Vuhlayiseki Bya Vavasati—Leswi Bibele Yi Swi Vulaka

“Loko ndza ha ri ntsongo, buti a tshamela ku ndzi ba ni ku ndzi tlhava hi marito siku rin’wana ni rin’wana. Loko se ndzi tekiwile, n’wingi wa mina wa xisati u ye emahlweni a ndzi xanisa. Yena ni n’wingi wa mina wa xinuna va ndzi khome onge ndzo va hlonga. A ndzi lava ni ku tidlaya.” —Madhu,a India.

Nhlangano Wa Rihanyo Wa Misava Hinkwayo wu ri: “Ku xanisiwa ka vavasati ku tinyike matimba emisaveni hinkwayo.” Wu ringanyeta leswaku wansati un’we eka vavasati vanharhu evuton’wini byakwe wa biwa kumbe ku xanisiwa hi swa masangu.

Loko sweswo swi tshame swi ku endlekela, u nga titwa u ri ekhombyeni ro xanisiwa hi marito, emirini kumbe hi swa masangu hinkwako laha u yaka kona. Hikwalaho ka ku xanisiwa koloko ka vavasati hi swa masangu ni ku khomiwa ku biha, u nga ha vona onge vanhu vo tala va ehleketa leswaku ‘Vavasati a va pfuni nchumu.’ Kambe xana vavasati i va nkoka eka Xikwembu?

Xikwembu xi va teka njhani vavasati?

Tsalwa: “[Xikwembu] xi vumba wanuna ni wansati.” —Genesa 1:27.

Nhlamuselo: Xikwembu xi vumbe vavanuna ni vavasati. Hinkwavo xi va teka va faneriwa hi ku xiximiwa. Ku tlula kwalaho, xi lava leswaku wanuna a “rhandza nsati wakwe hilaha a tirhandzaka hakona” ku nga ri ku ringeta ku n’wi lawula hi marito yo tlhava kumbe yo kariha. (Vaefesa 5:33; Vakolosa 3:19) Kahlekahle, vuhlayiseki bya vavasati i bya nkoka eka Xikwembu.

“Loko ndza ha ri ntsongo, maxaka ya ndzi xanisile hi swa masangu. Loko ndzi ri ni malembe ya 17, muthori wa mina u xungete ku ndzi hlongola loko ndzo ka ndzi nga etleli na yena. Loko se ndzi kurile, ndzi languteriwe ebodlheleni hi nuna wa mina, vatswari ni vaakelani. Kambe hi ku famba ka nkarhi ndzi dyondze hi Yehovhab Muvumbi. Wa va xixima vavasati. Leswi swi endle ndzi swi vona leswaku wa ndzi rhandza naswona ndzi wa nkoka eka yena.”—Maria, Argentina.

I yini leswi nga ku pfunaka leswaku u sungula ku hlakarhela?

Tsalwa: “Ku ni munghana loyi a tshembekaka ku tlula makwenu.”—Swivuriso 18:24.

Nhlamuselo: Munghana wa ntiyiso u ta ku seketela. Loko u vona onge swi ta ku pfuna, byela munhu loyi u n’wi tshembaka leswi u titwisaka xiswona.

“Malembe ya 20 hinkwawo a ndzi byelanga munhu leswaku ndzi pfinyiwile. Sweswo swi endle leswaku ndzi va ni gome, ndzi vilela ni ku tshikileleka. Kambe eku heteleleni, loko ndzi byele munhu loyi a tsakela ku yingisela leswi ndzi humeleleke, ndzi titwe ndzi tshunxekile swinene.”—Elif, Türkiye.

Tsalwa: ‘Lahlelani ku vilela ka n’wina hinkwako eka [Xikwembu], hikuva xa khathala hi n’wina.’—1 Petro 5:7.

Nhlamuselo: Xikwembu xa swi twa loko u khongela. (Pisalema 55:22; 65:2) Leswi xi nga ni ntwelavusiwana, xi nga ku pfuna u twisisa ndlela leyi u nga wa nkoka hayona.

“Ku dyondza hi Yehovha swi sungule ku ndzi pfuna ku hlakarhela eka swilondza leswikulu leswi a ndzi ri na swona. Sweswi ndzi nga khongela Xikwembu ndzi xi byela hinkwaswo leswi ndzi titwisaka xiswona. Xi fana ni munghana loyi a swi twisisaka kahle leswi ndzi titwisaka xiswona.”—Ana, Belize.

Xana Xikwembu xi ta ku herisa ku xanisiwa ka vavasati?

Tsalwa: “Yehovha . . . u ta lwela n’wana la nga riki na tatana ni lava tshikileriwaka, leswaku va nga ha chavisiwi hi munhu.”—Pisalema 10:​17, 18.

Nhlamuselo: Ku nga ri khale, Xikwembu xi ta herisa vuhomboloki hinkwabyo ku katsa ni tihanyi ni ku kariheriwa ka vavasati.

“Swi ndzi phyuphyisile ku tiva leswaku ku nga ri khale Yehovha u ta herisa ku xanisiwa ka vavasati ni tintombhi. Swi ndzi nyike ku rhula ka miehleketo.”—Roberta, Mexico.

Leswaku u dyondza leswi engetelekeke hi ndlela leyi Bibele yi nyikaka ntshembo hayona, ndlela leyi yi endlaka u tshemba switshembiso swa yona ni ndlela leyi Timbhoni Ta Yehovha ti nga ni nseketelo lowu humaka eBibeleni hayona namuntlha, kombela ku endzeriwa mahala.

Dawuniloda nkandziyiso lowu u nga kotaka ku wu printa wa nhlokomhaka leyi.