I Yini Leswi Bibele Yi Swi Vulaka Malunghana Ni Ku Pomperiwa Ngati?

Nhlamulo ya Bibele

Bibele yi lerisa leswaku hi nga dyi ngati. Hikwalaho, a hi fanelanga hi amukela ngati kumbe swiaki swa yona swa xisekelo hambi ku ri hi tindlela tin’wana, to tanihi ku yi dya kumbe ku pomperiwa yona. Xiya Matsalwa lama landzelaka:

• Genesa 9:4. Endzhaku ka Ndhambi, Xikwembu xi pfumelele Nowa ni ndyangu wakwe leswaku va dya nyama ya swiharhi kambe xi va lerise leswaku va nga dyi ngati ya swona. Xi byele Nowa xi ku: “Ntsena nyama leyi nga ni moya-xiviri wa yona—ngati ya yona—mi nga tshuki mi yi dya.” Nawu lowu wu tirha eka vanhu hinkwavo ku sukela enkarhini wolowo ku fikela sweswi hikuva hinkwavo i vatukulu va Nowa.

• Levhitika 17:14. “Mi nga tshuki mi dya ngati ya muxaka wihi ni wihi wa nyama, hikuva moya-xiviri wa nyama ya muxaka wun’wana ni wun’wana i ngati ya yona. Mani na mani la yi dyaka u ta dlayiwa.” Xikwembu xi teka vutomi kumbe moya-xiviri wu ri engatini naswona i wa xona. Hambileswi nawu lowu a wu nyikiwe Vaisrayele ntsena, wu kombisa ndlela leyi Xikwembu xi wu tekaka wu ri wa nkoka ha yona nawu lowu yirisaka ku dya ngati.

• Mintirho 15:20. ‘Papalatani ngati.’ Xikwembu xi nyike Vakreste xileriso lexi fanaka ni lexi xi xi nyikeke Nowa. Matimu ma kombisa leswaku Vakreste vo sungula va arile ku dya ngati hi yoxe kumbe hambi ku ri ku yi tirhisa ku va va tshunguriwa ha yona.

Ha yini Xikwembu xi hi lerisa leswaku hi papalata ngati?

Ku ni swivangelo leswi twalaka swa vutshunguri swo va hi papalata ku pomperiwa ngati. Kambe xivangelo-nkulu hileswaku Xikwembu xi hi lerisa leswaku hi papalata ngati hikuva leswi yi yimelaka swona swa kwetsima eka xona.—Levhitika 17:11; Vakolosa 1:20.