Twarisa Mintirho Ya Yehova

¹ “Twarisani mintirho ya yena evanhwini. Tivisani leswaku vito ra yena ri tlakusiwa . . . , hikuva u endle leswi hlamarisaka.” (Esa. 12:4, 5, NW) Xana u xi amukerisa ku yini xikhutazo lexi? Loko hi languta mintirho ya Yehova eka hina tanihi vanhu, xana timbilu ta hina a ti susumeteleki leswaku hi byela van’wana? Malembe ya kwalomu ka 73 lama hundzeke, Yehova u tshunxe vanhu vakwe evuhlongeni bya Babilona. Ku sukela hi 1919 vugandzeri bya ntiyiso byi simekiwe hi laha ku tiyeke naswona sweswi byi hangalasiwe eswiphen’wini hinkwaswo swa misava. Mpimo lowu Yehova a endleke swilo leswi ha wona wu tlule leswi a hi swi languterile. Wena hi wexe, xana u wu tlangela ku fikela kwihi nkongomiso, nsirhelelo ni mikateko ya Xikwembu? Xana u nga endla leswi engetelekeke leswaku u twarisa mintirho ya xona ni ku tlakusa vito ra xona?

² Nguva ya Xitsundzuxo yi hi tsundzuxa xiendlo xa Xikwembu lexi hi nga ta xi khensa hi laha ku nga heriki. N’hweti ya April yi ta va nkarhi lowu fanelekaka swinene wo komba Yehova ku khensa ni ku tlangela ka hina hi ku tsarisa tanihi phayona ra nkarhinyana. Nakambe, loko u phayona nkarhinyana eka riendzo ra mulanguteri wa xifundza, u ta vuyeriwa ngopfu hi mpfuno ni xikhutazo xa yena evutirhelini.

³ Hakanyingi, malunghiselelo ma humelela kahle loko mintlawa ya vahuweleri yi tsarisa tanihi maphayona ya nkarhinyana. Xiyimiso lexinene xi nga endliwa leswaku hinkwavo va kuma munhu wo tirha na yena, naswona vamakwerhu va xisati lava nga ni vana lavatsongo va nga hlela leswaku va pfunana. Hi ku kunguhata lokunene, vo tala va swi kume swi nga nonon’hwi ngopfu ku fikelela xilaveko xa tiawara ta 60. Leswi swi vula leswaku u endla 2 wa tiawara hi siku kumbe 15 wa tiawara hi vhiki evutirhelini. Maphayona man’wana ya nkarhinyana ma nyikela vumbhoni ku ringana awara yin’we kumbe timbirhi va nga si sungula ntirho wo tihanyisa kumbe endzhaku ka wona, kutani va tirha nkarhi wo leha hi mahelo-vhiki.

⁴ Hambi loko u nga swi koti ku phayona nkarhinyana, u nga swi kota ku engetela ntirho wa wena wa nsimu. Nakambe, hi ku pfuna hi xo famba kumbe ku tirha ni van’wana lava phayonaka, u ta va xikhutazo eka vona. Swin’wana ni swin’wana leswi hi nga swi endlaka leswaku hi twarisa vito ra Yehova ni mintirho yakwe, Xikwembu xa hina lexi nga ni ku tlangela xi ta swi vona.—Mal. 3:16.