Pfula Tindlela To Chumayela
1 Vandlha ra Vukreste ri vumbiwa hi vanhu va swiyimo swo hambana-hambana. Kambe, hinkwerhu hi tiyimisele ku dzunisa Yehovha. (Ps. 79:13) Kutani hi nga ti pfula njhani tindlela tin’wana to chumayela loko vuvabyi kumbe swiyimo swin’wana swo tika swi hi sivela ku ya chumayela mahungu lamanene?
2 Emintirhweni Ya Siku Ni Siku: Yesu a a chumayela vanhu lava a a hlangana na vona siku ni siku. Siku rin’wana u hundze ehofisini ya xibalo kutani a vona Matewu ivi a n’wi chumayela, nakambe loko a ri eriendzweni u chumayele Zakiya, loko a tiwiserile kun’wana u chumayele wansati wa Musamariya. (Mat. 9:9; Luka 19:1-5; Yoh. 4:6-10) Na hina, hi nga chumayela vanhu loko hi ri karhi hi bula na vona hi leti ni letiya. Ku famba ni Bibele swin’we ni swiphephana kumbe tibroxara, swi ta hi khutaza leswaku hi tshama hi lunghekele ku vulavula hi ntshembo wa hina.—1 Pet. 3:15.
3 Xana u tsandzeka ku chumayela hi yindlu ni yindlu hileswi u nga swi kotiki ku famba? Loko swi ri tano, chumayela vaongori loko va ku endzerile ni vanhu van’wana lava va taka eka wena. (Mint. 28:30, 31) Loko swiyimo swi ku boha leswaku u tshama u ri ekaya, u nga chumayela hi riqingho kumbe hi ku tsala mapapila. Makwerhu un’wana wa xisati u tshamela ku tsalela maxaka ya yena lama nga riki Timbhoni. Emapapileni ya yena u katsa ni marito lama khutazaka lama humaka eBibeleni ni mintokoto leyi a yi kumeke loko a ri karhi a chumayela.
4 Exikolweni Kumbe eNtirhweni: Ku navela ka hina ku dzunisa Yehovha ku ta tlhela ku hi susumetela ku pfula tindlela to byala mbewu ya ntiyiso loko hi ri entirhweni kumbe exikolweni. Xifanyetana xin’wana xa malembe ya nhungu hi vukhale xi byele vadyondzi-kulobye leswi xi swi dyondzeke hi ta n’weti eka Xalamuka! Loko mudyondzisi wa xona a twa lomu xi ri kumeke kona rungula leri, u kombele ku hamba a tiseriwa Xihondzo xo Rindza ni Xalamuka! Entirhweni, loko ho veka wun’wana wa minkandziyiso ya hina lomu wu nga voniwaka hi mani na mani, hi nga endla vanhu leswaku va vutisa swivutiso, kutani hi ta va hi pfule ndlela yo chumayela.
5 Xana ku ni tindlela leti u nga ti pfulaka to chumayela, loko u ri karhi u endla mintirho ya wena ya siku ni siku? Onge hi nga swi tirhisa hi xitalo swiyimo swa hina, siku ni siku hi lwela ku ‘nyikela eka Xikwembu xitlhavelo xa ku dzunisa.’—Hev. 13:15.