Swingheniso Leswi Hi Nga Swi Tirhisaka

Ku sungula tidyondzo ta Bibele hi Mugqivela wo sungula wa January

“Vanhu vo tala va ni mavonelo ya vona malunghana ni Xikwembu. Van’wana va anakanya leswaku i xivumbiwa xa moya lexi nga twisisekiki. Van’wana va xi teka tanihi Tatana wa rirhandzu wa le tilweni. Xana u anakanya leswaku Xikwembu i munhu wa muxaka muni?” Yimela nhlamulo. N’wi kombe tluka ro hetelela ra Xihondzo xo Rindza xa January 1 kutani mi kambisisa swin’we rungula leri nga ehansi ka xivutiso xo sungula ni tsalwa rin’we leri kombisiweke. N’wi siyele timagazini kutani u hlela ku tlhela u vuya mi ta bula hi xivutiso lexi landzelaka.

Xihondzo xo Rindza January 1

“Hi famba hi burisana ni vanhu hi nchumu wun’wana lowu hi khumbaka hinkwerhu, ku nga ku feriwa hi munhu loyi hi n’wi rhandzaka. Xana u pfumelelana na mina leswaku swa tika swinene ku feriwa hi munghana kumbe xaka leri u ri rhandzaka? [Yimela nhlamulo.] Vanhu vo tala va chaveleleka loko va twa ndzimana leyi ya Bibele. [Hlaya Esaya 25:8.] Magazini lowu wu vulavula hi xitshembiso lexi khutazaka lexi nga eBibeleni xa leswaku rifu a ri nge he vi kona ni leswaku vanhu lava feke lava hi va rhandzaka va ta pfuxiwa.”

Xalamuka! January

“Xana wa pfumela leswaku mindyangu yi langutana ni swiphiqo swo tala namuntlha? [Yimela nhlamulo.] Xivuriso lexi xa le Bibeleni xi hi byela leswi mindyangu yi faneleke yi va na swona leswaku yi kota ku langutana ni swiphiqo leswi. [Hlaya Swivuriso 24:3.] Vo tala va kume leswaku Bibele hi yona yi nga ni vutlhari lebyi va nga byi tshembaka. Magazini lowu wu vulavula hi Web site leyi nga yoxe leyi sekeriweke eBibeleni leyi nga ni switirhisiwa swa mahala leswi nga pfunaka mindyangu.”