Ndzima 133

Yesu U Hetisisa Hinkwaswo Leswi Xikwembu Xi N’wi Kombelaka Swona

LOKO Hosi leyi nga Nghwazi, Yesu Kriste, yi susa Sathana ni misava ya yena leyo biha, vona xivangelo lexi nga ta va kona xa ntsako! Mfumo wa Yesu wa Gidi ra Malembe eku heteleleni wa sungula!

Ehansi ka nkongomiso wa Yesu kun’we ni tihosi ta yena, vaponi va Armagedoni va ta basisa marhumbi lama siyiweke hi nyimpi yoleyo yo lulama. Kumbexana vaponi va laha misaveni nakambe va ta veleka vana hi nkarhi wo karhi, naswona lava va ta hlanganyela entirhweni wo tsakisa wo rima misava yi va ntanga wo saseka lowu fanaka ni phaka.

Hi ku famba ka nkarhi, Yesu u ta humesa timiliyoni leti nga hlayekiki emasirheni ya tona leswaku ti tsakela Paradeyisi leyi yo saseka. U ta endla leswi leswaku a hetisisa xitshembiso xa yena lexi nge: “Nkarhi wa ta lowu hinkwavo lava nge masirheni . . . va [nga] ta huma.”

Exikarhi ka lava Yesu a va pfuxaka, ku ta va ni khale ka mudyohi loyi a feke a ri etlhelo ka yena emhandzini ya nxaniso. Tsundzuka leswaku Yesu u n’wi tshembisile: “Kunene ndzi ri ka wena namuntlha, u ta va na mina eParadeyisini.” E-e, wanuna yoloye a nge tekeriwi etilweni ku ya fuma na Yesu tanihi hosi, naswona Yesu a nge vi munhu wa nyama kutani a tlhela a hanya eParadeyisini emisaveni na yena. Ematshan’wini ya sweswo, Yesu u ta va ni khale ka mudyohi hi ndlela ya leswi A nga ta n’wi pfuxela evuton’wini eParadeyisini ni ku vona leswaku swilaveko swa yena swa nyama ni swa moya, swa khathaleriwa, hi laha swi kombisiweke ha kona eka tluka leri landzelaka.

Anakanya ha swona! Ehansi ka nkhathalelo wa Yesu wa rirhandzu, ndyangu hinkwawo wa vanhu—vaponi va Armagedoni, vana va vona ni magidi ya timiliyoni ta lava pfuxiweke eku feni lava n’wi yingisaka—va ta hanyela ku ya eku hetisekeni. Yehova, hi N’wana wa yena wa vuhosi, Yesu Kriste, u ta tshama na vanhu hi tlhelo ra moya. “Kutani” hi laha rito leri Yohane a ri tweke ri huma etilweni ri vulaka ha kona, “xi ta sula mihloti hinkwayo emahlweni ya vona ni rifu a ri nga ha vi kona; hambi ya ri mahlomulo kumbe ku rila kumbe ku vaviseka a swi nga ha vi kona.” A ku na munhu emisaveni la nga ta xaniseka kumbe ku vabya.

Eku heleni ka Mfumo wa Yesu wa Gidi ra Malembe, xiyimo xi ta va hi laha Xikwembu a xi swi kunguhate ha kona eku sunguleni loko xi byela mpatswa wo sungula, Adamu na Evha, leswaku va andza va tata misava. Ina, misava yi ta tatiwa hi rixaka leri lulameke ra vanhu lava hetisekeke. Leswi swi va tano hikuva mimpfuno ya gandzelo ra nkutsulo ra Yesu yi ta va yi tirhisiwe eka un’wana ni un’wana. Rifu leri vangiweke hi ku dyoha ka Adamu a ri nge he vi kona!

Xisweswo, Yesu u ta va a hetisise hinkwaswo leswi Yehova a n’wi kombeleke swona. Hikwalaho, eku heleni ka gidi ra malembe, u ta tlherisela Mfumo ni ndyangu lowu hetisekeke wa vanhu eka Tata wa yena. Kutani Xikwembu xi ta humesa Sathana ni mademona ya yena ekheleni leri fanaka na rifu, laha ku nga riki na ntirho. Hi xikongomelo xihi?

Ina, eku heleni ka gidi ra malembe, vo tala va lava hanyaka eParadeyisini va ta va lava pfuxiweke lava ripfumelo ra vona ri nga ringiwangiki. Loko va nga si fa, a va kulanga va swi tiva switshembiso swa Xikwembu kutani a va kombisanga ripfumelo eka swona. Kutani ke, loko va pfuxiwile, va dyondzisiwa mintiyiso ya Bibele, a swi va olovela eParadeyisini, tanihi leswi a ku nga ri na nkaneto leswaku va tirhela Xikwembu. Kambe, loko Sathana a nyikiwe nkarhi wo ringeta ku va yimisa ku hambeta va tirhela Xikwembu, xana a va ta tikombisa va ri lava tshembekeke ehansi ka ndzingo? Ku hlamula xivutiso lexi, Sathana u ta ntshuxiwa.

Nhlavutelo leyi nyikiweke Yohane yi paluxa leswaku endzhaku ka Mfumo wa Yesu wa Gidi ra Malembe, Sathana u ta tikombisa a ri la humelelaka eku hambukiseni ka nhlayo leyi nga tivekiki ya vanhu eku tirheleni ka Xikwembu. Kambe endzhaku, loko ndzingo wo hetelela wu herile, Sathana, mademona ya yena ni hinkwavo lava a kotaka ku va hambukisa va ta loviseriwa makumu. Hi tlhelo rin’wana, vaponi lavo tshembeka, lava ringiweke hi laha ku taleke, va ta hambeta va hanya leswaku va tsakela mikateko ya Tata wa vona wa le tilweni hi laha ku nga heriki.

Entiyisweni, Yesu u teke xiphemu xa nkoka eku hetisiseni ka swikongomelo leswi vangamaka swa Xikwembu naswona u ta hambeta a va tano. Vona vumundzuku byo tsakisa lebyi hi nga byi tsakelaka hikwalaho ka hinkwaswo leswi a swi hetisisaka tanihi Hosi leyikulu ya le tilweni ya Xikwembu. Hambi swi ri tano, a hi nge rivali hinkwaswo leswi a swi endleke loko a ha ri munhu wa nyama.

Yesu hi ku swi rhandza u tile emisaveni kutani a hi dyondzisa hi ta Tata wa yena. Ku tlula leswi, u kombise timfanelo ta nkoka ta Xikwembu. Timbilu ta hina ta tsaka loko hi xiya xivindzi xa yena lexikulu, ni matimba, vutlhari bya yena lebyi nga pimanisekiki, vuswikoti bya yena lebyikulu tanihi mudyondzisi, vurhangeri bya yena byo pfumala ku chava ni tintswalo ni ntwela-vusiwana wa yena. Loko hi tsundzuka ndlela leyi nga hlamuselekiki leyi a xanisiweke ha yona loko a nyikela nkutsulo, lowu ha wona ntsena hi nga kumaka vutomi, hakunene timbilu ta hina ti susumeteriwa ku n’wi tlangela!

Kunene, vona wanuna wonghasi loyi hi n’wi voneke edyondzweni leyi ya vutomi bya Yesu! Vukulu bya yena byi le rivaleni naswona hi lebyi hlulaka. Hi susumeteleka ku phindha marito ya mufumi wa Rhoma, Pontiyo Pilato, lama nge: ‘Vonani! Hi yoloye wanuna!’ Ina, ‘Wanuna,’ nghwazi leyi tshameke yi hanya!

Hi ku amukela ka hina lunghiselelo ra gandzelo ra yena ra nkutsulo, ndzhwalo wa xidyoho ni rifu leri hi ri kumeke eka Adamu hi ndzhaka swi nga susiwa eka hina, naswona Yesu a nga va “Tatana [wa hina] la nga riki na ku hela.” Hinkwavo lava nga ta kuma vutomi lebyi nga heriki va fanele va nga tivi Xikwembu ntsena kambe ni N’wana wa xona, Yesu Kriste. Onge ku hlaya ni ku dyondza ka wena buku leyi swi nga ku pfuna ku amukela vutivi byo tano lebyi nyikaka vutomi! 1 Yohane 2:17; 1:7; Yohane 5:28, 29; 3:16; 17:3; 19:5; Luka 23:43; Genesa 1:28; 1 Vakorinto 15:24-28; Nhlavutelo 20:1-3, 6-10; 21:3, 4; Esaya 9:6.

▪ Ri ta va rihi lunghelo ro tsakisa ra vaponi va Armagedoni ni vana va vona?

▪ Ku engetela eka vaponi va Armagedoni ni vana va vona i vamani lava nga ta tsakela Paradeyisi, naswona Yesu u ta va na vona hi ndlela yihi?

▪ Xiyimo xi ta va xihi eku heleni ka gidi ra malembe, naswona Yesu u ta endla yini hi nkarhi wolowo?

▪ Ha yini Sathana a ta humesiwa ekheleni, naswona eku heteleleni ku ta humelela yini ha yena ni hinkwavo lava va n’wi landzelaka?

▪ Yesu a nga va “Tatana [wa hina] la nga riki na ku hela” hi ndlela yihi?