Avela Van’wana Vutivi Lebyi Kongomeke Hi Yesu Kreste
1 Evutirhelini bya hina bya nsimu hi December, hi ta fambisa buku leyi nge Nghwazi Leyi Tshameke Yi Hanya. I yini lexi u nga ta xi vula leswaku u sungula bulo ra Bibele leri nga enkarhini, naswona u ta yi vulavulela njhani buku leyi yo saseka?
2 Ku Yi Fambisela Van’wana: Hi tihi tinhla tin’wana to tsakisa ta buku leyi, leti hi nga ti kombisaka? Ndzima 5 yi tlakusa xivutiso lexi faneleke enkarhini lowu wa lembe, “Ku Velekiwa Ka Yesu—Kwihi Naswona Rini?” U nga ha koka ku tsakela ka muntshwa hi mhaka leyi nyanyulaka leyi nga eka ndzima 44, “Ku Miyeta Xidzedze Lexi Chavisaka.” Munhu loyi a karhatiwaka hi vuvabyi bya miri kumbe ku tsana emirini, entiyisweni a nga chaveleriwa hi ndzima 57, “Ku Twela Lava Nga eKhombyeni Vusiwana.” Ndzima 90, “Ntshembo Wa Ku Pfuxiwa,” yi nga tsakisa munhu un’wana ni un’wana loyi a tshameke a rila hikwalaho ko lahlekeriwa hi murhandziwa. Bulo mayelana ni swiyimo swa misava leswi khomisaka gome ri nga yisa eka ndzima 111, “Xikombiso Xa Masiku Ya Makumu.”
3 Endzhaku ko pfuxelana hi ndlela leyinene, u nga ha ku:
◼ “Hi vutisa vanhu leswaku xana va nga pfumela leswaku Yesu Kreste a ri nghwazi leyi tshameke yi hanya. [N’wi nyike nkarhi wa ku hlamula.] Kavula, vanhu vo tala va khumbe ndlela ya timhaka ta vanhu, naswona van’wana va hoxe xandla eka nhluvuko wa rixaka ra vanhu, kambe xiya leswi swi hambanisaka Yesu Kreste ni lavan’wana hinkwavo. [Hlaya Yohane 17:3.] Ku hava un’wana loyi a nga ni ntamu wa ku nyika vanhu vutomi lebyi nga heriki. [Pfula ndzima 111 ya buku leyi nge Nghwazi.] Loko Yesu a ri la misaveni, u hlamusele swilo leswi a swi ta humelela ku nga si fika makumu ya misava. Kambe u tlhele a khutaza vadyondzisiwa vakwe leswaku va tsaka hikuva swilo leswi a swi ta vula leswaku ku kutsuriwa ku le kusuhi.” Endzhaku ko hlamuselanyana tinhla tin’wana ta xikombiso xa vukona bya Kreste, kombisa tinhla-nkulu tin’wana ta buku leyi. Fambisa buku hi munyikelo wa R8,00.
4 Ku tshinelela kun’wana, endzhaku ko pfuxelana, ku nga ha va loku:
◼ “Hi December vanhu va ehleketa ni ku vulavula ngopfu hi Yesu. Hi nga xi tekelela njhani xikombiso lexi vekiweke hi Yesu, nghwazi ya misava? [Yimela nhlamulo, kutani u yisa nyingiso eka 1 Petro 2:21.] U dyondzise valandzeri vakwe ku rhandza vaakelani, va tshama va basile ni ku khongelela leswaku Mfumo wa Xikwembu wu ta. Leswaku hi ponisiwa hi fanele hi xixima ni ku yingisa Yesu tanihi Muponisi wa hina. [Hlaya Yohane 14:6.] Yesu a nga ri munhu la tolovelekeke. Buku leyi yi hlamusela leswaku i nghwazi leyi tshameke yi hanya. Ndzima 59 yi tiyisekisa leswi, yi n’wi vitana ‘Mesiya, N’wana wa Xikwembu lexi hanyaka.’ Tanihi leswi hi nga ta ponisiwa hikwalaho ka yena, xana u vona onge a hi fanelanga leswaku hi dyondza swilo swo tala hi laha swi kotekaka ha kona mayelana ni ntirho wakwe ni leswi a swi dyondziseke? Buku leyi yi endleriwe sweswo, naswona ndzi nga tsakela ku ku kumela ya wena hi munyikelo wa R8,00.”
5 Veka Masungulo Ya Riendzo Leri Landzelaka: Entiyisweni, hambi loko hi fambise buku leyi nge Nghwazi, timagazini timbirhi, xiphephana kumbe loko hi ve ni bulo lerinene ntsena, hi nga ha ku: “Nkarhi lowu landzelaka loko ndzi ta, ndzi lava ku ta avelana na wena mhaka leyi tsakisaka malunghana ni doroba leri Yesu a nga velekiwa ka rona.” Tiyiseka leswaku u tsala riendzo rero ehansi hi vukheta ni ku tsakela loku kombisiweke.
6 Mfumo wu nyika vanhu ntshembo lowu nga wona wa ntiyiso. A hi kombiseni ku tsakela ka hina lokukulu ku avela vanhu hinkwavo lava hi hlanganaka na vona ‘vutivi lebyi kongomeke bya xihundla xo kwetsima xa Xikwembu, ku nga Kreste.’—Kol. 2:2, NW.