Timbewu Ti Fanele Ti Cheletiwa Leswaku Ti Ta Kula
1. I yini leswi faneleke swi cheletiwa leswaku swi ta kula?
1 Timbewu leti byariweke exirhapeni ti fanele ti cheletiwa leswaku ti ta kula. Swi tano hi timbewu ta ntiyiso leti byariwaka etimbilwini ta vanhu ensin’wini ya hina. (1 Kor. 3:6) Hi fanele hi endla maendzo yo vuyela naswona hi cheleta timbewu leti to fanekisela hi tirhisa Rito ra Xikwembu loko hi lava leswaku ti kula.
2. Hi nga n’wi pfuna njhani n’wini wa muti leswaku a tsakela leswi hi nga ta dyondza ha swona eka riendzo leri landzelaka?
2 Vutisa Xivutiso: Loko u lunghiselela xingheniso xa wena, ha yini u nga lunghiseleli ni xivutiso lexi tlhontlhaka mianakanyo lexi u nga ta xi hlamula eka riendzo leri landzelaka? Xi vutise loko u gimeta riendzo ro sungula naswona endla malunghiselelo yo tlhela u vuya. Vo tala swa va vuyerisa ku hlawula swin’wana ebukwini leyi nge Leswi Bibele Yi Swi Dyondzisaka leswi nga ta va pfuna ku kombisa ndlela leyi dyondzo ya Bibele yi fambisiwaka ha yona.
3. Hi rihi rungula leri u nga ri katsaka loko u tsala leswi endlekeke eka riendzo ro sungula?
3 Tsala Ehansi: Loko u gimeta riendzo ro sungula namba u swi tsala ehansi hinkwaswo leswi mi vulavuleke ha swona. Tsala vito ni adirese ya munhu yoloye. Nakambe i swinene ku tsala siku ni nkarhi lowu u vulavuleke na yena ha wona, leswi mi buleke ha swona ni nkandziyiso lowu u n’wi fambiseleke wona, loko wu ri kona. Xana u ku byele leswaku u le ka vukhongeri byo karhi? Xana u ni ndyangu? Xana u boxe leswi a swi tsakelaka ni leswi n’wi karhataka? Rungula ro tano ri ta ku pfuna leswaku u burisana na yena hi timhaka leti nga ta nkoka eka yena loko u tlhelela eka yena. Tlhela u tsala ehansi loko u pfumele ku tlhela u n’wi endzela ni xivutiso lexi u nga ta xi hlamula.
4. Ha yini hi fanele hi phikelela loko hi tlhelela eka vanhu lava kombiseke ku tsakela rungula ra hina?
4 Phikelela: Sathana a nge wisi eka matshalatshala yakwe yo “teka rito” leri byariweke embilwini ya munhu. (Mar. 4:14, 15) Hikwalaho, u nga wi mapa loko swi ku tikela ku tlhela u kuma munhu la tsakelaka ekaya kakwe. Xana u nga n’wi rhumela papila kumbe u n’wi hoxela rona enyangweni? Phayona rin’wana ri sungule ku dyondza ni wansati un’wana ri yime enyangweni kambe a ra ha swi kotanga ku tlhela ri n’wi kuma ekaya ka yena, hiloko ri n’wi rhumela papila. Loko eku heteleleni makwerhu yoloye wa xisati a n’wi kumile, wansati yoloye u phofule ndlela leyi a khumbekeke ha yona hikwalaho ka nkhathalelo lowu a n’wi kombiseke wona. Loko hi ri karhi hi cheleta mbewu ya ntiyiso, hi nga va ni ntsako lowu tisiwaka hi ku yi vona yi kula naswona yi “veka mihandzu hilaha ku phindhiweke ka 30, ka 60, ka 100.”—Mar. 4:20.