Ku Lunghiselela Swa Laveka Leswaku Hi Ta Dyondzisa Hi Vutshila

Eka swiendlakalo swimbirhi, Yesu u vutisiwe xivutiso lexi fanaka mayelana ni vutomi lebyi nga heriki, kambe minkarhi hinkwayo u hlamule munhu loyi a n’wi vutiseke hi ku ya hi swilaveko swa yena. (Luka 10:25-28; 18:18-20) Hikokwalaho, hambileswi hi nga ha vaka hi yi tiva hi nhloko buku leyi hi dyondzaka ni vanhu ha yona, hi fanele hi yi lunghiselela hi ri karhi hi anakanya hi xichudeni. Hi nga ha tivutisa swivutiso leswi, xana hi tihi tinhla leti nga ha xi tikelaka ku ti twisisa? Hi wahi matsalwa lama tshahiweke lawa hi nga ma hlayaka na xona? Hi fanele hi dyondza na xona rungula ro tanihi kwihi? Swi nga ha lava leswaku hi lunghiselela xikombiso, nhlamuselo kumbe swivutiso swo karhi leswaku hi ta pfuna xichudeni leswaku xi twisisa leswi xi nga ta swi dyondza. Ku engetela kwalaho, leswi ku nga Yehovha loyi a endlaka leswaku mbewu ya ntiyiso yi mila embilwini, hi fanele hi kombela mikateko ya Yehovha loko hi lunghiselela dyondzo, hi khongelela xichudeni ni matshalatshala ya hina yo xi pfuna hi tlhelo ra moya.—1 Kor. 3:6; Yak. 1:5.