hlamurile, kambisisani nhlamulo ya xivutiso lexi a xi hlawuleke exiphephanini xexo kutani u hlaya rin’wana ra Matsalwa lama kombisiweke. N’wi byele leswaku lexi i xikombiso xa leswi Bibele yi swi dyondzisaka kutani u n’wi nyika buku leyi nge Leswi Bibele Yi Swi Dyondzisaka. Endzhaku ka sweswo, hi nga bula na yena hi ndzimana yo sungula ya ndzima leyi a yi hlawuleke, kumbe hi pfula ndzima leyi yi hlamuselaka hi vuenti mhaka leyi a hi bula ha yona exiphephanini. Hi leswi swikombo swin’wana leswi hi nga swi tirhisaka:

● Xana Xikwembu xa hi rhandza hakunene? (matl. 9-11, tindz. 6-10)

● Xana tinyimpi ni ku xaniseka swi ta kala swi hela? (tl. 12, tindz. 12-13)

● Xana ku endleka yini ha hina loko hi fa? (matl. 59-60, tindz. 7-8)

● Xana ku ta endleka yini hi varhandziwa va hina lava feke? (tl. 71, tindz. 13-15)

● Ndzi fanele ndzi khongela hi ndlela yihi leswaku Xikwembu xi yingisa xikhongelo xa mina? (matl. 166-167, tindz. 5-8)

● Ndzi nga wu kuma njhani ntsako evuton’wini? (tl. 9, tindz. 4-5)

3. Hi nga swi endlisa ku yini leswaku swingheniso swa hina swi pfumelelana ni swiyimo swa vanhu?

³ Loko swiyimo swi nga hi pfumeleli ku komba n’wini wa muti ndlela leyi dyondzo yi fambisiwaka ha yona hi buku leyi nge Leswi Bibele Yi Swi Dyondzisaka loko hi endla riendzo ro vuyela ro sungula, hi nga ha endla malunghiselelo yo tlhela hi ya bula na yena siku rin’wana. Hi ku ya hi ndlela leyi munhu wa kona a tsakelaka ha yona, hi nga vona swi antswa ku bula na yena hi swivutiso leswin’wana leswi nga exiphephanini hi nga si hundzela ebukwini. Onge hi nga xi tirhisa hi vutlhari xiphephana lexi hi October leswaku hi sungula tidyondzo ta Bibele kutani hi pfuna vanhu va timbilu letinene leswaku va “tiva ntiyiso.”—Yoh. 8:31, 32.