Langutelo Ra Bibele

Xana Ku Xixima Vunhloko eVukatini Swi Vula Yini Hakunene?

EMATIKWENI yo tala minkhuvo ya vukati hi ndhavuko yi katsa ku va vatekani va hlambanya, laha wansati a tshembisaka leswaku u ta yingisa nuna wakwe. Hambiswiritano, vavasati vo tala va lwisana ni vunhloko evukatini. Xiya leswi Bibele yi swi dyondzisaka malunghana ni mhaka leyi. U ta kuma leswaku leswi yi swi dyondzisaka swa twisiseka naswona swa tirha.

Ku Xixima Vunhloko Hilaha Xikwembu Xi Vulaka Hakona

Eka Vaefesa 5:22-24, Bibele yi hlamusela vunhloko hi ndlela leyi: “Vavasati a va tiveke ehansi ka vanuna va vona hilaha va endlaka hakona eHosini, hikuva wanuna i nhloko ya nsati wakwe tanihi leswi Kreste na yena a nga nhloko ya vandlha . . . Entiyisweni, tanihi leswi vandlha ri tivekaka ehansi ka Kreste, ni vavasati a va tiveke ehansi ka vanuna va vona eka swilo hinkwaswo.” Leswi wanuna a nga “nhloko ya nsati wakwe,” wanuna u fanele a rhangela endyangwini, ivi wansati a titsongahatela vunhloko byakwe ni ku byi xixima.—Vaefesa 5:33.

Wanuna na yena u fanele a titsongahata eka Xikwembu na Kreste. A nga na yona mfanelo yo endla leswaku nsati wakwe a tlula milawu ya Xikwembu kumbe a honisa ripfalo rakwe leri leteriweke hi Bibele. Hambiloko vunhloko byakwe byi pimiwile, Xikwembu xi n’wi nyike vutihlamuleri byo endla swiboho swa nkoka endyangwini.—Varhoma 7:2; 1 Vakorinto 11:3.

Bibele yi lerisa wanuna leswaku a tirhisa vunhloko bya yena a ri karhi a anakanyela a tlhela a rhangisa ni swilaveko swa nsati wakwe. Vaefesa 5:25 yi ri: “Hambetani mi rhandza vasati va n’wina, hilaha Kreste na yena a rhandzeke vandlha hakona kutani a tinyiketa hikwalaho ka rona.” Wanuna loyi a landzelaka xikombiso lexinene xa Kreste xa rirhandzu u tirhisa vunhloko byakwe hi ndlela leyinene.

Ku tlula kwalaho, Bibele yi lerisa wanuna leswaku a tshama ni nsati wakwe “hi ku ya hi vutivi.” (1 Petro 3:7) Sweswo swi katsa ni ku xalamukela timhaka tin’wana handle ka ku tiva ku hambana ka ndlela leyi wansati ni wanuna va vumbiweke ha yona ni ndlela leyi va titwaka ha yona hi swilo swo karhi. U fanele a tiva swilo leswi nsati wakwe a swi lavaka.

‘I Nghamu Ya Wena’

Xana ku va wansati a titsongahata swi vula leswaku u fanele a nga vi na rito endyangwini? Xiya mhaka ya Sara, loyi a boxiweke eBibeleni loyi a veke xikombiso emhakeni yo yingisa nuna wakwe, Abrahama. (1 Petro 3:5, 6) A a titsongahata eka yena etimhakeni letikulu ni leti nga nyawuriki, ta ku rhurha ka vona ekaya lerinene va ya tshama ematendeni hambi ku ri ku lunghiselela swakudya hi xitshuketa. (Genesa 12:5-9; 18:6) Hambiswiritano, etimhakeni letikulu u phofule langutelo rakwe hi ku phindha-phindha leri a ri hambanile ni ra Abrahama. Leswi swi humelele loko a lava leswaku Abrahama a hlongola nhlantswa yakwe Agara ni mativula yakwe, Iximayele endyangwini wa vona. Ematshan’weni yo tshinya Sara, Xikwembu xi byele Abrahama ku “yingisa rito rakwe.” Hambiswiritano, Sara u hambete a titsongahata eka Abrahama hi ku va a yimela leswaku ku va yena a endlaka xiboho ematshan’weni ya leswaku yena n’wini a hlongola Agara na Iximayele.—Genesa 21:8-14.

Xikombiso xa Sara xi komba leswaku ematshan’weni ya leswaku wansati a pfumelela hinkwaswo, u fanele a va ‘muhetisisi’ wa yena naswona a n’wi xixima. (Malakiya 2:14) Tanihi muhetisisi wa yena, u ta ni swiringanyeto swa nkoka eka swiboho leswi endliwaka endyangwini naswona u va ni rito endyangwini, hakanyingi u langutela swilo swo tala ekaya ni le timhakeni ta timali. Entiyisweni, leswi wanuna a nga nhloko endyangwini u ni vutihlamuleri byo endla swiboho swo hetelela.—Swivuriso 31:10-31; 1 Timotiya 5:14.

Ku Xixima Muvumbi

Yehovha Xikwembu u vumbe wanuna ni wansati, naswona u endle leswaku vukati byi va xiboho xo kwetsima eka vona. (Genesa 2:18-24) U tlhele a andlala vutihlamuleri bya wanuna ni bya wansati lebyi nga ta va tisela ntsako lowukulu.—Deteronoma 24:5; Swivuriso 5:18.

Leswi Yehovha a nga Musunguri wa vukati, u ni mfanelo yo veka milawu elunghiselelweni ra vukati. Vatekani lava xiximaka lunghiselelo ra Xikwembu ra vunhloko, ku nga ri ntsena hileswi byi pfunaka kambe hikwalaho ko xixima vulawuri bya Xikwembu, xa va katekisa ni ku va seketela.

XANA U TSHAME U TIVUTISA?

◼ I mani loyi a vekeke xikombiso lexinene malunghana ni vunhloko?—Vaefesa 5:25.

◼ Xana Xikwembu xi byi pimile vulawuri bya wanuna?—1 Vakorinto 11:3.

◼ Hi xihi xikongomelo xa lunghiselelo ra vukati ni ra vunhloko?—Swivuriso 5:18.

[Xifaniso eka tluka 28]

Vunhloko lebyi hetisisiwaka hi ku landza xikombiso xa Kreste byi tisa ntsako ni ku eneriseka eka vatekani