Marito Yo Sungula Ha Wona Ma Nga Va Ya Nkoka

¹ Xana a a wu tirhisa swingheniso swin’wana leswi ringanyetiwaka ebukwini leyi nge Reasoning kumbe leswi nga eka minkandziyiso ya sweswinyana ya Vutirheli Bya Hina Bya Mfumo? Vahuweleri vo tala va vika leswaku va humelela swinene evutirhelini bya vona bya yindlu na yindlu hi ku tirhisa marito lawa yo sungula ha wona, hi laha ma humelelaka ha kona enkandziyisweni. Van’wana va kume leswaku hi ku tinyika nkarhi lowu engetelekeke wo lunghiselela vutirheli bya nsimu, va swi kotile ku vumba marito yo sungula ha wona hi marito ya vona vini kambe ma sekeriwe eka mavekele ya swiringanyeto leswi gandlisiweke.

² Nchumu wun’wana wa ntiyiso hi leswaku loko u ya tiva kahle marito ya wena yo sungula ha wona, u nga si yisela un’wana rungula ra Mfumo, u ta titwa u ntshunxekile naswona u titshemba swinene. Marito ya wena ma ta kombisa ku tsakela ka wena ka xiviri ko avelana mahungu lamanene ni van’wana. Loko u lungheke kahle swi endla vutirheli bya wena byi tsakisa swinene hikuva u ta kuma vuyelo byo antswa. Lexi nga xa nkoka lowukulu hi leswaku hi endla ku tinyiketa ka hina ka ntirho ku va nchumu wa nkoka lowu hi nga wu nyikelaka.—Vahev. 13:15; 1 Pet. 2:5.

³ Kutani tinyike nkarhi wo lunghiselela. Anakanya hi vanhu lava u talaka ku hlangana na vona ensin’wini ya ka n’wina. I yini lexi va karhataka ni lexi va khumbaka? Hi swihi swiendlakalo swa sweswinyana leswi khumbaka vutomi bya vona? Endzhaku ko kambisisa tinhlamulo ta swivutiso leswi, languta marito yo sungula ha wona lama ringanyetiweke eka matluka 9-15 ya buku leyi nge Reasoning kumbe u hlawula rito rin’we ro sungula ha rona kumbe lama engetelekeke yo huma eka Vutirheli Bya Hina Bya Mfumo. Titwe u ntshunxekile ku antswisa kumbe ku lulamisa mavekele ya marito lama tsariweke, leswaku u titwa u ntshunxekile ha wona. Goza leri landzelaka ku nga va ku kombela vahuweleri van’wana va kambisisa marito ya wena yo sungula ha wona, eka nongonoko wo titoloveta. Kumbexana leswi swi ta khutaza van’wana leswaku na vona va antswisa marito ya vona yo sungula ha wona. Hi ndlela yo karhi mi ta va mi khutazana ni ku akana emintirhweni leyinene.

⁴ Nkarhi ni matshalatshala lawa u ma endlaka eku lunghiseleleni ka marungula ya wena ya nsimu swi ta hakeriwa. U nga katekisiwa leswaku u va ni xiphemu lexi humelelaka entirhweni lowu nyanyulaka wa ku hlengeleta, lowu endliwaka sweswi.