Tirhisa Nkarhi Lowu Ku Pfulekelaka Leswaku U Chumayela Rungula Ra Mfumo!

1. Hi nga dyondza yini eka xikombiso xa Davhida?

¹ Hosi Davhida i un’wana wa vanhu lava nga swi pfumelelangiki swiyimo swa vona leswaku swi va heta matimba. Hi xikombiso, Davhida a a lava ku akela Yehovha yindlu. Loko a siveriwile ku yi aka, Davhida u cince tipakani ta yena kutani a pfuneta eku hlengeleteni ka swilo leswi Solomoni a a ta swi tirhisa ku aka tempele. (1 Tih. 8:17-19; 1 Tikr. 29:3-9) Ematshan’weni yo anakanyisisa hi swilo leswi a a ta tsandzeka ku swi endla, Davhida u anakanyisise hi swilo leswi a a ta kota ku swi endla. Hi nga xi tekelela njhani xikombiso xa Davhida loko hi ri karhi hi lava tindlela to chumayela rungula ra Mfumo?

2. I ku tikambisisa kwihi loku hi nga ku endlaka?

² Endla Leswi U Nga Swi Kotaka: Vanhu vo tala va olovise vutomi bya vona leswaku va ta va maphayona ya nkarhinyana kumbe ya nkarhi hinkwawo. (Mat. 6:22) Xana na wena u nga phayona? Loko u kambisisa swiyimo swa wena hi vuenti, u nga ha swi xiya leswaku u pfulekeriwe hi “nyangwa leyikulu leyi yisaka entirhweni.” Loko yi ku pfulekerile, tirhisa nkarhi wolowo!—1 Kor. 16:8, 9.

3. Hi yihi minkarhi leyi hi nga chumayelaka van’wana ha yona hambiloko swiyimo swa hina swi nga hi pfumeleli ku phayona?

³ Kambe, ku vuriwa yini loko swiyimo swa wena swi nga ku pfumeleli ku phayona? U nga wu honisi nkarhi lowu ku pfulekelaka. Hi xikombiso, loko entirhweni wa wena wo tihanyisa u hlangana ni vanhu lava nga riki vapfumeri, ha yini u nga tirhisi nkarhi lowu faneleke lowu ku pfulekelaka leswaku u va chumayela? Kumbe loko u ri ni swiphiqo swa rihanyo, xana u nga tirhisa nkarhi lowu ku pfulekelaka ku chumayela madokodela ya wena? Tsundzuka leswaku ku ni lunghiselelo ra vanhu lava nga kotiki ku tirha nkarhi wo tala hikwalaho ka ku dyuhala kumbe hikwalaho ko vabya ra leswaku va vika hambi ku ri timinete ta 15 entirhweni wa vona wa nsimu. Loko u tsala xiviko xa wena xa n’hweti xa ntirho wa nsimu, tiyiseka leswaku u tsala ni nkarhi lowu u chumayeleke hi xitshuketa ha wona swin’we ni minkandziyiso leyi u yi fambiseke, ku katsa ni swiphephana ni swirhambo swa Xitsundzuxo ni swa nhlengeletano ya xifundzha. Loko u hlanganisa timinete leti u ti tirhiseke ku chumayela vanhu, u nga ha hlamala ku kuma leswaku ti tele.

4. U tiyimisele ku endla yini?

⁴ A hi tirhiseni nkarhi wun’wana ni wun’wana lowu hi pfulekelaka leswaku hi chumayela mahungu lamanene, ku nga khathariseki swiyimo swa hina. Loko hi endla tano hi ta tsaka hi ku tiva leswaku hi endla leswi hi nga swi kotaka hikwalaho ka Mfumo.—Mar. 14:8; Luka 21:2-4.