Ehleketisisa Hi Tinhlankulu

Xana swi tshame swi ku tikela ku tsundzuka leswi wa ha ku swi dyondzaka? Hinkwerhu swa hi endlekela sweswo mikarhi yin’wana. I yini leswi nga ku pfunaka? Ehleketisisa hi tinhlankulu.

Loko u ri karhi u dyondza, nkarhi ni nkarhi yima ivi u anakanyisisa hi swilo swa nkoka leswi u swi dyondzaka. Vona ndlela leyi muapostola Pawulo a va pfuneke hayona lava a va ta hlaya papila rakwe ku endla leswi loko a tsala a ku: “Leswi hi ringetaka ku swi vula hi leswaku.” (Hev. 8:1) Hi marito wolawo, u pfune vayingiseri vakwe leswaku va fambisana ni leswi a a swi vula ni ku twisisa ndlela leyi yinhla ha yin’we yi fambisanaka hayona ni nhlokomhaka yakwe.

Loko u heta ku dyondza, u nga ha tinyika nkarhi kumbexana timinete ta khume wo anakanyisisa hi tinhla ta nkoka ta leswi u swi dyondzeke. Loko u nga ha ti tsundzuki, languta tinhlokomhaka letitsongo kumbe xivulwa xo sungula xa ndzimana yin’wana ni yin’wana leswaku ti ku tsundzuxa. Loko u dyondze swilo leswintshwa, ringeta ku swi hlamusela hi marito ya wena. Loko u ri karhi u kambisisa tinhla ta nkoka, a ti nge ku pfuni leswaku u tshama u ri karhi u ti tsundzuka ntsena kambe ti ta ku pfuna u vona ndlela leyi u nga ti tirhisaka hayona evuton’wini bya wena.