Endla Maendzo Yo Vuyela Lama Humelelaka
1 Ku endla maendzo yo vuyela i xiphemu xa nkoka xa ntirho wa hina tanihi ‘vatirhi-kulorhi va Xikwembu.’ (1 Vakor. 3:6-9) A hi fanelanga hi chava leswaku n’wini wa muti u ta ku yini, tanihi leswi hi yaka eka loyi se a kombiseke ku tsakela ntiyiso. Loko hi lunghiselela kahle hi ta kombisa leswaku hi n’wi tsakela swinene munhu loyi hi n’wi endzelaka tanihi leswi hi bulaka hi mhaka leyi tsakisaka ya Bibele.
2 Nghena emhakeni; vutisa swivutiso swa vutlhari.
Eka leswi u swi xiyeke eka riendzo ro sungula, u nga ha vutisa:
◼ “Xana u anakanyisise hi laha ku engetelekeke hi switshembiso swa Xikwembu swa ku fuma misava hi ku lulama?”
Xivutiso xin’wana xi nga ha ku:
◼ “Xana u ehleketa leswaku xikhongelo xa wena xa leswaku Mfumo wa Xikwembu wu ta xi ni ntikelo lowu engetelekeke ku sukela loko hi ve ni bulo ra hina ra Bibele vhiki leri nga hundza?”
Ku languteka ka xinghana ka xikandza ni mpfumawulo wa rito swa pfuna swinene eku kombiseni ka ku tsakela ka hina loko hi vutisa swivutiso swo tano.
3 U Nga Hatlisi; Yingisela Leswi N’wini Wa Muti A Swi Vulaka. Loko hi yingisela leswi n’wini wa muti a swi vulaka ni ku anakanyisisa ha swona hi nga si hlamula, ku n’wi tsakela ka hina ka xiviri ku ta va erivaleni. Hi ku ya hi leswi a swi vulaka, u nga nyikela mianakanyo ya Matsalwa leyi yelanaka ni riendzo ra wena ro sungula. Lunghekela ku dyondzisa n’wini wa muti nchumu wo karhi, nkarhi wun’wana ni wun’wana lowu u endzaka ha wona. Loko ku tlakusiwa mhaka leyi nga rindzeriwangiki, tirhisa nkarhi wolowo ku humesa buku ya wena leyi nge Reasoning leswaku u kuma rungula leri lavekaka.
4 Loko u fambise “Xihondzo xo Rindza” xa May 1, 1992, u nga ku:
◼ “Enkarhini lowu hundzeke hi vulavule hi ta lembe ra 1914. Nyimpi leyi sunguleke lembe rero yi tise ku cinca ko karhi eka tihulumendhe to tala. Ku sukela kwalaho ku cinca ko tala ku ya emahlweni ku endliwa. Kambe xana ku cinca ko karhi kumbe hinkwako ku enete swilaveko swa vanhu hakunene, kumbe xana ku nga tiyisekisa ku rhula loku nga heriki? [Yimela nhlamulo.] Xiya ndlela leyi Yesu a dyondziseke valandzeri vakwe ku khongelela hulumendhe leyi nga ta tlhantlha swiphiqo leswikulu leswi hi langutanaka na swona namuntlha ha yona. [Hlaya Matewu 6:9, 10.] Xana u ehleketa leswaku Mfumo wa Xikwembu wu ta endla yini? [Yimela nhlamulo.] Nhlamuselo ya Bibele ya tsakisa swinene.” Kutani hlaya Daniel 2:44. U nga ha tirhisa xifaniso lexi nga eka matluka 12 na 13 ya buku leyi nge Hanya Hi Masiku leswaku u kombisa muxaka wa swiyimo leswi hi nga swi langutelaka ehansi ka Mfumo wa Xikwembu.
5 Loko u fambise “Awake!” (“Despertai!”) Ya May 8, 1992, u nga ha ku:
◼ “Loko ndzi ku endzerile enkarhini lowu hundzeke, hi vulavule hi vanhu lava siyeke matiko ya ka vona hi ku balekela vuhomboloki ni ku xaniseka. Xana u ehleketa leswaku Xikwembu xi ni mhaka hakunene ni leswi vanhu va faneleke va swi tiyisela emavokweni ya vanhu-kulobye?” Hi ku ya hi nhlamulo ya kona, u nga ha hlaya ni munhu yoloye Eklesiasta 4:1 kumbe Psalma 72:12-14. Kutani u nga pfula eka tluka 15 ra broxara leyi nge “Vonani”! ivi u hlaya kumbe u komisa tindzimana tinharhu eka tluka rero, u vutisa swivutiso swa ndzimana yin’wana ni yin’wana.
6 A hi hambeteni hi kombisa ku tsakela ka munhu hi xiyexe ni ku tiva timhaka to tsakisa ta Bibele leti hi nga ta bula ha tona leswaku maendzo ya hina yo vuyela ma humelela.