Ku Tirha Hi Yindlu Na Yindlu Hi Laha Ku Humelelaka
1 Namuntlha ‘mahungu lamanene’ ma chumayeriwa emisaveni hinkwayo. (Mt. 24:14) Leswi swi endliwa ngopfu hi vutirheli bya yindlu na yindlu.—Mint. 20:20, 21.
2 Marungula ya hina ma fanele ma twisiseka eka vanhu lava hi hlanganaka na vona. Vavanuna, vavasati ni vantshwa va hambana hi swilo leswi va swi tsakelaka. Kutani swi nga va swinene ku lungheka hi tinhloko-mhaka ta Matsalwa to talanyana leti talaka ku tsakisa vanhu va nsimu ya hina.
3 Tirhisa Tibuku Hi Ndlela Leyinene: Ku tolovelana kahle ni leswi nga endzeni ka buku leyi nge Nghwazi swi ta hi pfuna leswaku hi vulavula ni vanhu hi laha ku humelelaka hi tinhloko-mhaka to tala. Swifaniso, leswi vonakaka kun’we ni swa marito, i swipfuno leswi humelelaka. U nga ha koka ku tsakela ka muntshwa hi mhaka leyi nyanyulaka leyi nga eka ndzima 44, “Ku Miyeta Xidzedze Lexi Chavisaka.” Munhu loyi a karhatiwaka hi vuvabyi bya miri kumbe vugono, entiyisweni a nga chaveleriwa hi ndzima 57, “Ku Twela Lava Nga eKhombyeni Vusiwana.” Ndzima 90, “Ntshembo Wa Ku Pfuxiwa,” yi nga tsakisa munhu un’wana ni un’wana loyi a tshameke a rila hikwalaho ko lahlekeriwa hi murhandziwa. Bulo mayelana ni swiyimo swa misava leswi khomisaka gome ri nga yisa eka ndzima 111, “Xikombiso Xa Masiku Ya Makumu.”
4 Leswaku hi humelela evutirhelini, hi fanele hi kombisa ku tsakela ka xiviri ka hina hi hexe. (Flp. 2:4) Ringeta ku yisa mbulavurisano eka xihloko xa Mfumo lexi katsaka munhu ni swilaveko swakwe. Lava ku twisisa miehleketo ya munhu hi ku n’wi vutisa swivutiso swa nkoka. Yingisa swinene tinhlamulo ta yena. Tinhlamulo takwe ti nga ku pfuna u twisisa mhaka leyi nga ta n’wi tsakisa. Hi lava ku pfuna vanhu leswaku va vona ntikelo wa rungula ra Mfumo, hi va komba ndlela yo dyondza leswi engetelekeke ha rona. Mpatswa wun’wana wu hlamusele leswaku wu amukele dyondzo ya Bibele hikuva makwerhu loyi a va endzeleke u kombise ku va tsakela ka ntiyiso.
5 Ensin’wini Leyi Tirhiwaka Ngopfu: Ku kurisa ku humelela i ka nkoka swinene ensin’wini leyi tirhiwaka ngopfu. Vutirheli lebyi humelelaka swinene byi hi pfuna ku engetela nsimu ya hina. (wTS88 7/15 matl. 15-20) Ematshan’wini yo endla onge a hi si tshama hi endzela kaya rero, hi nga ha tsundzuka langutelo ra n’wini wa muti ra nkarhi lowu hundzeke ivi hi ri tirhisa kahle. Hi nga ha kombetela eka riendzo ra hina ra nkarhi lowu hundzeke kutani hi aka ehenhla ka leswi swi vuriweke hi nkarhi wa kona. Marungula lama ringanyetiweke eka minkandziyiso leyi hundzeke ya Vutirheli Bya Hina Bya Mfumo ni le ka buku leyi nge Reasoning ma nga ha hundzuriwa hi ku ya hi swilaveko swa nsimu.
6 Yehovha u lehisa mbilu hi ku pfula nyangwa leswaku vanhu lava engetelekeke va kuma mikateko ya Mfumo. Vutirheli bya Yesu a byi humelela hikuva a a rhandza vanhu. (Mar. 6:34) Xana hi tikarhatela ku landzela xikombiso xakwe? (1 Pet. 2:21) Hi nga tshiki ku hlanganyela hi xitalo ni hi laha ku humelelaka evutirhelini bya yindlu na yindlu.—2 Tim. 4:5.