Ku Antswisa Vutshila Bya Hina eNsin’wini—Ku Chumayela Hi Intercom

Lexi Endlaka Swi Va Swa Nkoka: Ku chumayela hi intercom swi nga ha chavisa. Hi nga swi papalata njhani ku pfumelela ntlhontlho lowu leswaku wu nga hunguti ku hisekela ka hina mintirho leyinene? Tsundzuka leswaku ku chumayela hi intercom ku nga ha va yona ntsena ndlela yo fikelela vanhu van’wana hi mahungu lamanene. (Rhom. 10:14) Swikombiso swa vanhu vo tala swi kombisa leswaku ku nga chumayeriwa hi ndlela leyi humelelaka ku tirhisiwa ndlela leyi. (Vona Buku Ya Lembe Ya 2011, tl. 65, ndzim. 2 ku ya eka tl. 66 ndzim. 1 ni Buku Ya Lembe Ya 2000, tl. 54, ndzim. 3.) Xiya swiringanyeto leswi landzelaka.

Ndlela Leyi U Nga Swi Endlaka Ha Yona:

Lunghiselela xingheniso xo koma kutani u xi tsala leswaku u ta xi hlayela n’wini wa muti hi ku kongoma eka intercom. Leswi swi nga ku pfuna leswaku u va ni xivindzi. Sungula hi ku hlamusela xikongomelo xa ku endza ka wena. Vitana n’wini wa muti hi vito rakwe loko ri kombisiwile eka nxaxamelo wa vanhu lava tshamaka kwalaho. Gimeta hi ku kombela ku n’wi tisela xiphephana kumbe magazini (kumbe u n’wi siyela swona ekaya kakwe) laha a nga ta kuma rungula leri engetelekeke.
Tshama u ri ni langutelo lerinene. N’wayitela u tlhela u kombetela ku fana ni loko u vulavula ni munhu hi ku kongoma.
Vulavula u ntshunxekile. Vulavula kahle ni hi mpfumawulo lowu twakalaka. Papalata ku pfa u miyela swi nga fanelanga naswona u nga vulavuli hi ku hatlisa ngopfu.
Vana ni vuxiyaxiya. Laha ku nga ni miako leyikulu, ku nga ha va ni ti intercom to tala. Kumbexana u nga hlawula ku ba tinharhu ntsena, ivi u nga rivali laha u nga yima kona kutani u famba. Lava tshamaka emuakweni wolowo va nga ha chava loko hi yima nkarhi wo leha endhawini leyi vaendzi va fikelaka eka yona, leswaku hi ta ba intercom yin’wana ni yin’wana.

Ringeta Ku Endla Leswi N’hweti Leyi:

Hi nkarhi wa vugandzeri bya n’wina bya ndyangu endlani minkombiso leyi eka yona lava va wu endlaka va bulaka va fularhelanile.