Xana Bibele Yi Nga Ndzi Pfuna Ku Hanya Ni Vuvabyi Lebyi Nga Tshungulekiki?

Nhlamulo ya Bibele

Ina. Xikwembu xa khathala hi malandza ya xona lama vabyaka. Loko Bibele yi vulavula hi nandza wo tshembeka yi ri: “Yehovha u ta n’wi seketela ehenhla ka mubedo wa vuvabyi.” (Pisalema 41:3) Loko u ri ni vuvabyi lebyi nga tshungulekiki, magoza manharhu lama landzelaka ma ta ku chavelela:

1. Khongelela matimba yo tiyisela. U nga kuma “ku rhula ka Xikwembu loku tlulaka miehleketo hinkwayo” loku nga ta hunguta ku karhateka naswona ku ku tiyisa.—Vafilipiya 4:6, 7.

2. Vana ni langutelo lerinene. Bibele yi ri: “Ku tsaka ka mbilu swi tshungula miri. Ku khunguvanyeka, swi heta matimba.” (Swivuriso 17:22, Bibele—Mahungu Lamanene) Vana la tsakeke hikuva sweswo swi ta ku pfuna loko minkarhi yin’wana swi tika naswona swi ta ku pfuna eka rihanyo ra wena.

3. Vana ni ntshembo eka vumundzuku lebyi hi tshembisiweke byona. Ntshembo lowu, wu ta ku pfuna u tsaka hambileswi u vabyaka. (Varhoma 12:12) Bibele yi vulavula hi nkarhi lowu ku nga riki na “munhu la tshamaka kona la nga ta ku: ‘Ndza vabya.’” (Esaya 33:24) Hi nkarhi wolowo, Xikwembu xi ta tshungula vuvabyi hinkwabyo lebyi nga tshungulekiki. Hi xikombiso, loko Bibele yi hlamusela ku herisiwa ka vudyuhari yi ri: “Nyama yakwe a yi ve yintshwa ku tlula evuntshweni; A a vuyele emasikwini ya matimba yakwe ya vuntshwa.”—Yobo 33:25.

Xiya: Timbhoni ta Yehovha ta wu xiya mpfuno lowu Xikwembu xi wu nyikelaka kambe ti tlhela ti lava mpfuno exibedlhele malunghana ni vuvabyi bya ntshikilelo. (Marka 2:17) Kambe a hi khutazi munhu ku tirhisa vutshunguri byo karhi; munhu un’wana ni un’wana u fanele a tiendlela xiboho eka sweswo.