Swivutiso Swa Vahlayi

Xana mutsari wa Swivuriso 30:​18, 19 a a vula yini loko a ku “ndlela ya jaha loko ri ri ni nhwanyana” a yi ‘twisiseki’?

Vanhu vo tala va pfilunganyiwe hi marito ya tindzimana leti ku katsa ni swidyondzeki swin’wana. Eka Bibele—Matsalwa Yo Kwetsima Ya Misava Leyintshwa, ndzimana leyi yi hlayekisa xi leswi: “Ku ni swilo swinharhu leswi ndzi hlamarisaka swinene [kumbe “ndzi nga swi twisisiki,” nhlamuselo ya le hansi.] ni mune wa swona leswi ndzi nga swi twisisiki: Ndlela ya gama ematilweni, ndlela ya nyoka eribyeni, ndlela ya xikepe exikarhi ka lwandle ni ndlela ya jaha loko ri ri ni nhwanyana.”—Swiv. 30:​18, 19.

Khale a hi ehleketa leswaku xiga lexi nge, “ndlela ya jaha loko ri ri ni nhwanyana” a xi nga vulavuli hi nchumu lowunene. Hikwalahokayini? Hikuva tindzimana tin’wana eka ndzima leyi ti vulavula hi swilo swo biha. (Swiv. 30:​15, 16) Nakambe ndzimana 20 yi vulavula hi “wansati la oswaka” loyi a vulaka leswaku a nga oswanga. Hikwalaho, a hi ehleketa leswaku ku fana ni gama leri nga eku haheni, nyoka leyi fambaka eribyeni ni xikepe xa khale lexi fambaka elwandle, jaha ri nga pfalapfala mitirho ya rona yo biha lerova ku sala ku nga ha ri na vumbhoni. Hikwalaho, a hi ehleketa leswaku xiga lexi nge, “ndlela ya jaha loko ri ri ni nhwanyana” xi vulavula hi nchumu wo biha lowu endliwaka hi jaha leri wongaka nhwanyana loyi a nga riki na ntokoto leswaku a etlela na rona.

Hambiswiritano, hi ni xivangelo lexi twalaka lexi endlaka hi twisisa leswaku ndzimana leyi, yi vulavula hi swilo leswinene. Entiyisweni mutsari wa buku leyi, a a hlamarisiwa hi leswi a swi vuleke eka tindzimana teto.

Matsalwa ya Xiheveru ma seketela mhaka ya leswaku ndzimana leyi, yi vulavula hi swilo leswinene. Hi ku ya hi buku ya Theological Lexicon of the Old Testament, rito ra Xiheveru leri hundzuluxeriweke ri va “hlamarisaka swinene” eka Swivuriso 30:18 “ri vula nchumu lowu munhu a wu tekaka wu nga tolovelekanga, wu hlamarisa kumbe wu nga koteki.”

Profesa Crawford H. Toy wa le Yunivhesiti ya Harvard eUnited States na yena u gimete hi ku vula leswaku ndzimana leyi ya Bibele a yi vulavuli hi swilo swo biha. U te: “Yinhla hi leswaku ku kandziyisiwa ndlela leyi swilo leswi swi boxiweke swi hlamarisaka hayona.”

Swi vonaka swi twala ku vula leswaku marito lama nga eka Swivuriso 30:​18, 19 ma hlamusela swilo swo hlamarisa swinene leswi hi nga taka hi nga koti ku swi twisisa. Ku fana ni mutsari wa Bibele, na hina hi hlamarisiwa hi ndlela leyi gama ri hahaka hayona, nyoka yi khandziyaka emaribyeni hi ku hatlisa hambileswi yi nga riki na milenge, xikepe lexi rhwaleke nhundzu yo tika xi kotaka ku famba elwandle ni ndlela leyi jaha ni nhwana va nga rhandzanaka hayona ni ku tlhela va tiphina hi vutomi swin’we.