Ndlela Yo Chumayela Hi Ku Tirhisa Xigolonyana Kumbe Tafula Ro Veka Minkandziyiso

Vanhu va timbilu letinene va amukele ntiyiso hikwalaho ka leswi va chumayeriweke hi ku tirhisa xigolonyana kumbe tafula ro veka minkandziyiso. (Yoh. 6:44) Hikwalaho, vakulu va khutaziwe ku hlela leswaku ku ya chumayeriwa etindhawini leti ku hundzuka vanhu vo tala, leti nga ensin’wini ya mavandlha ya vona. Tanihi leswi swigolonyana kumbe matafula swi nga ta ka swi nga siyiwi endhawini yoleyo, a swi bohi ku kombela mpfumelelo eka valawuri. I vamani lava fanelekaka ku chumayela hi ndlela leyi? I vahuweleri lava nga ni vuxiyaxiya, lava tikhomaka hi ndlela leyi xiximekaka naswona va nga ni vuswikoti byo sungula mabulo lama tsakisaka. Laha hansi ku xaxametiwe swilo swin’wana leswi vahuweleri va faneleke va swi endla ni leswi va nga fanelangiki va swi endla, leswi nga ta va pfuna leswaku vanhu va va yingisela.

Leswi Muhuweleri A Faneleke A Swi Endla:

Vana ni xinghana u tlhela u va pfuna vanhu lava hundzaka hi ndlela. Vahuweleri van’wana va n’wayitela swi huma embilwini va tlhela va xeweta hi ndlela ya xinghana. Loko munhu a languta laha ku vekiweke minkandziyiso loko a ri karhi a hundza, u nga ha ku, “U nga titekela nkandziyiso loko u swi tsakela.”
Siya mpfhuka lowu ringaneke exikarhi ka wena ni laha ku vekiweke minkandziyiso. Etindhawini tin’wana vahuweleri va yingiseriwa loko va nga yimelanga ekule ni laha ku vekiweke minkandziyiso. Van’wana loko va endla tano va kuma leswaku vanhu lava hundzaka hi ndlela va kanakana ku yima, hikwalaho va yimela ekulenyana kukondza ku va ni munhu loyi a yimaka a languta minkandziyiso. Loko munhu a tshinelela laha ku vekiweke minkandziyiso kona, ringeta ku sungula bulo na yena, kumbexana u n’wi vutisa xivutiso lexi nge, “Xana u tshame u tivutisa xivutiso xolexo?”
Tirhisa Bibele hilaha u nga kotaka hakona.
Hlamusela munhu un’wana ni un’wana loyi a tekaka wun’wana wa minkandziyiso leyi hi yi tirhisaka ku dyondza ni vanhu yo tanihi buku leyi nge, Leswi Bibele Yi Swi Dyondzisaka, malunghana ni lunghiselelo ra dyondzo ya Bibele. N’wi byele leswaku u nga n’wi tlangela vhidiyo leyi nge Ha Yini U Fanele U Dyondza Bibele? eka xitirhisiwa xa wena xa elektroniki.
Loko swi koteka kombela tinomboro ta riqingho ta vanhu lava tsakelaka kumbe ta laha va tshamaka kona.

Leswi Muhuweleri A Nga Fanelangiki A Swi Endla:

U nga vi ni tihanyi, u nga sindzisi vanhu kumbe u yima ekusuhi ni laha ku vekiweke minkandziyiso onge wo va murindzi.
U nga teki ndlela leyi yo chumayela tanihi ndlela yo fambisa minkandziyiso ntsena. Loko hi ri ensin’wini, xikongomelo xa hina i ku sungula tidyondzo ta Bibele, hikwalaho hi fanele hi ringeta ku burisana ni vanhu.
U nga yimi emahlweni ka tafula kumbe xigolonyana naswona u nga heti nkarhi wo tala u ri karhi u dya mabulo ni makwerhu loyi u tirhaka na yena nsimu. Loko u lava ku bela munhu riqingho hi selfoni ya wena, swa antswa leswaku u ya ekulenyana ni laha mi nga veka minkandziyiso kona.
U nga phikizani ni vanhu lava kanetaka. Loko mukaneti a sungula ku mi kavanyeta, swa antswa mi suka mi ya yima kun’wana.