NDLELA YO HERISA RIVENGO

2 | U Nga Tlheriseli

Leswi Bibele Yi Swi Dyondzisaka:

“Mi nga tlheriseli swo biha hi swo biha eka van’wana. . . . Loko swi koteka, vanani ni ku rhula ni vanhu hinkwavo. Mi nga rihiseli, . . . hikuva ku tsariwile: ‘“Hi mina ndzi nga ta rihisela; ndzi ta va xupula,” ku vula Yehovha.’”—Varhoma 12:17-19.

Leswi Swi Vulaka Swona:

I swa ntumbuluko ku twa ku vava loko un’wana a hi endlele swilo swo biha kambe Xikwembu a xi swi lavi leswaku hi tlherisela. Xi hi khutaza leswaku hi rindza hikuva ku nga ri khale xi ta herisa vubihi hinkwabyo.—Pisalema 37:7, 10.

Leswi U Nga Swi Endlaka:

Loko vanhu va tlherisela, swi hangalasa rivengo. Hikwalaho, loko un’wana a ku twise ku vava, u nga tlheriseli. Ringeta ku lawula ndlela leyi u titwaka hayona kutani u angula hi ndlela yo rhula. Mikarhi yin’wana swi ta va kahle ngopfu ku swi ba hi makatla leswi endlekeke. (Swivuriso 19:11) Kambe mikarhi yin’wana i swinene ku vika hi leswi swi endlekeke. Hi xikombiso, loko u xanisiwile hi vugevenga byo karhi, u nga vika mhaka yoleyo emaphoriseni kumbe eka lava nga ni vulawuri.

Ku venga van’wana swi ta vavisa wena n’wini

U nga endla yini loko u vona onge a wu yi kumi ndlela yo lulamisa mholovo yo karhi hi ku rhula? Xana u nga endla yini loko u ringeta ku yi lulamisa hi ndlela yo rhula kambe u tsandzeka? U nga tlheriseli hikuva sweswo swi nga nyanyisa xiyimo. Kambe lwana hi matimba leswaku u hlula moya wa rivengo. Tirhisa tindlela ta Xikwembu leswaku u lulamisa timholovo. “Titshege hi yena, u ta ku pfuna.”—Pisalema 37:3-5.

Swikombiso Swa Manguva Lawa—ADRIÁN

U Hlule Moya Wa Ku Tlherisela

Loko a ha ri ntsongo, Adrián a a ri ni madzolonga ni rivengo naswona a tiyimisele ku vavisa lava n’wi twiseke ku vava. U ri: “A ndzi tshamela ku katseka eka nyimpi ya swibamu naswona mikarhi yo tala a ndzi siyiwa ndzi tlele endleleni ndzi ri karhi ndzi khuluka ngati, ndzi ri ekusuhi ni ku fa!”

Kambe loko Adrián a ri ni malembe ya 16, u sungule ku dyondza Bibele. U ri: “Loko ndzi ya ndzi dyondza Bibele, ndzi xiye leswaku a swi lava ndzi cinca mahanyelo ya mina.” A fanele a tshika rivengo ni madzolonga. U swi tlangerile leswi a swi dyondzeke eka Varhoma 12:17-19 mayelana ni ku nga tlheriseli. U ri: “Ndzi dyondze leswaku Yehovha hi yena loyi a nga ta tlherisela hi nkarhi wakwe eka lava khomaka van’wana hi ndlela yo biha. Ndzi tshike madzolonga hakatsongotsongo.”

Siku rin’wana ni madyambu, Adrián u hlaseriwe hi ntlawa wa majaha lawa a tshameke a lwa na wona. Boso ya ntlawa wolowo yi te: “Lwana leswaku u tisirhelela!” Adrián u ri: “A ndzi lava ku lwa.” Kambe a nga lwanga, u khongele eka Yehovha hi mbilu kutani a suka laha a ku ri ni majaha wolawo.

Adrián u engeta a ku: “Hi siku leri landzeleke, ndzi hlangane ni boso ya ntlawa lowu ndzi hlaseleke. A ndzi kwate ngopfu lerova ndzi lava ku ya lwa na yona kambe ndzi tlhele ndzi khongela eka Yehovha hi mbilu leswaku a ndzi pfuna ndzi nga lwi na yona. Lexi ndzi hlamariseke, yi te eka mina ivi yi fika yi ku: ‘Ndzi kombela u ndzi rivalela eka leswi hi ku endleleke swona tolo nimadyambu. Ku ku byela ntiyiso, na mina ndza swi lava ku fana na wena. Ndzi lava ku dyondza Bibele.’ A ndzi tsake ngopfu hikuva ndzi kote ku lawula ku hlundzuka ka mina! Ndza swi khensa leswi endlekeke hikuva hi sungule ku dyondza swin’we Bibele.”