‘Vito Ra Xikwembu A Ri Kwetsimisiwe’
1. Xana yi ri yini nhloko-mhaka ya nongonoko wa nhlengeletano ya xifundzha ya lembe ra ntirho ra 2012 naswona yi sekeriwe kwihi?
1 Mawaku lunghelo leri hi nga na rona ro byarha vito ra Hosi leyi Lawulaka Vuako Hinkwabyo, ku nga Yehovha! Xikwembu hi xona lexi hi byarhiseke vito ra xona, ngopfu-ngopfu ku sukela hi lembe ra 1931, ro tiviwa tanihi Timbhoni ta Yehovha, ku nga vito ro hlawuleka ra Yehovha. (Esa. 43:10) N’wana wa Xikwembu la tswariweke a ri swakwe, ku nga Yesu, a ri teka ri ri ra nkoka vito ra Xikwembu hikuva u dyondzise valandzeri vakwe leswaku va ri tirhisa loko va khongela. (Mat. 6:9) Marito ya Yesu ma hi nyika xisekelo xa nhloko-mhaka ya nongonoko wa nhlengeletano ya hina ya xifundzha ya lembe ra ntirho ra 2012. Yi ri, ‘Vito Ra Xikwembu A Ri Kwetsimisiwe.’
2. Hi rihi rungula leri hi faneleke hi ri langutela hi mahlo-ngati?
2 Leswi Hi Nga Ta Swi Twa: Hi Mugqivela nkulumo leyi nge, “Twarisani Vito Ra Xikwembu Tanihi Vatirheli Va Nkarhi Hinkwawo” yi ta hlamusela xivangelo xo va ntirho wa nkarhi hinkwawo wu ri lowu enerisaka evuton’wini. Hi ta tlhela hi twa tinkulumo ta nxaxamelo leti nga ni nhloko-mhaka leyi nge, “Tivoneleni Leswaku Mi Nga Tisi Xisandzu eVitweni Ra Yehovha,” leti nga ta hi pfuna ku papalata ku phasiwa hi mintlhamu ya mune. Xivutiso lexi nge, I yini leswi nga ta hi pfuna ku chumayela hi ku hiseka loko vanhu va vonaka va nga tsakeli? ni lexi nge, I yini lexi nga ta hi pfuna ku hetisisa ntirho lowu wa nkoka? swi ta hlamuriwa eka nkulumo leyi nge, “Lexi Endlaka Vito Ra Xikwembu Ri Fanele Ri Kwetsimisiwa.” Hi Sonto hi ta tiphina hi tinkulumo ta mune ta nxaxamelo ta ndlela leyi hi nga ri kwetsimisaka ha yona vito ra Xikwembu hi mianakanyo ya hina, mavulavulelo, swiboho ni matikhomelo ya hina. Vanhu lava ha ku sungulaka ku hlanganyela va ta tiphina hi nkulumo ya le rivaleni, leyi nga ni nhloko-mhaka leyi nge, “Yehovha U Ta Kwetsimisa Vito Ra Yena Lerikulu eArmagedoni.”
3. Hi rihi lunghelo leri hi nga na rona naswona nongonoko wu ta hi pfuna njhani?
3 Ku nga ri khale Yehovha u ta teka goza ro kwetsimisa vito rakwe. (Ezek. 36:23) Sweswi, hi ni lunghelo ro seketela hinkwaswo leswi yimelaka vito ro kwetsima ra Yehovha. Ha tiyiseka leswaku nongonoko wa nhlengeletano ya xifundzha wu ta pfuna un’wana ni un’wana wa hina ku hetisisa vutihlamuleri bya hina tanihi vabyarhi va vito ra Xikwembu.