NDLELA YO HERISA RIVENGO

3 | Tsuvula Rivengo Emiehleketweni Ya Wena

Leswi Bibele Yi Swi Dyondzisaka:

“Mi hundzuka mi cinca ndlela leyi mi anakanyaka ha yona, leswaku mi ta tiyiseka hi ku rhandza ka Xikwembu loku nga kunene, loku amukelekaka ni loku hetisekeke.”—VARHOMA 12:2.

Leswi Swi Vulaka Swona:

Ndlela leyi hi ehleketaka hayona i ya nkoka eka Xikwembu. (Yeremiya 17:10) Loko ha ha fanele hi lwa hi matimba leswaku hi tshika rivengo kumbe ku vula marito yo kombisa rivengo, ku ni swin’wana leswi hi nga swi endlaka. Rivengo ri sungula embilwini ni le miehleketweni. Hikwalaho, swi lava hi ri tsuvula etimbilwini ni le miehleketweni ya hina. Sweswo swi ta hi pfuna leswaku hi “hundzuka” ivi hi tsuvula moya wa rivengo.

Leswi U Nga Swi Endlaka:

Ehleketa kahle hi ndlela leyi u titwaka hayona hi vanhu lava humaka ematikweni man’wana kumbe va tinxaka tin’wana. Tivutise: ‘Xana ndzi va languta njhani? Xana ndzi va khoma hi ndlela leyi kombisaka leswaku ndzi tiva swo karhi swo biha hi vona? Kumbe hikwalaho ka mavonelo ya van’wana hi vona?’ Papalata ti-social media, tifilimi kumbe vuhungasi lebyi hlohlotelaka moya wa rivengo.

Rito ra Xikwembu ri nga hi pfuna ku tsuvula rivengo leri nga etimbilwini ni le miehleketweni ya hina

A hi mikarhi hinkwayo swi olovaka ku yi cinca hi ku hatlisa ndlela leyi hi titwaka hayona hi vanhu van’wana. Kambe Bibele yi nga swi kota ku hi pfuna hi cinca “miehleketo ni makungu ya mbilu” ya hina. (Vaheveru 4:12) Hikwalaho, yana emahlweni u hlaya Bibele. Pimanisa leswi Bibele yi swi dyondzisaka ni ndlela leyi u ehleketaka hayona ivi endzhaku u tidyondzisa ku ehleketa hi ndlela leyi tsakisaka Xikwembu. Rito ra Xikwembu ri nga swi kota ku hi pfuna hi hlula rivengo leri ri “simekiweke” ri tiya emiehleketweni ni le timbilwini ta hina.—2 Vakorinto 10:4, 5.

Swikombiso Swa Manguva Lawa—STEPHEN

U Cince Ndlela Leyi A A Ehleketa Hayona

Stephen ni swirho swa ndyangu wakwe a va vengiwa swinene hi valungu. Sweswo swi n’wi kucetele ku joyina ntlawa wa tipolitiki lowu a wu lwela timfanelo ta vanhu. Mikarhi yo tala a hoxa xandla eka madzolonga lawa a ma vangiwa hi rivengo. U ri: “Siku rin’wana mina ni vanghana va mina hi hlalele filimi leyi a yi kombisa ndlela leyi mahlonga ya le Afrika a ma xanisiwa hayona eUnited States. Hikwalaho ko kwata, hi hlasele vantshwa va valungu lava a hi hlalela na vona filimi. Hi suke kwalaho hi ya emugangeni lowu a ku tshama valungu leswaku hi ya va ba.”

Kambe loko Stephen a sungula ku dyondza Bibele ni Timbhoni ta Yehovha u cincile. U ri: “Leswi ndzi kuleke ndzi ri karhi ndzi vona rivengo, ndzi hlamarise hi ndlela leyi Timbhoni ti khomanaka hayona. Hi xikombiso, loko Mbhoni leyi nga mulungu yi lava ku endzela etikweni rin’wana, a yi siya vana va yona va hlayisiwa hi ndyangu lowu nga vantima. Hambi ku ri vona valungu va teke vana va vantima lava nga riki na makaya leswaku va ya va hlayisa.” Stephen u tivonele hi ya yena leswaku Timbhoni ta Yehovha i ndyangu wun’we lowu nga ni rirhandzu, sweswo swi n’wi pfune a twisisa marito ya Yesu lama vulaka leswaku Vakreste va ntiyiso a va ta vonaka hi rirhandzu.—Yohane 13:35.

Stephen u pfuniwe hi yini leswaku a tshika madzolonga ni rivengo? U pfuniwe hi tsalwa ra Varhoma 12:2. U ri: “Ndzi sungule ku xiya leswaku a ndzi fanele ndzi cinca ndlela leyi a ndzi ehleketa hayona. A ndzi fanele ndzi tshika madzolonga ivi ndzi dyondza leswaku ku hanya hi ku rhula hi swona leswi nga ndzi pfunaka ndzi hanya vutomi byo tsakisa.” Se swi endla malembe lama tlulaka 40 Stephen a ri karhi a tiphina hi ku hanya vutomi lebyi nga riki na rivengo.