Ha Yini Ku Ri Ni Vukhongeri Byo Tala Lebyi Tivulaka Bya Vukreste
Nhlamulo ya Bibele
Vanhu va tirhise tidyondzo ta Yesu Kreste leswaku va tisungulela vukhongeri byo hambanahambana bya “Vukreste”. Hambiswiritano, Bibele yi vula leswaku ku ni vukhongeri byin’we bya ntiyiso bya Vukreste. Vona swivangelo swinharhu swo va hi vula leswi.
Yesu u vule leswaku u dyondzise “ntiyiso” naswona Vakreste vo sungula va vule leswaku vukhongeri bya vona i bya “ntiyiso.” (Yohane 8:32; 2 Petro 2:2; 2 Yohane 4; 3 Yohane 3) Marito lawa ma komba leswaku lava va dyondzisaka tidyondzo leti nga lwisanaka ni leswi Yesu a a swi dyondzisa a hi Vakreste va ntiyiso.
Bibele yi dyondzisa leswaku Vakreste va fanele va “vulavula hi ku twanana.” (1 Vakorinto 1:10) Hambiswiritano, vukhongeri byo tala lebyi tivulaka bya Vakreste a byi pfumelelani ni le ka tidyondzo ta xisekelo to tanihi leswi swi vulaka swona ku va Mukreste. Tidyondzo teto hinkwato a ti nge vi ti ri ta ntiyiso.—1 Petro 2:21.
Yesu u profete leswaku vanhu vo tala a va ta ti vula Vakreste kambe va nga swi yingisi swileriso swakwe naswona a ta fularhela vanhu vo tano. (Matewu 7:21-23; Luka 6:46) Van’wana a va ta hambukisiwa hi varhangeri va vukhongeri lava thyakisaka vugandzeri bya ntiyiso leswaku va vuyeriwa vona vini. (Matewu 7:15) Hambiswiritano, van’wana a va ta hlawula ku va exikarhi ka Vakreste va mavunwa leswaku va ta dyondzisiwa leswi va tsakelaka swona ematshan’weni yo yingisela ntiyiso lowu humaka eBibeleni.—2 Timotiya 4:3, 4.
Eka xifaniso xa koroni ni mfava, Yesu u profete hi ku xandzuka (vugwinehi) loku a ku ta lwisana ni Vukreste bya ntiyiso. (Matewu 13:24-30, 36-43) Ku ringana nkarhi wo leha, Vakreste va ntiyiso ni lava nga riki va ntiyiso a va nga ta hambanisiwa hi ku olova. Hilaha Yesu a profeteke, vugwinehi byi andzile endzhaku ka loko vaapostola va file. (Mintirho 20:29, 30) Hambileswi tidyondzo ta vugwinehi ti nga faniki, vukhongeri byo hambanahambana bya Vukreste bya mavunwa byi “hambukile entiyisweni.”—2 Timotiya 2:18.
Yesu u tlhele a vula leswaku ku hambana loku nga kona exikarhi ka Vukreste bya ntiyiso ni bya mavunwa a ku ta vonaka. Leswi swi humelerile, enkarhini wa “makumu ya mafambiselo lawa ya swilo.”—Matewu 13:30, 39.