Swivutiso Swa Vahlayi
I “miehleketo” yihi leyi Yehovha a nga ta yi nghenisa etimbilwini ta matiko ku nga ri khale?
Mayelana ni ku sungula ka nhlomulo lowukulu, Nhlavutelo 17:16, 17 (Vuhundzuluxeri Bya Misava Leyintshwa, bi12) yi ri: “Timhondzo ta khume leti u ti voneke, ni xivandzana, ti ta venga nghwavava, ti yi hlakata ni ku yi swerisa, ti dya tinyama ta yona hinkwato ni ku yi hisa hi ndzilo yi hela. Hikuva Xikwembu xi swi nghenise etimbilwini ta tona leswaku ti endla miehleketo ya xona, ku nga ku endla miehleketo ya tona yinwe hi ku nyika xivandzana mfumo wa tona.” Enkarhini lowu hundzeke, mikandziyiso ya hina a yi vula leswaku “miehleketo” ya Yehovha leyi a nga ta yi nghenisa etimbilwini ta matiko, i ya leswaku ma herisa vukhongeri bya mavunwa.
Hambiswiritano, matwisiselo lawa ma fanele ma antswisiwa. “Miehleketo” leyi Yehovha a nga ta yi hoxa etimbilwini ta matiko, i ya leswaku ma nyika ‘xivandzana mfumo wa wona.’ Leswaku hi twisisa ndlela leyi leswi swi nga ta hetiseka hayona, xiya swivutiso leswi landzelaka.
Ku vulavuriwa hi vamani eka vuprofeta lebyi? “Nghwavava” yi tlhela yi vitaniwa “Babilona Lonkulu,” ku nga mfumo wa misava wa vukhongeri bya mavunwa. “Xivandzana xo tshwuka” xi yimela nhlangano wa ku rhula lowu sunguleke ku tirha hi 1919, tanihi Ntwanano wa Matiko lowu sweswi ku nga Nhlangano wa Matiko. (Nhlav. 17:3-5) Kasi “timhondzo ta khume” ti yimela mifumo hinkwayo leyi seketelaka xivandzana.
Hi byihi vuxaka lebyi nga kona eka nghwavava ni xivandzana xo tshwuka? Se swi na nkarhi nghwavava yi “gade” xivandzana yi ri karhi yi xi katekisa, yi ringeta ku xi kucetela hambi ku ri ku xi lawula.
Xana ku ta endleka yini eka nghwavava? Xivandzana ni timhondzo ta khume leti xi seketelaka “swi ta venga nghwavava.” Hikwalaho ka leswi swi yi vengaka, swi ta phanga rifuwo ra yona ni ku tlhela swi paluxa vuhomboloki bya yona. Swi ta yi avanyisa hilaha Yehovha a vuleke hakona, ku nga leswaku yi ta loviseriwa makumu. (Nhlav. 17:1; 18:8) Koloko ku ta va ku ri ku herisiwa ka vukhongeri bya mavunwa. Hambiswiritano, loko sweswo swi nga si endleka, Yehovha u ta endla leswaku matiko ma endla nchumu lowu nga si tshamaka wu endliwa ematin’wini hinkwawo ya ku fuma ka vanhu.
Xana Yehovha u ta endla leswaku matiko ma endla yini? U ta nghenisa ‘miehleketo ya yena’ etimbilwini ta timhondzo ta khume, ya leswaku “ti nyika xivandzana matimba yo fuma” ku nga Nhlangano wa Matiko. (Nhlav. 17:13) Ehleketa hileswi sweswo swi vulaka swona. Xana mifumo ya vanhu yi to na swi pfuketana yi nyika xivandzana matimba ni vulawuri bya yona? Doo! Vuprofeta byi komba leswaku Xikwembu hi xoxe xi ta endla leswaku matiko ma endla sweswo. (Swiv. 21:1; ringanisa Esaya 44:28.) Xana leswi swi ta endleka hakatsongotsongo? Doo! Swi ta endleka hi ku tsopeta ka tihlo. Endzhaku ka sweswo, xivandzana lexi lexi nyikiweke matimba xi ta endla leswi Yehovha a swi lavaka, ku nga ku yi herisela makumu mihlangano ya vukhongeri bya mavunwa.
Xana hi nga langutela leswaku ku endleka yini? A hi fanelanga hi langutela ku twa swiviko swa leswaku hakatsongotsongo mifumo yi le ku seketeleni ka Nhlangano wa Matiko. Kambe hi nga langutela leswi: Hi ku tsopeta ka tihlo, Yehovha u ta endla leswaku matiko ma nyika xivandzana matimba ya wona. Loko sweswo swi endleka, hi ta swi tiva leswaku nhlomulo lowukulu wu le kusuhi ni ku sungula. Hikwalaho, “a hi tshameni hi xalamukile” hikuva swilo swi ta cinca hi xitshuketa ku nga ri khale!—1 Tes. 5:6.