Ndlela Ya Ku Hlakulela Ku Tsakela
1 Xihlamusela-marito xin’wana xi hi byela leswaku “ku hlakulela” swi vula ku lunghisela ku kula kumbe ku ku engetela. Kambe rito leri ri nga tlhela ri vula ni ku antswisa hi ntirho, ku khathalela ni hi dyondzo. Ku endla vadyondzisiwa i xikongomelo lexikulu xa vutirheli bya hina. (Mt. 28:19, 20) Hikwalaho, hi fanele hi endla matshalatshala ya ku hlakulela ku tsakela loku hi ku kumaka evutirhelini bya nsimu.
2 Maendzo yo phindha-phindha hakanyingi ma laveka leswaku ku engeteriwa ku kula ka moya ka vanhu va timbilu letinene. Maendzo yo vuyela lama vekaka mihandzu ma yisa eka dyondzo ya Bibele ya nkarhi na nkarhi.
3 Xana u vuyela eka lava va kombisaka ku tsakela lokukulu ntsena? A swi bohi leswaku u rhanga hi ku fambisa buku loko u ta vuyela. Phayona rin’wana leri ri nga taliki ku fambisa tibuku to tala eka riendzo ro sungula, ri vuyela eka un’wana ni un’wana loyi a nga ni xinghana. Bulo lerinene leri u avelanaka ni un’wana marito ya Matsalwa ri endla xisekelo lexinene xa riendzo ro vuyela.
4 Tirhisa Swiphephana Leswaku U Sungula Tidyondzo Ta Bibele Eka Maendzo Yo Vuyela: Tinhloko-mhaka to hambana ta swiphephana swa hina ta fanela esikwini ra hina. Ti kandziyisa xilaveko xa ku va ni vutivi bya Bibele ni ku byi tirhisa.
U nga ha ku:
◼ “Nkarhi lowu hundzeke hi vulavule hi swivangelo swo karhi swa ku tshemba Bibele. Xana Bibele yi vulavula hi vumundzuku bya muxaka muni?” Sungula ku hlaya eka ndzimana ya vumbirhi eka tluka 3 ra xiphephana lexi nge Vutomi eMisaveni Leyintshwa Ya Ku Rhula. Pfula matsalwa. Vutisa n’wini wa muti leswaku u titwisa ku yini hi leswi u swi hlayaka. Gimeta hi ku kamba mhaka leyi nga ehansi ka xihlokwana lexi nge “Ndlela Leyi Swi Kotekaka Ha Yona Eka Wena” eka tluka 5.
5 Hi ndlela leyi fanaka, u nga tirhisa xiphephana lexi nge Hi Wihi Ntshembo Wa Varhandziwa Lava Feke?
U nga ha ku:
◼ “Hi laha hi swi voneke ha kona eku sunguleni, vanhu vo tala a va xi tshembi Xikwembu. Hi xikombiso, va vutisa, ‘Loko Xikwembu xi ri ni ntamu, hikwalaho ka yini xi tshika vanhu va fa?’ Xiphephana lexi xi nga pfuna ku hlamula xivutiso xexo.” Kombetela eka xiyenge lexi sungulaka hi ndzimana ya vumune eka tluka 2. Vutisa xivutiso lexi faneleke endzhaku ka ndzimana yin’wana ni yin’wana kutani u languta matsalwa lama kombisiweke lawa ma nga tshahiwangiki. Loko vanhu se va ri na tona tibuku u nga ha fambisa timagazini ta sweswinyana.
6 Ku Yisa Dyondzo eMahlweni: Hi ku landzela tindlela leti ringanyetiweke laha, u nga sungula dyondzo ya le kaya ya Bibele. Leswaku u yisa bulo emahlweni nkarhi na nkarhi, vutisa n’wini wa muti eku heleni ka riendzo ra wena: “Xana u swi vonile leswaku hi hlamule swivutiso swa nkoka hi timinete ti nga ri tingani ntsena? Vhiki leri taka hi nga teka nkarhi wo lehanyana hi vulavurisana hi ntshembo wa ku pfuxiwa kumbe mhaka yin’wana leyi ku tsakisaka.” U nga ha tirhisa xin’we xa swivutiso leswi boxiweke eka swihloko leswi nkarhi wun’wana ni wun’wana loko u endza. Hi nkarhi lowu faneleke, u nga ha tirhisa broxara kumbe u sungula dyondzo ebukwini leyi nge Hanya Hi Masiku.
7 Mawaku ku enerisa ka swona loko u fambisa dyondzo ya Bibele ni munhu loyi a lavaka ntiyiso hakunene! Onge hi nga katekisiwa hi vutirheli lebyi humelelaka hi ku tirhisa swiringanyeto leswi nyikeriweke swa ndlela ya ku hlakulela ku tsakela loku hi ku kumaka.