Vana ni langutelo lerinene hi Tintswalo Ta Xikwembu

DOKODELA a ri ni musa ni nkhathalelo swinene. Hi ku ya hi mavonelo yakwe lamanene, muvabyi wakwe a lava vuhandzuri bya xihatla leswaku ku ponisiwa vutomi byakwe. Loko a kanakanilenyana ivi a vulavula hi mhaka ya mimpompelo ya ngati, u hlamarile. Loko a hlamusela leswaku hikwalaho ka swivangelo swa vukhongeri a a nga ta swi kota ku pfumela vuhandzuri lebyi katsaka mpompelo wa ngati, dokodela u hele mongo. U tinwaye nhloko a lava ndlela yo n’wi pfuna. Eku heteleleni, u ehlekete leswaku u yi kumile. U te: “Wa swi tiva leswaku loko u nga pfumeli ku pomperiwa ngati, u ta fa. A wu swi lavi ku fa, a swi tano ke?”

“U vurisile, a ndzi swi lavi,” ku vula muvabyi wakwe.

“Kambe, swi vonaka onge loko u amukela mpompelo, u ta lwisana ni ripfumelo ra vukhongeri bya n’wina, leri nga ra nkoka eka wena. Kambe ke, xiringanyeto xa mina hi lexi. Ha yini u nga pfumeli ku pomperiwa ngati ivi u ponisa vutomi bya wena hi ndlela yoleyo. Kutani u tisola eka Xikwembu leswaku u dyohile, ivi u hundzuka. Hi ndlela yoleyo, u ta vuyiseriwa evukhongerini bya wena nakambe.”

Dokodela loyi a a vulavula handle ka vukanganyisi a a ehleketa leswaku u kume nhlamulo leyi hetisekeke. A swi lemuka leswaku muvabyi wakwe u kholwela eka Xikwembu xa tintswalo. Kunene, lowu a wu ri nkarhi lowu faneleke wo kuma tintswalo ta Xikwembu! Kambe, xana xiringanyeto xakwe a xi ri xinene hi laha a xi twala ha kona?

Xana Hi Tshuka Hi Ehleketa Hi Mukhuva Lowu?

Nkarhi wun’wana hi nga tikuma hi ehleketa ku fana ni dokodela loyi. Kumbexana hi chuhisiwa hi nkaneto lowu ngo teketana wu humelela exikolweni kumbe entirhweni. Kumbe hi nga tikuma hi ri exiyin’weni lexi hetaka matimba laha hi tshikileriwaka ku endla xo karhi lexi lwisanaka ni ripfalo ra hina. Hi ku kotlana ni swilo, hi nga voyamela eku hlawuleni ka ndlela yo olova ivi hi endla leswi hi swi tivaka leswaku swi hoxile, hi ri ni xikongomelo xo kombela ndzivalelo endzhaku.

Kumbe vanhu va nga ringiwa hi mimboyamelo leyi hoxeke ya vona vini. Hi xikombiso, jaha ri nga ha tikuma ri ri exiyin’weni lexi ri ringekaka ngopfu leswaku ri tikhoma hi ndlela yo biha. Ematshan’wini yo lwa ni ku navela ko biha, a nga pfumela ku tikhoma hi ndlela yo biha, a ri ni xikongomelo xa leswaku u ta lulamisa timhaka ni Xikwembu endzhaku ka nkarhi. Van’wana va fikele ni laha va endlaka xidyoho lexikulu ku nga khathariseki leswaku va nga susiwa evandlheni ra Vukreste kumbe e-e. Handle ko kanakana, va ehlekete va ku: ‘Ndzi ta rindza ku hundza nkarhinyana. Kutani ndzi ta tisola ivi ndzi vuyiseriwa.’

Swiyimo leswi hinkwaswo swi fana hi swilo swimbirhi. Xo sungula, vanhu vo tihoxa ematshan’wini yo lwela ku endla leswinene. Xa vumbirhi, va vona onge loko se va endle xidyoho, Xikwembu xi to teketana xi va rivalela loko va kombela sweswo.

Hi Rihi Vonelo Lerinene?

Xana leswi swi komba ku tlangela tintswalo ta Xikwembu hi ndlela leyi faneleke? Ehleketanyana hi tintswalo teto swa nkarhinyana. Yesu u te: “Hikuva Xikwembu xi rhandzile misava swonghasi, xi ko xi nyika N’wana wa xona la nga un’we, leswaku un’wana ni un’wana la pfumelaka ka yena, a nga lovi, kambe a va ni vutomi lebyi nga heriki.” (Yohane 3:16) Muapostola Yohane u hlamusele ndlela leyi tintswalo teto ti tirhaka ha yona loko a ku: “Vana vanga, ndzi mi tsalela timhaka leti leswaku mi ta ka mi nga dyohi; kambe loko un’wana a tshuka a dyoha, hi ni muyimeri eka Tatana, a nga Yesu Kriste la lulameke.” (1 Yohane 2:1) Hikwalaho, loko hi wela exidyohweni hikwalaho ka ku nga hetiseki, hi nga ta eka Xikwembu hi xikhongelo, hi kombela ndzivalelo exisekelweni xa gandzelo ra Yesu.

Hambi swi ri tano, xana leswi swi vula leswaku a swi na mhaka leswaku ha dyoha kumbe a hi dyohi, ntsena loko hi kombela ndzivalelo endzhaku? Doo. Tsundzuka marito yo sungula ya ntshaho lowu: “Ndzi mi tsalela timhaka leti leswaku mi ta ka mi nga dyohi.” Marito man’wana ya Yohane endzimaneni yoleyo ma komba lunghiselelo ra Yehovha ra rirhandzu ro langutana ni ku nga hetiseki ka hina. Kambe, hi fanele hi ringeta swinene hi laha hi nga kotaka ha kona leswaku hi papalata ku dyoha. Loko hi nga endli tano, hi komba ku pfumala xichavo eka rirhandzu ra Xikwembu hi ndlela leyi khomisaka tingana, hi fana ni lava vuriwaka hi Yuda, lava tirhiseke tintswalo ta Xikwembu ku titsetselela ha tona leswaku va tikhoma hi ndlela yo biha.—Yuda 4.

Ku languta tintswalo ta Xikwembu tanihi mulamuleri la nga ta hi lamulela ku nga khathariseki leswaku hi endla yini, swo tsongahata tintswalo ta Xikwembu, nakambe swi endla leswaku xidyoho xi vonaka onge a xi bihanga ngopfu. Leswi a hi ntiyiso nikatsongo. Muapostola Pawulo u byele Tito a ku: “Hakunene tintswalo ta Xikwembu ta ku ponisa vanhu hinkwavo, ti humeseriwe erivaleni; ti hi dyondzisa ku tshika ku hanya ehandle ka Xikwembu ni ku navela swa misava, kutani hi hanya emisaveni leyi hi ku tikhoma, ni ku lulama, ni vukhongeri.”—Tito 2:11, 12.

Pawulo u kombe ku tlangela kakwe tintswalo ta Xikwembu hi ndlela leyi a lweke ni ku nga hetiseki kakwe ha yona. U te: “Kambe ndzi xanisa miri wa mina, ndzi wu endla hlonga, leswaku ndzi nga kumeki ndzi ri la tsandzekaka endzhaku ka loko mina ndzi ta va ndzi dyondzisile van’wana.” (1 Vakorinto 9:27) Pawulo a nga teketananga a swi ba hi makatla leswaku ana nkarhi ni nkarhi u boheka ku dyoha. Xana hina hi fanele hi swi ba hi makatla?

Langutelo Ra Yesu

Nkarhi wun’wana, Yesu u kombe ndlela leyi a languta ha yona mianakanyo ya ku tshika leswi nga swinene u landzela ndlela yo olova leswaku u ta balekela ku xaniseka. Loko a sungula ku byela vadyondzisiwa vakwe hi rifu rakwe leri a ri tshinela ra gandzelo, Petro u ringete ku n’wi khongotela ku ri papalata a ku: “Hosi, u nga tikarhati; leswi a swi nge tshuki swi ku humelerile.” (NW) Xana Yesu u angurise ku yini? “‘Suka ka mina Sathana! U xikhunguvanyiso eka mina, hikuva a wu ehleketi swa Xikwembu, u ehleketa swa vanhu ntsena.’”—Matewu 16:22, 23.

Marito ya Yesu yo tshinya Petro hi matimba ma komba kahle leswaku Yesu u arile ku teka ndlela yo olova leyi a yi katsa ku lwisana ni ku rhandza ka Xikwembu. Rhekhodo yi komba leswaku u tiye a landzela ndlela leyinene, a ri karhi a karhatiwa hi Sathana. Eku heteleleni u tseketseriwile, a himeteriwa, ivi a dlayiwa ku vava. Hambi swi ri tano, a nga landzulanga, naswona hikwalaho ka leswi, u swi kotile ku nyikela vutomi byakwe byi va nkutsulo wa hina. Kunene, a nga tiyiseli leswi hinkwaswo leswaku hi nga ‘tikarhati’ loko ku va ni swirhalanganya kumbe miringo!

Ha Yesu ku vuriwe leswi: “U rhandzile ku lulama, u vengile ku homboloka.” (Vaheveru 1:9) Ku teka ndlela yo olova swi tala ku katsa ku pfumala nawu. Hikwalaho, loko hakunene hi venga leswi—ku fana na Yesu—nkarhi hinkwawo a hi nge pfumeli ku landzula. Ebukwini ya Swivuriso, Yehovha u te: “Ṅwana nga, tlhariha, u ṭakisa mbilu ya mina, nḍi ta kuma rito e ku hlamula la’v̌a nḍi rukanaka.” (Swivuriso 27:11) Ku lulama ka Yesu loku ringaniseriweke, loku nga hundzukiki, ku tsakise ngopfu mbilu ya Yehovha. Na hina hi nga tsakisa Yehovha hi ndlela yo tano loko hi landzela ndlela ya Yesu ya vutshembeki.—1 Petro 2:23.

Ku Leteriwa Hi Ku Tiyisela

Muapostola Petro u tsale a ku: “Mhaka leyi ya mi tsakisa, hambiloko sweswi ma ha fanela ku twa ku vava nkarhinyana, hikwalaho ka miringo ya tinxaka-xaka. Miringo leyi yi endla leswaku ku pfumela ka n’wina, loku tlulaka nsuku hi nkoka, ku vonaka ku tiyile. Nsuku, hambileswi wu ringetiwaka hi ndzilo, wa onhaka; kambe ku pfumela ka n’wina, loko ku tiyile, ku ta mi tisela ku dzunisiwa ni ku twarisiwa ni ku fundzhiwa, siku Yesu Kriste a humelelaka.” (1 Petro 1:6, 7) Leswi hi nga hetisekangiki naswona hi hanyaka exikarhi ka misava ya Sathana, hi ta tshamela ku langutana ni miringo. Hi laha Petro a kombisaka ha kona, leswi swi nga tirha ntirho lowunene. Swi ringa ripfumelo ra hina, ku komba leswaku ri tsanile kumbe ri tiyile.

Nakambe swi tirha ku hi letela. Yesu “ú dyondzile ku yingisa hi mhaka ya ku xaniseka ka yena.” (Vaheveru 5:8) Na hina hi nga dyondza ku yingisa, swin’we ni ku tshembela eka Yehovha, loko hi tiyisela eku ringiweni. Naswona ku dyondza loku ku ta ya emahlweni ku kondza ku hela, hi laha Petro a vulaka ha kona a ku: ‘Xikwembu xi ta hetisa ndzetelo wa n’wina, xi ta mi tiyisa, xi mi nyika matimba.’—1 Petro 5:10.

Hambi swi ri tano, loko hi landzula loko hi ringiwa, hi kombisa leswaku hi matoya kumbe leswaku hi tsanile, a hi n’wi rhandzi ngopfu Yehovha ni leswo lulama kumbe hi pfumala ku tikhoma. Ku tsana kun’wana ni kun’wana ko tano ku veka vuxaka bya hina ni Xikwembu ekhombyeni lerikulu. Hakunene, xitsundzuxo xa Pawulo xi nga va ntiyiso eka hina: “Loko hi dyoha ha vomu endzhaku ka loko hi nyikiwile ku tiva ntiyiso, a ka ha ri na mhamba yin’wana yo susa swidyoho.” (Vaheveru 10:26) Xo sungula, swa antswa swinene ku ka u nga dyohi ku ri ni ku pfumelela ku tsana ku ku vangela khombo ro lahlekeriwa hi ntshembo hinkwawo wo kuma vutomi!

Vutshembeki Lebyi Nga Hundzuka-hundzukiki

Emasikwini ya muprofeta Daniyele, Vaheveru vanharhu va xungetiwe ku dlayiwa hi ndzilo loko va nga gandzeli xifaniso. Xana va angurise ku yini? “Loko ŝi nga endleka leŝaku Šikwembu ša hina leši hi ši tirelaka, ši hi ponisa, ši ta hi ponisa e kheleni ra nḍilo lo’wo lev̌a ni v̌okweni ra wena, hosi. Ni loko ŝi nga ri ŝeŝo, tiv̌a, wena hosi, leŝaku hi nga ka hi nga tireli ŝikwembu ŝa wena, hi nga ka hi nga nkhinsami e mahlweni ka šifaniso ša nsuku leši u ši yimiseke.”—Daniyele 3:17, 18.

Va teke goza rero hikuva a va lava ku endla leswinene. A va ta fa ku ri ni ku tlhentlha. Ntshembo wa vona a wu ri eku pfukeni ka vafi. Hambi swi ri tano, loko Xikwembu xi va ponisa, a swi ta antswa ngopfu. Kambe ku tiya ka vona a ku nga hundzuka-hundzuki. Kutani malandza ya Xikwembu ma fanele ma endla tano nkarhi hinkwawo.

Esikwini ra hina, van’wana lava aleke ku landzula va pfaleriwile, va xanisiwa, ni ku dlayiwa. Van’wana va titsone swilo leswi vonakaka, va hlawula ku tshama va ri swisiwana ku ri ni ku fuwa va tshika ku tihita ku hlayisa milawu leyinene. Ku humelele yini hi wansati la nga Mukreste, loyi ku vulavuriweke ha yena eku sunguleni ka xihloko lexi? U lemuke nsusumeto wa musa kambe lowu hoxeke wa dokodela, kambe a nga ri landzulanga ripfumelo rakwe. Ku ri na sweswo, ku xixima kakwe milawu ya Yehovha ku n’wi endle a ala vuhandzuri. Lexi tsakisaka, hambi swi ri tano u hlakarherile naswona u hambete a tirhela Yehovha hi ku chivirika. Hambi swi ri tano, loko a tiya exiyin’weni xakwe, a a nga swi tivi leswaku ku ta humelela yini, kambe a lunghekele ku veka mhaka hinkwayo emavokweni ya Yehovha.

I yini lexi n’wi pfuneke ku tshama a tiyile ehansi ka ntshikilelo? A nga ringetanga ku titshemba, naswona ku hava nandza ni un’we wa Xikwembu la faneleke a titshemba. Tsundzuka, “Šikwembu i v̌utšhav̌elo bya hina ni matimba ya hina, i ku pfuna lo’ku kumiwaka kusuhi e mapfalweni.” (Pisalema 46:1) Vona ndlela leyi swi antswaka ha yona ku hundzukela eka Xikwembu leswaku xi ku pfuna loko u ri endzingweni, ku ri ni ku dyoha ivi u hundzukela eka xona leswaku xi ku komba tintswalo!

Ina, hi nga tshuki hi tlanga hi tintswalo letikulu ta Xikwembu. Ematshan’wini ya sweswo, a hi hlakuleleni ku navela ka xiviri ko va hi endla leswinene, hambi loko hi langutane ni swirhalanganya. Leswi swi ta tiyisa vuxaka bya hina na Yehovha, ni ku hi letela hi ndlela leyi lavekaka leswaku hi ta kuma vutomi lebyi nga heriki, ni ku kombisa xichavo lexi faneleke eka tintswalo ta Xikwembu. Ku tikhoma ko tano ka vutlharhi ku ta tsakisa mbilu ya Tata wa hina la nge matilweni.

[Xifaniso lexi nga eka tluka 24]

Ntshembo lowu heleleke eku pfukeni ka vafi wu pfune Vaheveru vanharhu leswaku va tshama va tshembekile