Ku Antswisa Vutshila Bya Hina eNsin’wini—Ku Pfula Ndlela Yo Endla Riendzo Ro Vuyela

Lexi Endlaka Swi Va Swa Nkoka: Loko hi kuma munhu la tsakelaka, hi lava ku tlhelela eka yena hi nkarhi lowu a kumekaka ha wona ekaya leswaku hi ta cheleta mbewu ya ntiyiso leyi hi yi byaleke. (1 Kor. 3:6) Hakanyingi leswi swi lava leswaku loko hi nga si lela, hi pfula ndlela yo endla riendzo ro vuyela hi ku vutisa munhu yoloye leswaku hi nga vuya rini. Ku engetela kwalaho, i swinene ku vutisa xivutiso lexi hi nga ta xi hlamula loko hi tlhelela. Leswi swi ta endla leswaku n’wini wa muti a ri langutela hi mahlo-ngati riendzo ra hina, naswona loko xivutiso xa kona xi hlamuriwa eka nkandziyiso lowu hi n’wi siyeleke wona, u ta wu hlaya. Ku pfula ndlela yo endla riendzo ro vuyela swi tlhela swi endla leswaku swi olova ku tlhelela hikuva mhaka leyi ku nga ta buriwa ha yona se yi hlawuriwile, naswona n’wini wa muti wa swi tiva leswi a faneleke a swi langutela. Loko hi tlhelela eka yena, hi nga n’wi hlamusela leswaku hi vuyile leswaku hi ta hlamula xivutiso lexi hi xi vutiseke enkarhini lowu hundzeke, kutani hi ya emahlweni ni bulo.

Ndlela Leyi U Nga Swi Endlaka Ha Yona:

Loko u lunghiselela xingheniso lexi u nga ta xi tirhisa loko u chumayela hi yindlu ni yindlu, tlhela u lunghiselela xivutiso lexi u nga ta xi hlamula eka riendzo ra wena ro vuyela. Xi nga ha va xi sekeriwe eka mhaka leyi ku buriwaka ha yona eka nkandziyiso lowu u wu fambisaka hi siku rero, kumbe ku nga ha va xivutiso lexi hlamuriwaka eka yin’wana ya minkandziyiso ya hina leyi tirhiseriwaka ku fambisa dyondzo, leyi u nga ha n’wi nyikaka yona loko u tlhelela.
Loko u gimeta bulo ni munhu la tsakelaka, n’wi byele leswaku u nga tsakela ku tlhela u vuya u ta burisana na yena ivi u n’wi hlamusela xivutiso lexi u xi lunghiseleleke lexi u nga ta xi hlamula loko u vuya. Ensin’wini yin’wana vanhu va khomeke swinene naswona va nga ha kanakana ku pfumela leswaku u tlhela u va endzela. Loko swi ri tano, u nga ha ku: “Xana lowu hi wona nkarhi lowu u kumekaka ha wona laha kaya? [Yimela nhlamulo.] Vhiki leri taka, ndzi nga tsakela ku tlhela ndzi hundza leswaku ndzi ta hlamula xivutiso lexi nge . . . Loko ndzi kuma leswaku u khomeke ngopfu, u nga chavi ku ndzi byela leswaku u khomekile.”
Loko u byela n’wini wa muti leswaku u ta vuya hi nkarhi wo karhi, vuya hi nkarhi wolowo. (Mat. 5:37) Loko u gimeta bulo eka riendzo ro vuyela, pfula ndlela ya riendzo leri landzelaka.

Ringeta Ku Endla Leswi N’hweti Leyi:

Loko u lunghiselela xingheniso xa wena, tlhela u lunghiselela xivutiso lexi u nga ta xi hlamula loko u tlhelela. Xi byele vahuweleri lava u tirhaka na vona nsimu.