NDLELA YO HLULA RIVENGO

1 | U Nga Vi Na Xihlawuhlawu

Leswi Bibele Yi Swi Dyondzisaka:

“Xikwembu a xi na xihlawuhlawu, kambe eka tiko rin’wana ni rin’wana munhu loyi a xi chavaka a tlhela a endla leswinene wa amukeleka eka xona.”—MITIRHO 10:34, 35.

Leswi Swi Vulaka Swona:

Yehovhaa Xikwembu a nga hi avanyisi hi ku ya hi rixaka, ndhavuko, muvala kumbe tiko leri hi humaka eka rona. Kambe u languta nchumu wa nkoka, ku nga timbilu ta hina. I ntiyiso leswaku “munhu u vona ntsena leswi voniwaka hi matihlo, kambe Yehovha u vona leswi nga embilwini.”—1 Samuwele 16:7.

Leswi U Nga Swi Endlaka:

Hambileswi hi nga ti tiviki timbilu ta vanhu kambe hi nga tekelela Xikwembu hi ku papalata ku va ni xihlawuhlawu. Tikarhatele ku vona leswinene eka vanhu, ku nga ri ku va teka tanihi va ntlawa wo karhi. Loko u titwa u nga va rhandzi vanhu va rixaka ro karhi kumbe tiko rin’wana, khongela u kombela Xikwembu xi ku pfuna u tshika ku titwa tano. (Pisalema 139:23, 24) Loko u khongela eka Yehovha hi mbilu hinkwayo leswaku a ku pfuna u hlula xihlawuhlawu, tiyiseka leswaku u ta yingisa swikhongelo swa wena naswona u ta ku pfuna u xi hlula.—1 Petro 3:12.

a Yehovha i vito ra Xikwembu.—Pisalema 83:18.

“A ndzi nga se tshama ndzi va ni ku rhula ni mulungu . . . Sweswi se a ndzi titwa ndzi ri xirho xa vamakwerhu lava nga ni vun’we emisaveni hinkwayo.”—TITUS

Swikombiso Swa Manguva Lawa—TITUS

U Hlule Rivengo

Titus a a ri xirho xa ntlawa lowu nga ni madzolonga lowu a wu lwisana ni milawu leyi a yi vekiwile ya xihlawuhlawu. U ri: “A hi ya etihotela ni le tibarheni laha vantima a va nga pfumeleriwi, a hi yela ntsena ku ya pfuxa nyimpi.” Titus wa pfumela leswaku a endla sweswo hi mhaka ya rivengo, u ri: “Loko ndzi sungula ku holova ni munhu un’wana ni un’wana swi nga ri na mhaka leswaku i wa xinuna kumbe wa xisati, a ku ri mina wo rhanga ndzi gandha.

Titus u cince vumunhu byakwe loko a sungula ku dyondza Bibele ni Timbhoni ta Yehovha. Ku hlaya Bibele swi n’wi pfune ku cinca mahanyelo yakwe. U khumbiwe ngopfu hi xitshembiso xa misava leyintshwa laha ‘rifu, hambi ku ri nkosi, ku rila ni switlhavi swi nga ta va swi nga ha ri kona.’—Nhlavutelo 21:3, 4.

Eku sunguleni a swi n’wi tikela ku tshika rivengo. U ri: “A swi tika swinene ku cinca ndlela leyi a ndzi hanya hayona.” U pfuniwe hi tsalwa ra Mitirho 10:34, 35 leri vulaka leswaku Xikwembu a xi na xihlawuhlawu.

Xana vuyelo byi ve byihi? Loko Titus a hlamusela u ri: “Ndzi ye ndzi tshemba leswaku hakunene Timbhoni ta Yehovha i vukhongeri bya ntiyiso loko ndzi vona ndlela leyi ti rhandzanaka hayona swi nga ri na mhaka leswaku i va muxaka wihi kumbe muhlovo wihi. Loko ndzi nga se khuvuriwa leswaku ndzi va Mbhoni, mulungu un’wana loyi a hi nghena na yena eHolweni ya Timbhoni, u ndzi rhambe ekaya rakwe leswaku hi ta dya swin’we. A ndzi twa onge ndzo lorha. A ndzi nga se tshama ndzi va ni ku rhula ni mulungu kambe sweswi a hi dya swin’we swakudya ekaya rakwe. Sweswi se a ndzi titwa ndzi ri xirho xa vamakwerhu lava nga ni vun’we emisaveni hinkwayo.”