Xana Wu Kona Mfumo Lowu Tiyeke Lowu Nga Ta Fuma Misava?—⁠Bibele Yi Ri Yini Hi Mhaka Leyi?

Mifumo emisaveni hinkwayo yi tshamela ku langutana ni ku cinca lokukulu. Hambi ku ri matiko lama vonakaka onge ma hluvukile, mifumo ya wona yi langutana ni swiviko swo biha swa tipolitiki, minhlawulo leyi nga ni vukanganyisi, ku avana ka tipolitiki ni madzolonga lama vangiwaka hi vanhu lava toyatoyaka.

Bibele yi boxa leswaku ku ni mfumo wun’we ntsena lowu tiyeke. Kumbexana se u twile hi ta mfumo lowu. Hi lowu Yesu Kreste a vulavuleke ha wona eka xikhongelo xa hosi.

“Kutani mi fanele mi khongela hi ndlela leyi: ‘Tata wa hina la nga matilweni, vito ra wena a ri kwetsimisiwe. Mfumo wa wena a wu te. Ku rhandza ka wena a ku endleke emisaveni, hilaha ku endlekaka hakona ematilweni.’”—Matewu 6:9, 10.

Xana Bibele yi ri yini hi Mfumo wolowo?

Mfumo wolowo wu tiyile

Wu fuma wu ri etilweni.

Yesu u vule leswaku Mfumo wolowo i “Mfumo wa matilo.” (Matewu 4:17; 5:3, 10, 19, 20) Hikwalaho ka sweswo, u te: “Mfumo wa mina a hi xiphemu xa misava leyi.”—Yohane 18:36.

Mfumo wolowo wu ta siva mifumo ya vanhu.

Bibele yi ri: “Mfumo lowu . . . wu ta pfotlosa wu herisa mifumo leyi [ya vanhu] hinkwayo, kambe wona wu ta fuma hilaha ku nga heriki.”—Daniyele 2:44.

Leswi Yesu Kreste a nga ta va Hosi ya wona, a wu nge pfuki wu herisiwile.

Bibele yi ri: “U ta fuma hilaha ku nga heriki, mfumo wakwe a wu nge lovisiwi.”—Daniyele 7:13, 14.

Mfumo wolowo wu ta tisa ku rhula ni nsirhelelo emisaveni.

Bibele yi ri: “Munhu un’wana ni un’wana u ta titshamela endzhutini wa murhi wa yena wa vhinya kumbe wa nkuwa, ku ri hava loyi a n’wi chavisaka.”—Mikiya 4:4, Bibele Ya Mahungu Lamanene.

Dyondza leswi engetelekeke hi Mfumo wolowo

Loko Yesu a ha ri laha misaveni, u hete nkarhi wo tala a ri karhi a “chumayela mahungu lamanene ya Mfumo.” (Matewu 9:35) U tlhele a profeta a ku:

“Mahungu lawa lamanene ya Mfumo ma ta chumayeriwa emisaveni hinkwayo leswaku byi va vumbhoni ematikweni hinkwawo, kutani hi kona makumu ma nga ta fika.”—Matewu 24:14.

Namuntlha mahungu lamanene ya Mfumo ma le ku chumayeriweni ematikweni lama tlulaka 240. Ha ku rhamba leswaku u dyondza leswi engetelekeke hi Mfumo wolowo ni ndlela leyi u nga ta vuyeriwa hayona loko wu fuma.

Hi kombela u hlalela vhidiyo leyi nge, Mfumo Wa Xikwembu I Yini?