Langutelo Ra Bibele
Xana Xikwembu Xi Rhandza Matiko Man’wana Ku Tlula Man’wanyana?
VANHU vo tala va vona onge Xikwembu xi rhandza tiko ra vona ku tlula man’wana. Kambe loko vo komberiwa ku nyikela vumbhoni bya sweswo, va nga ku yini? Van’wana va nga ha kombetela eka leswi tiko ra vona ri swi endleke ematin’wini—ku fana ni ku hlula etinyimpini kumbe ku kula ka ikhonomi. Va nga ha tlhela va kombetela eka leswi va swi endleke ku wundla lava sikaka, ku sirhelela lava nga riki na vuyo kumbe ku khutaza leswaku ku va ni vululami ni leswaku vanhu va khomiwa kahle. Van’wana va ehleketa leswaku Xikwembu xi rhandza tiko ra vona hikwalaho ka leswi ri sasekeke.
Vanhu hinkwavo va tinyungubyisa hi tiko ra ka vona. Kambe, xana Bibele ya ri seketela vonelo ra leswaku Xikwembu xi rhandza tiko rin’wana ku tlula man’wanyana?
Mfanelo Ya Nkoka Ya Xikwembu
Nhlamulo yi le rivaleni loko hi twisisa mfanelo ya nkoka ya Xikwembu xa Matimba Hinkwawo, lexi Bibele yi xi hlamuselaka hi vuenti. Xikwembu a xi yi hi nghohe. Hi xikombiso, Mintirho 10:34 yi swi veka hi ku kongoma: “Xikwembu a xi yi hi nghohe.” Bibele yi tlhela yi vula leswaku Yehovha Xikwembu a nga ‘hlawuli’ nileswaku “eka Yehovha Xikwembu xa hina a xi kona lexi nga lulamangiki kumbe rihlawulo.” (Deteronoma 10:17; 2 Tikronika 19:7) Xikwembu xa xi venga xihlawuhlawu; xi xi fanisa ni vuhomboloki.
Kambe u nga ha tivutisa: ‘Xana Xikwembu a xi nga rhandzi Vaisrayele va khale ku tlula va matiko man’wana? Xana sweswo a ku nga ri xihlawuhlawu?’ Xikwembu xi hlawule rixaka ra Vaisrayele eminkarhini ya Bibele, naswona xi sirhelele Vaisrayele etinyimpini tin’wana loko va lwa ni matiko man’wana. Tlhandlakambirhi, Bibele yi vula leswi hi Xikwembu: “Rito rakwe u ri byela Yakobe, swileriso swakwe ni swiboho swakwe swa vuavanyisi u swi byela Israyele. A nga swi endlanga hi ndlela yoleyo eka matiko man’wana.” (Pisalema 147:19, 20) Xana ku va Xikwembu xi tirhisane ni Vaisrayele a swi kombisa leswaku xi ni xihlawuhlawu? Doo! Xiya swivangelo swinharhu.
Xo sungula, Xikwembu xi hlawule Israyele leswaku xi ta katekisa matiko hinkwawo. Xi endle ntwanano ni kokwa wa tiko rero, ku nga Abrahama, xi ku: “Tinxaka hinkwato ta misava ti ta tikatekisa hi mbewu ya wena.” (Genesa 22:17, 18) Ina, xikongomelo xa Xikwembu xo tirhisana ni Vaisrayele a ku ri ku humesa “mbewu” leyi nga ta tisa mikateko leyikulu, ku nga ri eka vanhu va rixaka rin’we kambe eka vanhu va “tinxaka hinkwato ta misava.”
Xa vumbirhi, Xikwembu a a xi nga katekisi Vaisrayele ntsena. Xi rhambe vanhu va matiko hinkwawo leswaku va joyina vanhu va xona eku xi gandzeleni. (2 Tikronika 6:32, 33) Vanhu vo tala va amukele xirhambo xexo naswona va katekisiwile. Wansati wa Mumowabu la vuriwaka Rhuti hi un’wana wa lava endleke tano.—Rhuti 1:3, 16.
Xa vunharhu, vuxaka byo hlawuleka bya Xikwembu na Israyele wa laha misaveni a byi ri bya xinkarhana. Hi 29 C.E., Israyele u humese “mbewu” leyi tshembisiweke, ku nga Mesiya, Yesu Kreste. (Vagalatiya 3:16) Kambe varikwavo va Yesu va n’wi bakanyile tanihi Mesiya. U va byele a ku: “Maswivo! Yindlu ya n’wina yi tshikeriwa n’wina.” (Matewu 23:38) Endzhaku ka sweswo, Xikwembu a xa ha tirhisananga na vona tanihi tiko naswona a xa ha va seketelanga etinyimpini ta vona. Ematshan’weni ya sweswo, xi katekise vanhu hinkwavo handle ko hlawula. Hi leswi swikombiso swin’wana.
Nyiko Ya Xikwembu Eka Vanhu Hinkwavo
Xitlhavelo xa nkutsulo xa Yesu Kreste i nyiko leyikulu ku tlula hinkwato leti Xikwembu xi tshameke xi ti nyika vanhu. (Varhoma 6:23) Xi endla leswaku hi ntshunxeka eka xidyoho ni rifu, ni leswaku un’wana ni un’wana wa hina a kuma lunghelo ro kuma vutomi lebyi nga heriki. Nyiko leyi i ya vanhu “lava humaka eka tinyimba hinkwato ni tindzimi hinkwato ni vanhu hinkwavo ni matiko hinkwawo.” (Nhlavutelo 5:9) Ina, Xikwembu xi lava leswaku “un’wana ni un’wana loyi a kombisaka ripfumelo” eka Yesu a va ni “vutomi lebyi nga heriki.”—Yohane 3:16.
Mahungu lamanene ya Mfumo wa Xikwembu ma tisa mikateko yo tala eka lava va yingisaka. (Nhlavutelo 14:6, 7) Ma tisa ntshembo wa vumundzuku ni ku nyikela xitsundzuxo xa vutlhari lexi nga ta endla leswaku munhu a hanya a tsakile sweswi. Yehovha u hlele handle ka xihlawuhlawu leswaku “mahungu lamanene lawa ya mfumo ma ta chumayeriwa emisaveni hinkwayo leyi akiweke leswaku byi va vumbhoni ematikweni hinkwawo.” (Matewu 24:14; 28:19, 20; Mintirho 16:10) Mahungu wolawo lamanene ma kumeka eBibeleni, buku leyi kumekaka yi helerile kumbe xiphemu xa yona—hi tindzimi leti tlulaka 2 300. Yehovha, leswi a nga Tatana la nga ni rirhandzu, u endle leswaku munhu un’wana ni un’wana la nga misaveni a kuma “marito ya vutomi lebyi nga heriki.”—Yohane 6:68; Yoxuwa 1:8.
Tinyiko leti ni tin’wana leti humaka eka Xikwembu ti nga kumiwa hi vanhu hinkwavo—ina, hi vanhu va matiko hinkwawo, va tinxaka hinkwato ni va tindzimi hinkwato. Hikwalaho, ku amukeriwa hi Xikwembu ni ku kuma mikateko ya xona a swi yi hileswaku munhu u velekeriwele etikweni rihi kumbe i wa rixaka rihi.
I Vamani Lava Xikwembu Xi Va Amukelaka?
Kutani, hi fanele hi endla yini leswaku hi ta amukeriwa hi Xikwembu? Muapostola Petro u hlamula hi ku vula marito lawa: “Eka tiko rin’wana ni rin’wana munhu loyi a xi chavaka a tlhela a endla ku lulama wa amukeleka eka xona.” (Mintirho 10:34, 35) Swi le rivaleni leswaku ku vula ntsena hi nomu leswaku hi rhandza Xikwembu a swi enelanga. Hi fanele hi rhandza Xikwembu hi timbilu ta hina hinkwato, hi chava ku xi hlundzukisa. Hi fanele hi lwela ku “endla ku lulama” kumbe hi lwela ku endla leswi amukelekaka emahlweni ka Xikwembu.
Hi xikombiso: Ematikweni yo tala swikolo swa mfumo swi lo vuya, kambe lava vuyeriwaka hi lava va vaka kona etlilasini naswona va dyondzaka. Hilaha ku fanaka, Xikwembu xi amukela mani na mani, kambe hi fanele hi endla matshalatshala yo karhi. Matshalatshala wolawo ma ta katsa ku hlaya Bibele nkarhi ni nkarhi, ku kombisa ripfumelo exitlhavelweni xa nkutsulo wa Kreste ni ku hanya hi ku landza misinya ya milawu ya Bibele. Loko hi ‘lava Yehovha’ hakunene, hi ta tikuma hi amukeleka eka yena.—Pisalema 105:3, 4; Swivuriso 2:2-9.
[Xifaniso lexi nga eka tluka 15]
Xikwembu xi endle leswaku vanhu va matiko hinkwawo va kuma “marito ya vutomi lebyi nga heriki”