Hikwalahokayini Tipolitiki Ti Endla Vanhu Va Avana?—Xana Bibele Yi Ri Yini Hi Mhaka Leyi?

Emisaveni hinkwayo, matiko yo tala ma avanile eka swa tipolitiki. Eka ndzavisiso lowu endliweke hi nhlangano wa Pew Research Center hi 2022, ku kumiwe leswaku “tiphesente ta 65 ta vanhu lava kuleke lava nga ematikweni ya 19, va vula leswaku ku na ku nga twani lokukulu ka vanhu lava seketelaka mihlangano yo hambanahambana ya tipolitiki.”

Xana u swi xiyile leswaku laha u tshamaka kona, vanhu vo tala va avanile hikwalaho ka tipolitiki? Xana sweswo swi vangiwa hi yini? Xana xi kona xitshunxo? Xiya leswi Bibele yi swi vulaka.

Leswi vangaka ku avana

Bibele yi profete leswaku enkarhini wa hina lowu vuriwaka ‘masiku yo hetelela,’ vanhu vo tala a va ta va ni mahanyelo lawa a ma ta endla swi tika leswaku va va ni vun’we.

•  “Emasikwini yo hetelela ku ta fika mikarhi yo nonon’hwa leyi swi tikaka ku hanya eka yona. Hikuva vanhu va ta va lava tirhandzaka, . . . lava nga tiyimiselangiki ku pfumelelana ni van’wana.”—2 Timotiya 3:1-3.

Hambileswi vanhu vo tala va tirhaka hi matimba ku endlela leswaku mifumo yi humelela kambe a ku na nhlanga leyi humaka ngati. Vanhu lava nga voniki timhaka hi tihlo rin’we swa va tikela ku khomisana leswaku va lulamisa swiphiqo. Mhaka leyi yi tiyisekisa leswi Bibele yi swi vuleke khale.

•  “Munhu u fuma munhu un’wana ku n’wi endla swo biha.”—Eklesiasta 8:9.

Hambiswiritano, Bibele yi hi byela hi lexi nga ta va xitshunxo, ku nga Mfumo lowu nga ta rhangeriwa hi un’wana loyi a nga ta herisa swiphiqo leswi endlaka vanhu va xaniseka namuntlha.

Hosi leyi khathalaka yi tlhela yi faneleka

Bibele yi vula leswaku ku ni murhangeri loyi a fanelekaka kahle: Yesu Kreste. Yesu u ni matimba ni vulawuri naswona u lava leswaku vanhu hinkwavo va va ni vun’we ni ku rhula.

• Lowo lulama u ta hluka hi nkarhi wa ku fuma ka yona, ku ta va ni ku rhula.”—Pisalema 72:7.

•  “Matiko hinkwawo ma ta yi tirhela.”—Pisalema 72:11.

Yesu i murhangeri lonene naswona wa khathala, u lava ku pfuna vanhu ngopfungopfu lava khomiwaka hi ndlela yo biha.

•  “Yi ta pfuna swisiwana leswi kombelaka mpfuno, ni lava pfumalaka ni un’wana ni un’wana la nga riki na mupfuni. Yi ta va ni musa eka swisiwana ni lava pfumalaka, yi ta sirhelela vutomi bya swisiwana. Yi ta swi ponisa eku tshikileriweni ni le madzolongeni.”—Pisalema 72:12-14.

Dyondza swo tala mayelana ni Mfumo wa Xikwembu, ku nga hulumendhe ya le tilweni leyi rhangeriwaka hi Yesu. Kuma ndlela leyi u nga vuyeriwaka hayona eka wona ni ku tlhela u wu seketela.

•  Hlalela vhidiyo leyi nge, Mfumo Wa Xikwembu I Yini?

•  Hlaya nhlokomhaka leyi nge, “Mfumo Wa Xikwembu—Hulumendhe Leyi Nga Riki Na Vukanganyisi.”