Xana Bibele Yi Nga Ndzi Pfuna Loko Ndzi Tshikilelekile?

Nhlamulo ya Bibele

Ina, hikuva mpfuno lowunene wu huma eka “Xikwembu lexi chavelelaka, xi khutazaka ni ku phyuphyisa lava tshikilelekeke.”​—2 Vakorinto 7:6, The Amplified Bible.

Leswi Xikwembu xi swi nyikelaka ku pfuna lava tshikilelekeke

• Matimba. Xikwembu xa ku ‘phyuphyisa ni ku ku khutaza’ ku nga ri hi ku susa swiphiqo swa wena hinkwaswo kambe hi ku hlamula swikhongelo swa wena loko u kombela matimba yo langutana na swona. (Vafilipiya 4:13) U nga tiyiseka leswaku wa ku yingisa hikuva Bibele yi ri: “Yehovha u le kusuhi ni lava va tshovekeke mbilu; Ni lava va pfotlokeke emoyeni wa va ponisa.” (Pisalema 34:18) Entiyisweni, Xikwembu xi nga ku twa hambiloko u nga swi koti ku hlamusela ndlela leyi u titwaka ha yona.​—Varhoma 8:26, 27.

• Swikombiso leswinene. Mutsari un’wana wa Bibele u khongele eka Xikwembu a ku: “Ndzi vitane eka wena ndzi ri evuentweni.” Mupisalema loyi, u kote langutane ni ku tshikileleka hi ku tsundzuka leswaku Xikwembu xa hi rivalela. U te: “Loko a wu languta swihoxo, i mani loyi a a ta yima? Hikuva u ni ndzivalelo wa ntiyiso, leswaku u ta chaviwa.”​—Pisalema 130:1, 3, 4, Bibele—Mahungu Lamanene.

• Ntshembo. Xikwembu xa hi chavelela sweswi naswona xi tshembisa ku herisa swiphiqo hinkwaswo leswi hi vangelaka ntshikilelo. Loko xi ta hetisisa xitshembiso xolexo, “swilo swo sungula a swi nge tsundzukiwi, hambi embilwini a swi nge ti.”—Esaya 65:17.

Xiya: Timbhoni ta Yehovha ta wu xiya mpfuno lowu Xikwembu xi wu nyikelaka kambe ti tlhela ti lava mpfuno exibedlhele malunghana ni vuvabyi byo tanihi bya ntshikilelo. (Marka 2:17) Kambe a hi khutazi munhu ku tirhisa vutshunguri byo karhi; munhu un’wana ni un’wana u fanele a tiendlela xiboho eka sweswo.