“Se Ndza Yi Rhandza Nsimu!”

NDZI HELERIWA HI NTSAKO

Lexi twisaka ku vava, loko ndzi nghena emalembeni ya vuntshwa, vuxaka bya mina na Yehovha byi sungule ku tsana. Vadyondzikulorhi a va vonaka va ri ni ntshunxeko wo tiendlela ku rhandza naswona a ndzi vona onge ndza kayela. A ndzi vona onge milawu leyi vatswari a va ndzi vekela yona ni ku hanya hi milawu ya Vukreste swi ndzi tsona ntsako naswona ku tirhela Yehovha swa tika. Hambileswi a ndzi swi tiva leswaku Yehovha u kona kambe a ndzi titwa ndzi nga ha ri na vuxaka na yena.

Hambiswiritano, a ndzi tshikanga ku ya ensin’wini kambe a ndzo yela ku hetisisa nawu. Loko ndzi ya, a ndzi nga lunghiseleli, hikwalaho a swi ndzi tikela ku sungula bulo ni n’wini wa muti ni ku kuma vanhu lava tsakelaka ku dyondza Bibele. Sweswo swi endle ndzi nga ha wu tsakeli ntirho wa nsimu. A ndzi tivutisa leswi, ‘Xana lava chumayelaka vhiki ni vhiki, n’hweti ni n’hweti va swi endlisa ku yini?’

Loko ndzi ri ni malembe ya 17, a ndzi lava ku va ni ntshunxeko wo tiendlela leswi ndzi swi lavaka handle ko lawuriwa hi vatswari. Hikwalaho, ndzi longe leswi nga swa mina ndzi rhurhela eAustralia. Mhaka leyi a yi va khomanga kahle vatswari va mina. Hambileswi a va karhatekile kambe a va tshemba leswaku ndzi ta ya emahlweni ndzi tirhela Yehovha.

Loko ndzi ri eAustralia, vuxaka bya mina na Yehovha byi ye byi tsana swinene. Ndzi sungule ku lovha etinhlengeletanweni ta vandlha. Ndzi ve munghana wa vantshwa van’wana lava na vona a va lovha kutani hi masiku man’wana ya tinhlengeletano, a hi ya eku nweni hi tlhela hi cina enightclub. Loko ndzi swi tsundzuka, ndza swi vona leswaku a ndzi hanya vutomi bya mikoka yimbirhi kambe a ku nga ri na laha a ku ndzi tsakisa.

NDZI DYONDZA MHAKA YA NKOKA NDZI NGA SWI LANGUTELANGA

Endzhaku ka malembe ya kwalomu ka mambirhi, ndzi hlangane ni makwerhu wa xisati loyi a ndzi pfuneke ndzi ehleketisisa hi vutomi bya mina handle ko swi xiya. Hi nkarhi wolowo, a ndzi tshama ni vamakwerhu va ntlhanu va xisati lava nga tekiwangiki kutani hi rhambe mulanguteri wa muganga ni nsati wakwe Tamara, va ta tshama na hina ku ringana vhiki. Loko mulanguteri wa muganga a ri bizi hi timhaka ta vandlha, Tamara a a tshama na hina hi tiphina hi mabulo hi tlhela hi hleka. Sweswo swi ndzi tsakisile. A a ri munhu wa vanhu. Swi ndzi tsakisile ku vona munhu loyi a tinyiketeleke entirhweni wa Yehovha, a tinyika nkarhi wo hungasa ni vanhu van’wana.

Tamara a a gingiriteka. A a ri xikombiso lexinene loko swi ta emhakeni ya ku rhandza ntiyiso ni nsimu. A a tirhela Yehovha a tsakile kambe mina a ndzi n’wi tirhela ndzi nga tsakanga. Mahanyelo yakwe lamanene ni ndlela leyi a a tsake hayona, swi ndzi khumbile swinene. U ndzi tsundzuxe mhaka yin’wana ya nkoka leyi nga eMatsalweni: Yehovha u lava leswaku hinkwerhu hi n’wi tirhela hi “tsakile” naswona hi ba “mikulungwana.”—Ps. 100:2.

NDZI TLHELA NDZI RHANDZA NSIMU

A ndzi lava ku tsaka ku fana na Tamara kambe leswaku ndzi kota ku endla tano, a ndzi fanele ndzi cinca vutomi bya mina. Swi teke nkarhi kambe ndzi hetelele ndzi teke goza. Ndzi sungule ku lunghiselela loko ndzi ya ensin’wini ni ku teka vuphayona bya nkarhinyana. Leswi swi endle leswaku ndzi nga ha chavi naswona ndzi ya ndzi titshemba. Leswi a ndzi tirhisa Bibele ngopfu ensin’wini, swi endle ndzi sungula ku rhandza nsimu. Swi nga si ya kwihi, ndzi sungule ku teka vuphayona bya nkarhinyana n’hweti ni n’hweti.

Ndzi sungule ku va ni vanghana vo hambanahambana lava a va rhandza ntiyiso naswona a va tirhela Yehovha hi mbilu hinkwayo. Va ndzi pfunile leswaku ndzi rhangisa swilo swa nkoka evuton’wini ni ku tlhela ndzi tinyika nkarhi wo dyondza Bibele siku ni siku. Sweswo swi endle ndzi ya ndzi yi rhandza ngopfu nsimu naswona ndzi hetelele ndzi teke vuphayona bya nkarhi hinkwawo. Eku heteleleni ndzi tlhele ndzi kuma ntsako ni ku titwa ndzi ri ekaya loko ndzi ri evandlheni.

NDZI KUMA PHAYONA LERI A NDZI TA TIRHA NA RONA VUTOMI HINKWABYO

Endzhaku ka lembe, ndzi hlangane na Alex, a a ri munhu wa kahle loyi a a rhandza Yehovha ni nsimu. A a ri nandza wa vutirheli naswona a a ri ni malembe ya tsevu a ri karhi a phayona. U tshame a tirha laha a ku ri ni xilaveko lexikulu, eMalawi. A a tirha nsimu ni varhumiwa lava n’wi khutazeke leswaku a rhangisa timhaka ta Mfumo wa Xikwembu evuton’wini.

Hi 2003, mina na Alex hi tekanile naswona a hi wu tshikanga ntirho wa nkarhi hinkwawo. Hi dyondze swo tala naswona Yehovha u hi katekisile swinene.

HI KUMA MIKATEKO LEYI ENGETELEKEKE

Hi 2009, hi komberiwe ku ya va varhumiwa eka xin’wana xa swihlala swa le Indonesia lexi vuriwaka Timor-Leste. Hi hlamarile, a hi tsakile hi tlhela hi chuha hi nkarhi wun’we. Endzhaku ka tin’hweti ta ntlhanu se a hi ri eDili, ku nga ntsindza wa xihlala xexo.

Vutomi bya kona a byi hambane ngopfu ni lebyi a hi byi toloverile. Se a hi boheka ku tolovela ndhavuko, ririmi, swakudya ni mahanyelo lamantshwa. Hakanyingi loko hi ri ensin’wini, a hi hlangana ni vanhu lava sweleke, va nga dyondzekangiki ni lava xanisiwaka. Nakambe a hi hlangana ni vanhu vo tala lava nga ni swivati ni lava vaviseke emoyeni hikwalaho ka nyimpi ni madzolonga.a

Nsimu ya kona a yi tsakisa swinene! Hi xikombiso, ndzi tshame ndzi hlangana ni xinhwanyatana xin’wana lexi a xi ri na 13 wa malembe lexi vuriwaka Maria naswona a xi twerisa vusiwana swinene.b Mana wa xona a ha ku lova eka malembe ma nga ri mangani lawa a ma ha ku hundza naswona a swi teka nkarhi ku va xi vona bava wa xona. Ku fana ni tintangha takwe, Maria a a nga swi tivi leswaku u lava yini evuton’wini. Ndzi tsundzuka siku rin’wana loko a tiphofula eka mina a ri karhi a rila. Kambe a ndzi nga swi twisisi leswi a a swi vula hikuva a ndzi nga si ri tiva kahle ririmi rakwe. Ndzi khongele eka Yehovha, ndzi kombela leswaku a ndzi pfuna ndzi kota ku khutaza Maria kutani ndzi sungule ku n’wi hlayela matsalwa lama khutazaka. Eka malembe ma nga ri mangani lama landzeleke, ndzi vone ntiyiso wu cinca vutomi byakwe. U sungule ku tsaka ni ku hanya vutomi lebyi nga ni xikongomelo. U khuvuriwile naswona sweswi u ni swichudeni leswi a swi dyondzisaka Bibele. Namuntlha, Maria u le ndyangwini lowu tsakeke wa Yehovha naswona u tsakile.

Yehovha wa wu katekisa ntirho wo chumayela lowu endliwaka eTimor-Leste. Hambileswi vahuweleri vo tala va khuvuriweke eka malembe ya khume lama hundzeke, vo tala i maphayona, malandza ya vutirheli kumbe vakulu. Van’wana va tirha ehofisini ya vuhundzuluxeri naswona va hoxa xandla eku hundzuluxeleni ka mikandziyiso leyi sekeriweke eBibeleni hi tindzimi ta kwalaho. Swa ndzi tsakisa ku va vona va yimbelela etinhlengeletanweni ta vandlha, va n’wayitela ni ku vona ndlela leyi va rhandzaka Yehovha hayona.

NDZI TIPHINILE HI VUTOMI

Vutomi bya le Timor-Leste a byi hambane ngopfu ni bya le Australia kambe ndzi tiphinile swinene. Mikarhi yin’wana, a hi famba hi bazi leri nga lo hontlo hi vanhu lava a va tamele tinhlampfi leti omisiweke ni swichocho swa miroho leyi va yi xaveke emakete. Masiku man’wana, a hi dyondzisa vanhu Bibele etindlwini ta vona leti a ti ri tintsongo, ti thyakile, tihuku ti ri karhi ti ya hala ni hala naswona dyambu a ri hisa swinene. Ku nga khathariseki mitlhontlho yoleyo, a ndzi tibyela leswi, ‘Vutomi bya tsakisa!’

Ndza va khensa vatswari va mina leswi va weke va pfuna leswaku va ndzi dyondzisa hi Yehovha va tlhela va ndzi seketela loko vuxaka bya mina na Yehovha byi sungula ku tsekatseka loko ndzi nghena emalembeni ya vuntshwa. Swivuriso 22:6 yi ndzi pfunile swinene. Vatswari va mina va tinyungubyisa hi mina na Alex naswona va tsaka loko va vona ndlela leyi Yehovha a hi tirhisaka hayona. Ku sukela hi 2016, hi komberiwe ku va valanguteri va muganga eAustralia ni le New Zealand.

A ndzi tshembi leswaku hi mina loyi ndzi tshameke ndzi nga wu rhandzi ntirho wo chumayela. Se ndza yi rhandza nsimu! Ndzi swi vonile leswaku ku nga khathariseki swiyimo leswi hi hlanganaka na swona evuton’wini kambe ntsako wa xiviri, u ta wu kuma ntsena loko u tirhela Xikwembu hi mbilu hinkwayo. Ndzi tiphinile swinene hi vutomi eka malembe ya 18 lama hundzeke, lawa ndzi ma heteke na Alex hi ri karhi hi tirhela Yehovha. Sweswi ndzi ma twisisa kahle marito lawa mupisalema Davhida a ma byeleke Yehovha a ku: “Hinkwavo lava tumbelaka eka wena va ta tsaka; va ta tshamela ku ba mikulungwana. . . . Naswona lava rhandzaka vito ra wena va ta tsaka.”—Ps. 5:11.