Hlawula Tinhla Leti Faneleke To Vulavurisana

¹ Hi nga endla yini leswaku hi khutaza vanhu va hamba va hlaya Xihondzo xo Rindza ni Awake!? Hi fanele hi va ni tinhla leti tsakisaka ta ku vulavula ha tona loko hi fambisa timagazini eka van’wana. Loko hi tolovelane kahle ni vanhu va le nsin’wini ya ka hina naswona hi va tsundzuka loko hi hlaya timagazini, hi nga languta tinhla to vulavurisana leswaku hi koka ku tsakela ka vona.

² Etindhawini tin’wana swi nga ha endleka vanhu va va ni hanyelo leri fanaka, leswi endlaka leswaku swi olova swinene ku vona nchumu lowu wu nga va tsakisaka hinkwavo. Kambe eka tindhawu tin’wana, hi nga ha kuma vanhu va mahanyelo yo tala yo hambana-hambana. Loko hi ri ni tinhla to tala to vulavurisana, hi nga hlawula yin’we leyi n’wi fanelaka kahle munhu loyi hi hlanganaka na yena.

³ U nga hatliseli ku cukumeta timagazini ta khale loko u kuma letintshwa. Makwerhu un’wana hakanyingi u khomela n’wini wa muti minkandziyiso minharhu kumbe mune ya Xihondzo xo Rindza ivi a n’wi tshika a hlawula leti a lavaka ku ti hlaya. Loko hi vona leswaku hi kuma timagazini to tala leti hi nga kotiki ku ti fambisa, hi fanele hi anakanya hi ku hunguta oda ya hina.

⁴ Loko hi tirhisa tinhla leti faneleke nkarhi hinkwawo, hi nga khutaza van’wana leswaku va hlaya timagazini ta hina, hi tlhela hi va nghenisa endleleni leyi yisaka evuton’wini. (Mt. 7:14) Loko hi anakanyisisa hi mhaka leyi ya nkoka, hi nga tiyiseka leswaku Yehovha u ta hi katekisa.