Xana Minkandziyiso Ya Hina Yi Le Ka Xiyimo Xa Njhani?

Lexi i xivutiso lexinene lexi hi nga tivutisaka xona malunghana ni minkandziyiso leyi hi kunguhataka ku yi fambisa. Ku fambisa minkandziyiso leyi petsekeke, leyi pendiweke hi swilo, leyi thyakisiweke hi misava kumbe leyi handzukeke swi nga tisa vuyelo byo biha enhlengeletanweni ya hina naswona swi nga endla leswaku n’wini wa muti a nga ku voni ku saseka ka rungula leri ponisaka vutomi leri minkandziyiso yi nga na rona.

Hi nga yi hlayisa njhani minkandziyiso ya hina leswaku yi tshama yi basile? Vo tala va vona swi pfuna ku hlela nkwama wa vona wo ya hi wona ensin’wini leswaku minkandziyiso yi va leyi hlelekeke. Hi xikombiso, va ni ndhawu yo veka tibuku, timagazini, tibroxara, swiphephana ni minkandziyiso yin’wana. Nkarhi wun’wana ni wun’wana loko va tlherisela Bibele ya vona ni minkandziyiso yin’wana ni yin’wana laha yi tshamaka kona, va endla tano hi vukheta leswaku yi nga onhaki. Vahuweleri van’wana va veka minkandziyiso ya vona enkwameni wa timagazini kumbe enkwameni wa plasitiki lowu vonikelaka. Ku nga khathariseki leswaku hi tirhisa nchumu wa njhani, a hi lavi ku nyika munhu xivangelo xo kuma xihoxo evutirhelini bya hina hi ku va hi n’wi nyika nkandziyiso lowu onhakeke.—2 Kor. 6:3.