Swivutiso Swa Vahlayi

◼ Xana Yehova na Yesu hi vona lava ku vuriwaka vona eka Swivuriso 30:4, leyi vutisaka yi ku: “V̌ito ra yena i mani? I mani v̌ito ra ṅwana wa yena?”

Ndzimana leyi yi yi veka erivaleni ndlela leyi munhu a nga ntsongo ha yona loko a ringanisiwa ni La-Nge-Henhla-henhla. Swivutiso swa yona leswi twalaka swi nga vutisiwa hi mani na mani, kambe swivutiso leswi swi fanele ku yisa munhu la ehleketaka eka Muvumbi.

Mutsari Agur u vutisile a ku: “I mani l’a tlhandlukeleke tilweni a tlhela a šikela kona? I mani l’a fumbareleke mheho hi ŝandla ŝa yena? L’a hlengeleteke mati hikwawo e ngubyeni ya yena, i mani šana? I mani loyi a tumbulušeke matlhelo hikwawo ya misav̌a? V̌ito ra yena i mani? I mani v̌ito ra ṅwana wa yena loko u ṅwi tiv̌a?”—Swivuriso 30:1, 4.

A ku na munhu la nga hetisekangiki loyi a yeke etilweni ivi a vuya a ri ni vutlhari hinkwabyo; naswona ku hava munhu la nga ni matimba yo lawula moya, malwandle, kumbe mavandla ya ntivo-maribye lama funengetaka misava. Kutani, kahle-kahle, Agur u vutisile a ku, ‘Xana u tiva vito kumbe nxaxamelo wa ndyangu wa munhu wihi na wihi loyi a endleke swilo leswi?’ Hi fanele ku hlamula hi ku e-e.—Ringanisa Yobo 38:1–42:3; Esaya 40:12-14; Yeremia 23:18; 1 Vakorinto 2:16.

Xisweswo, hi fanele ku languta ehandle ka xivandla xa vanhu leswaku hi kuma loyi a nga ni matimba lama tlulaka ya munhu yo lawula mavandla ya ntumbuluko. Hambi swi ri tano, a hi hikeriwanga ku dyondza hi ta yena hi ku xiya mintirho ya yena. (Varhoma 1:20) Kavula, leswi swi hikwalaho ka leswi a xikeke ni vuxokoxoko bya yena n’wini ni swiendlo swakwe. U nyikele rungula leri kongomeke. Hi xikombiso, u endle leswi, loko a ‘xikela’ ku ta nyika Nawu eka Muxe eNtshaveni ya Sinayi. (Eksoda 19:20; Vaheveru 2:2) U tlhele a pfuna malandza yakwe leswaku ma tlangela vito ra yena ra nkoka, Yehova. (Eksoda 3:13, 14; 6:3) Endzhakunyana, u tivise N’wana wa yena, loyi a vitaniweke Yesu naswona loyi hi ku kongoma a xikeke hi le tilweni ni vuxokoxoko lebyi engetelekeke ehenhleni ka Muvumbi.—Yohane 1:1-3, 14, 18.

Leswi swi fanele ku pfuna hinkwerhu ka hina ku fikelela makumu yo karhi: Ku fana na Agur, hi nga ka hi nga kumi vutlhari bya ntiyiso exumeni xa hina. (Swivuriso 30:2, 3) Naswona hi nga ka hi nga boxi munhu ni un’we la nga ni matimba lamakulu kumbe vutivi. Hikwalaho, hi fanele hi ku titsongahata hi languta eka Loyi a swi kotaka ku hi nyika vutlhari lebyi hi byi lavaka. Loyi i Munhu La Hlawulekeke Swinene, loyi vito rakwe hi nga ri tivaka ni loyi N’wana wakwe a hi feleke leswaku hi ta kutsuriwa ivi hi kuma vutomi lebyi nga heriki.—Matewu 20:28.