Hi Xihi “Xivangelo [Xa Wena] Xo Khana”?
1. Hi xihi xivangelo lexi hi nga na xona xo khana loko n’hweti yin’wana ni yin’wana yi hela?
1 Loko n’hweti yin’wana ni yin’wana yi hela, vahuweleri hinkwavo va komberiwa ku tisa swiviko swa vona swa ntirho wa nsimu, hi xihi ‘xivangelo xa wena xo khana’? (Gal. 6:4) Hambi hi maphayona yo hlawuleka lama vikaka tiawara ta 130 entirhweni wa nsimu kumbe hi vahuweleri lava pfumeleriweke ku vika timinete ta 15, hinkwerhu ka hina hi fanele hi khana hileswi hi kotaka ku nyika hi tsakile entirhweni wa Yehovha.—Ps. 100:2.
2. Ha yini hi fanele hi tinyiketela entirhweni wa Yehovha?
2 Yehovha, Hosi Leyi Lawulaka vuako hinkwabyo u faneriwa hi ku va hi n’wi nyika swilo leswinene ngopfu. (Mal. 1:6) Leswi hi n’wi rhandzaka, hi nyikele hi vutomi bya hina leswaku hi endla ku rhandza ka yena. Hikwalaho, loko siku ri pela kumbe n’hweti yi hela, loko hi tiyiseka leswaku hi nyikele hi “swirhangana” swa nkarhi wa hina, vuswikoti ni hi matimba ya hina entirhweni wa Yehovha, hi ta va ni xivangelo xo khana. (Swiv. 3:9) Hambiswiritano, loko ripfalo ra hina ri hi byela leswaku hi nga antswisa, swi ta va swinene ku kambisisa laha hi nga antswisaka kona.—Rhom. 2:15.
3. Ha yini ku nga ri vutlhari ku tiringanisa ni van’wana?
3 “Ku Nga Ri Hi Ku Tiringanisa Ni Munhu Un’wana”: Ku ta va ku nga ri vutlhari ku va hi tiringanisa ni van’wana kumbe hi tifanisa ni ndlela leyi a hi endla swilo ha yona loko ha ha ri ni matimba. Swiyimo swa cinca naswona vuswikoti bya vanhu bya hambana. Hakanyingi ku tiringanisa swi endla leswaku ku va ni ku phikizana kumbe swi endla u titwa u ri xikamba. (Gal. 5:26; 6:4) Yesu a a nga tifanisi na munhu. Ematshan’weni ya sweswo a a bumabumela loko munhu a endle leswi nga ematimbeni yakwe.—Mar. 14:6-9.
4. Hi yihi dyondzo ya nkoka leyi hi nga yi dyondzaka exifanisweni xa Yesu xa titalenta?
4 Exifanisweni xa Yesu xa titalenta, hlonga rin’wana ni rin’wana ri kume titalenta hi ku ya hi “vuswikoti bya rona.” (Mat. 25:13-15) Loko n’wini wa mahlonga a vuya ivi a lava xiviko, lama tirheke hi matimba hi ku ya hi vuswikoti ni swiyimo swa wona ma bumabumeriwile kutani ma nghena entsakweni wa n’wini wa wona. (Mat. 25:21, 23) Loko na hina hi tshama hi khomekile entirhweni wo chumayela hi Mfumo, hi nga tiyiseka leswaku Xikwembu xi ta hi amukela naswona hi ta va ni xivangelo xo khana!