I Mani Rito Naswona Rito Ra Xikwembu I Yini?
Nhlamulo ya Bibele
Xiga lexi nge, “rito ra Xikwembu” hi ntolovelo xi vula rungula leri humaka eka Xikwembu. (Luka 11:28) Eka matsalwa mangari mangani, “rito ra Xikwembu” kumbe “Rito” ri tirhisiwa ku kombetela eka munhu wo karhi.—Nhlavutelo 19:13; Yohane 1:14.
Rungula leri humaka eka Xikwembu. Hakanyingi loko vaprofeta va byela vanhu mahungu a va vula leswaku i rito ra Xikwembu. Hi xikombiso, loko Yeremiya a vula marito ya vuprofeta u te: “Yehovha a vulavula na mina a ku.” (Yeremiya 1:4, 11, 13; 2:1) Loko Samuwele a nga si byela Sawulo leswaku Xikwembu xi n’wi hlawurile leswaku a va Hosi, u te: “Yima u nga fambi leswaku ndzi ta ku byela rito ra Xikwembu.”—1 Samuwele 9:27.
Loko rito leri ri tirhiseriwa ku fundzha munhu wo karhi. “Rito” ra kumeka eBibeleni loko ku fundzhiwa Yesu Kreste loko a ha ri etilweni ni loko a ri laha misaveni. Xiya swivangelo swin’wana leswi endlaka hi vula leswi:
Rito u rhange a va kona ku nga si tumbuluxiwa nchumu. “Eku sunguleni Rito a a ri kona . . . A a ri ni Xikwembu ku sukela eku sunguleni. (Yohane 1:1, 2) Yesu i “mativula ya ntumbuluko hinkwawo . . . u ve kona swilo leswin’wana hinkwaswo swi nga si va kona.”—Vakolosa 1:13-15, 17.
Rito u te laha misaveni tanihi munhu. “Rito u ve munhu kutani a tshama na hina.” (Yohane 1:14) Yesu Kreste “u tshike swilo hinkwaswo leswi a ri na swona kutani a fana ni hlonga, a va munhu.”—Vafilipiya 2:5-7.
Rito i N’wana wa Xikwembu. Endzhaku ko vula leswaku “Rito u ve munhu,” hilaha swi tshahiweke hakona laha henhla, muapostola Yohane u ye emahlweni a ku: “Hi vone ku vangama kakwe, ku vangama loku fanelaka n’wana loyi a tswariweke a ri swakwe eka tata wakwe.” (Yohane 1:14) Yohane u tlhele a tsala a ku: “Yesu i N’wana wa Xikwembu.”—1 Yohane 4:15.
Rito u na vumunhu byo fana ni bya Xikwembu. “Rito a a ri xikwembu.” (Yohane 1:1) Yesu i “xikombiso xa ku vangama ka Xikwembu ni xifaniso xa xona xa xiviri.”—Vaheveru 1:2, 3.
Rito i hosi leyi nga eku fumeni. Bibele yi vula leswaku enhlokweni ya Rito ra Xikwembu ku ni “tiharhi to tala.” (Nhlavutelo 19:12, 13; nhlamuselo ya le hansi) Rito u tlhela a vitaniwa “Hosi ya tihosi ni Mufumi wa vafumi.” (Nhlavutelo 19:16) Yesu u vuriwa “Hosi ya lava nga tihosi ni Mufumi wa lava nga vafumi.”—1 Timotiya 6:14, 15.
Rito i muvulavuleri wa Xikwembu. Xiga “Rito” xi vonaka xi hlawulekisa loyi Xikwembu xi n’wi tirhisaka ku byela vanhu mahungu ni swiletelo swa xona. Yesu u vule leswaku u wu endlile ntirho lowu a a rhumiwe wona, loko a ku: “Tatana loyi a ndzi rhumeke u ndzi byerile leswi ndzi nga ta swi vula ni ku swi dyondzisa . . . Hikwalaho, swilo leswi ndzi swi vulaka ndzi swi vula hilaha Tatana a ndzi leriseke hakona.”—Yohane 12:49, 50.