Rito Ra Xikwembu Ri Pfuna Ku Dyondzisa

1. Nhloko-mhaka ya nhlengeletano ya xifundzha ya lembe ra ntirho ra 2014 yi ri yini naswona i xivutiso xihi lexi nga ta hlamuriwa eka nongonoko?

¹ ‘Muleteri wa hina Lonkulu,’ Yehovha, i mudyondzisi lonene evuakweni hinkwabyo. (Esa. 30:20, 21) Kambe, xana Yehovha u hi letela njhani? U hi nyike buku ya nkoka ku tlula hinkwato—Rito rakwe leri huhuteriweke ku nga Bibele. Dyondzo ya Xikwembu yi nga hi vuyerisa njhani enyameni, emianakanyweni, emintlhavekweni ni le moyeni? Xivutiso lexi, xi ta hlamuriwa enongonokweni wa nhlengeletano ya xifundzha ya lembe ra ntirho ra 2014. Nhloko-mhaka ya nongonoko yi ri, “Rito Ra Xikwembu Ri Pfuna Ku Dyondzisa” naswona yi sekeriwe eka 2 Timotiya 3:16.

2. Xana tinhla-nkulu ti ta kandziyisiwa hi tinhlamulo ta swivutiso swihi?

² Lava Tinhla-nkulu Leti: Tinhla-nkulu ta nongonoko ti ta kandziyisiwa hi tinhlamulo ta swivutiso leswi landzelaka:

• Xana dyondzo ya Xikwembu yi byi khumba njhani vutomi bya hina? (Esa. 48:17, 18)

• Loko hi lava ku endla ku cinca eka swiyimo swa hina leswaku hi kota ku tirhela Yehovha nkarhi hinkwawo, i yini lexi hi nga tiyisekaka ha xona? (Mal. 3:10)

• Hi fanele hi angula njhani loko hi twa ‘tidyondzo leti nga tolovelekangiki’? (Hev. 13:9)

• Hi nga yi tekelela njhani ‘ndlela ya Yesu yo dyondzisa’? (Mat. 7:28, 29)

• Ha yini lava dyondzisaka evandlheni va tidyondzisa? (Rhom. 2:21)

• Rito ra Xikwembu ri vuyerisa hi yini? (2 Tim. 3:16)

• Vanhu va khumbeka njhani hi ku ‘ninginisiwa’ ka matiko? (Hag. 2:6, 7)

• Hi wihi ntshembo lowu Yehovha a nga na wona eka hina? (Efe. 5:1)

• Ha yini hi fanele hi tirha hi matimba leswaku hi tshama eka tidyondzo ta Yehovha? (Luka 13:24)

3. Ha yini swi ri swa nkoka leswaku hi va kona ni ku yingisela hi vurhon’wana eka nongonoko lowu, lowu lunghiseleriweke hi nkarhi?

³ Loko Pawulo a nga si tsala marito lawa nhloko-mhaka ya nongonoko yi tekiweke eka wona eka 2 Timotiya ndzima 3, u sungule hi ku hlamusela minkarhi ya mangava leyi nga ta fungha masiku ya makumu. U tsale a ku: “Vanhu vo homboloka ni vaxisi va ta ya emahlweni va nyanya evubihini bya vona, va hambukisa, na vona va hambukisiwa.” (2 Tim. 3:13) Leswaku hi nga hambukisiwi, mawaku ndlela leyi swi nga swa nkoka ha yona ku yingisa ni ku hanya hi ku pfumelelana ni leswi dyondzo ya Xikwembu yi swi vulaka! Xisweswo, onge hi nga tiyimisela ku va kona eka nongonoko lowu wu lunghiseleriweke hi nkarhi ni ku yingisela hi vurhon’wana!