Ndlela Yo Sungula Tidyondzo Hi Buku Leyi Nge Leswi Bibele Yi Swi Dyondzisaka
Vo tala va hina hi nga tsaka loko ho kota ku sungula dyondzo ya Bibele ivi hi ya mahlweni hi yi fambisa. Buku leyintshwa leyi nge Xana Bibele Yi Dyondzisa Yini Hakunene? yi ta hi pfuna. Xingheniso xa yona lexi nga eka matluka 3-7, xi hleriwe hi ndlela ya leswaku u kota ku bula ni n’wini wa muti hi Bibele, mi ri karhi mi tirhisa buku leyi. Yi ta olovela ni lava nga riki na ntokoto entirhweni wo chumayela leswaku va sungula tidyondzo ta Bibele.
◼ U nga ha tirhisa xingheniso lexi nga eka tluka 3:
Endzhaku ko vula nchumu wo karhi lowu karhataka vanhu ensin’wini ya ka n’wina, u nga vutisa n’wini wa muti swivutiso leswi tsariweke hi marito yo dzwihala eka tluka 3, ivi u n’wi kombela leswaku a vula ndlela leyi a titwaka ha yona. Kutani u pfula eka matluka 4-5.
◼ Kumbe u nga ha sungula bulo hi ku kandziyisa leswi tsariweke eka matluka 4-5:
U nga ha ku, “Xana a swi nge tsakisi loko swilo leswinene leswi kombisiweke laha swo endleka?” Kumbe u nga ha ku, “Hi swihi eka swilo leswi tshembisiweke laha, leswi u nga tsakelaka ku swi vona swi hetiseka?” Rhiya ndleve loko a hlamula.
Loko n’wini wa muti a rhandza rin’wana ra matsalwa lama tshahiweke, n’wi kombe leswi Bibele yi swi dyondzisaka emhakeni yoleyo, hi ku hlaya tindzimana leti hlamuselaka mhaka yoleyo ebukwini leyi. (Vona bokisi leri nga eka tluka leri ra xiengetelo.) Bula na yena hi rungula leri ku fana niloko u fambisa dyondzo ya Bibele. Leswi u nga swi endla eka riendzo ro sungula hi timinete ta ntlhanu ku ya eka ta khume, u lo yima kunene.
◼ Ndlela yin’wana i ku endla leswaku munhu a tiphofula hi ku tirhisa rungula leri nga eka tluka 6:
Komba n’wini wa muti swivutiso leswi nga le makumu ka tluka rero, kutani u ku, “Xana u tshama u tivutisa swin’wana swa swivutiso leswi?” Loko ku ri ni xivutiso lexi a lavaka nhlamulo ya xona, pfula tindzimana leti xi hlamulaka ebukwini leyi. (Vona bokisi leri nga eka tluka leri ra xiengetelo.) Loko mi ri karhi mi bula hi rungula leri, u va u ri eku fambiseni ka dyondzo ya Bibele hi ndlela yoleyo.
◼ Tluka 7 ri nga tirhisiwa ku kombisa n’wini wa muti ndlela leyi dyondzo ya Bibele yi fambisiwaka ha yona:
Hlaya tindzimana tinharhu to sungula eka tluka leri, ivi u pfula ndzima ya vunharhu kutani u n’wi komba ndlela leyi dyondzo yi fambisiwaka ha yona, u tirhisa tindzimana 1-3. Hlela ku vuyela leswaku mi ta bula hi tinhlamulo ta swivutiso leswi nga eka ndzimana 3.
◼ Ndlela yo lunghiselela ku endla riendzo ro vuyela:
Loko u gimeta bulo ra wena eka dyondzo yo sungula, hlela leswaku u vuya mi ta ya emahlweni ni bulo ra n’wina. U nga ha ku: “Hi timinete ti nga ri tingani hi dyondze leswi Bibele yi swi dyondzisaka emhakeni ya nkoka leyi a hi bula ha yona. Enkarhini lowu taka hi ta bula hi [n’wi siye ni xivutiso lexi mi nga ta bula ha xona]. Xana ndzi nga vuya vhiki leri taka hi nkarhi lowu fanaka?”
Yehovha u hambeta a hi hlomisela ntirho lowu hi faneleke hi wu endla tanihi leswi hi yaka hi tshinela enkarhini lowu a wu vekeke. (Mat. 28:19, 20; 2 Tim. 3:17) A hi yi tirhiseni hi vutlhari buku leyi leyinene leyintshwa, leswaku hi sungula tidyondzo ta Bibele.
[Bokisi leri nga eka tluka 3]
Tinhlamuselo Ta Matsalwa Lama Nga Eka Matluka 4-5
◻ Nhlavutelo 21:4 (matl. 27-8, tindz. 1-3)
◻ Esaya 33:24; 35:5, 6 (tl. 36, ndz. 22)
◻ Yohane 5:28, 29 (matl. 72-3, tindz. 17-19)
◻ Pisalema 72:16 (tl. 34, ndz. 19)
Tinhlamulo Ta Swivutiso Leswi Nga Eka Tluka 6
◻ Ha yini hi xaniseka? (matl. 108-9, tindz. 6-8)
◻ Hi nga swi kotisa ku yini ku langutana ni swilo leswi hi tikiselaka vutomi? (matl. 184-5, tindz. 1-3)
◻ Hi nga endla njhani leswaku ndyangu wa hina wu va lowu tsakeke? (tl. 143, ndz. 20)
◻ Ku endleka yini hi hina loko hi fa? (matl. 58-9, tindz. 5-6)
◻ Xana hi ta kala hi va vona varhandziwa va hina lava feke? (matl. 72-3, tindz. 17-19)
◻ Hi nga tiyiseka njhani leswaku Xikwembu xi ta swi endla leswi xi tshembiseke leswaku xi ta hi endlela swona enkarhini lowu taka? (tl. 24, ndz. 17)