Vantshwa Va Vutisa . . .

Ha Yini Ndzi Fanele Ndzi Vulavula Hi Xikwembu?

“Un’wana ni un’wana u ni vukhongeri bya yena n’wini. A wu fanelanga u ringeta ku sindzisa vanhu van’wana leswaku va pfumela eka Xikwembu xa wena.”—Racish wa malembe ya 14 hi vukhale, wa le Guyana.

“Ndza kanakana ku vulavula hi Xikwembu hikuva ndzi chava ku hlekuriwa.”—Rohan wa malembe ya 17 hi vukhale, wa le Guyana.

“Hi fanele hi vulavula hi Xikwembu hikuva hi xona Muvumbi wa hina, hi xona xi hi nyikeke vutomi.”—Marco wa malembe ya 13 hi vukhale, wa le Jarimani.

RHIYA ndleve u yingisa ntlawa wa vantshwa loko wu ri karhi wu vulavula naswona endzhaku ka sweswo swi nga ha endleka u fikelela makumu lawa ma nga tsakisiki: Hakunene Xikwembu a ku vulavuriwi ha xona ngopfu exikarhi ka vantshwa. Loko wo vulavula hi mintlango, swiambalo, tibayisikopo ta sweswinyana kumbe varimbewu leri hambaneke, hi ntolovelo u ta va u sungule bulo leri tsakisaka. Kambe wo tiya nhlana u vulavula hi Xikwembu, ku to tititi, hi nkarhinyana.

Vantshwa van’wana a va pfumeli eka Xikwembu. Va nga ha vula leswaku tanihi leswi va nga swi kotiki ku xi vona, swi vula leswaku a xi kona—ku vulavula ha xona swi vonaka ku ri ku tlanga hi nkarhi. Hambi swi ri tano, a va talanga vantshwa lava nge Xikwembu a xi kona. Hi ku ya hi vukambisisi lebyi endliweke hi vandla ra Gallup, vantshwa va le United States va kwalomu ka 95 wa tiphesente va pfumela eka Xikwembu. Kahle-kahle, vandla ra Gallup ri gimete hi ku vula leswi: “Eka vantshwa vo tala, Xikwembu lexi va pfumelaka eka xona a ko va nchumu lowu ehleketiwaka ntsena, kambe i Xikwembu xa xiviri lexi xiyaka swiendlo swa vona ivi xi va hakela kumbe ku va twisa ku vava hi laha ku faneleke.” Kutani ke, ha yini vantshwa vo tala va kanakana ku vulavula hi leswi va swi pfumelaka?

Leswi Endlaka Leswaku Van’wana Va Nga Vulavuli

Swi vonaka onge vo tala va ehleketa leswaku a hi swinene ku vulavula hi timhaka ta ripfumelo ni leswaku timhaka ta vukhongeri i swinene loko ti hlayisiwa ti ri xihundla xa munhu hi xiyexe. Vantshwa van’wana yi vonaka yi va nonon’hwela mhaka ya ku vulavula hi Xikwembu. ‘A swi amukeleki eka vantshwa ku endla tano,’ hi leswi vona va vulaka swona.

Ku nga khathariseki leswaku tintangha ta wena ti swi vonisa ku yini, xana wena u yima kwihi emhakeni leyi? Xivutiso lexi i xa nkoka eka wena ngopfu-ngopfu loko u kurisiwe tanihi un’wana wa Timbhoni ta Yehovha. Ha yini? Hikuva ku nyikela vumbhoni, ku byela van’wana hi Xikwembu, hi rona rimitsu-nkulu ra ripfumelo ra tona!—Esaya 43:9, 10; Matewu 24:14.

Hambi swi ri tano, hikwalaho ko hetiwa mongo hi nkaneto lowu va hlangavetanaka na wona minkarhi yin’wana, vantshwa van’wana va Timbhoni va tsandzeka ku hlanganyela entirhweni wa le rivaleni wa ku chumayela—kumbe va hlanganyela ntsena hi ku sindzisiwa hi vatswari va vona. Van’wana va hlanganyela entirhweni wolowo, kambe va navela leswaku a nga vi kona na un’we wa vanghana va vona va le xikolweni loyi a va vonaka loko va chumayela. Exikolweni, van’wana va ringeta ku tumbeta ripfumelo ra vona ra vukhongeri. Hakanyingi hi leswi va chavaka ku hlekuriwa hi vanghana va vona va le tlilasini. Ryan lontsongo wa pfumela: “A ndzi chava ku vulavula hi Xikwembu hikuva vanghana va mina a va ndzi hlekula, kutani a ndzi ri hava xivindzi xo yisa bulo emahlweni.”

Nakambe ku ni lava va nga hlanganyeliki hi ku chava leswaku a va nge swi koti ku hanya hi ku pfumelelana ni mimpimanyeto ya Bibele hi ku helela. Hi ku vona ntlhamu wa “ku navela loku telaka lavantshwa,” va ehleketa leswaku swa antswa va nga tivuli leswaku i Vakreste hi ku chava leswaku va nga tshuka va endle swo karhi leswi hoxeke.—2 Timotiya 2:22.

Van’wana a va vulavuli hi Xikwembu hikuva va titwa va nga faneleki. Wilton wa malembe ya 19 hi vukhale u swi veka hi ndlela leyi: “Ndzi kume swi ndzi tikela ngopfu ku vulavula hi Xikwembu eka vatirhi-kulorhi hikuva a ndzi titwa ndzi nga ri na swivangelo leswi eneleke swo seketela timhaka leti a ndzi va byela tona hi xona. A ndzi ehleketa leswaku loko vo ndzi vutisa hi leswi ndzi swi pfumelaka, a ndzi nga ta va hlamula hi ndlela leyi enerisaka.”

Ndzhwalo Wa Mukreste

Xana swi nga endleka leswaku a wu chava ku vulavula hi Xikwembu hikwalaho ka swivangelo leswi fanaka? Loko swi ri tano, a hi wena ntsena u titwisaka xisweswo. Vantshwa van’wana va dodombisane ni xiphiqo lexi fanaka. Hambi swi ri tano, van’wana va swi xiyile leswaku ku nga khathariseki swilo hinkwaswo leswi nga endlaka leswaku munhu a nga hlanganyeli, kambe ku ni swivangelo leswi twalaka swa ku byela van’wana hi Xikwembu. Xana hi swihi swin’wana swa swona?

Marco lontsongo, la boxiweke eku sunguleni, u swi veke kahle loko a ku Xikwembu i “Muvumbi wa hina, hi xona xi hi nyikeke vutomi.” (Nhlavutelo 4:11) Ina, vutomi i nyiko ya risima. Mupisalema u vule leswi hi Xikwembu: “Nseledyana ya v̌utomi yi na wena.” (Pisalema 36:9) Leswi u kumeke nyiko leyi, xana a wu fanelanga u kombisa ku yi tlangela?

Ndlela yin’wana yo kombisa ku nkhensa i ku dzunisa Yehovha Xikwembu emahlweni ka van’wana. I Mutumbuluxi wa dyambu, n’hweti, mpfula, moya lowu hi wu hefemulaka ni swakudya leswi hi swi dyaka. (Mintirho 4:15-17) “Nyiko yin’wana ni yin’wana leyo saseka ni minkateko hinkwayo leyi hetisekeke, swi ta hi le henhla,” ku vule mudyondzisiwa Yakobo. (Yakobo 1:17) Xana wa xi nkhensa Xikwembu hi tinyiko leti? (Vakolosa 3:15) Xana hi yihi ndlela leyinene leyi u nga kombisaka ku nkhensa ka wena eka Xikwembu handle ko vulavula hi xona?—Luka 6:45.

Kambe, entiyisweni Xikwembu xi hi lerisa leswaku hi vulavula ha xona. N’wana wa xona, Yesu Kreste, u lerise Vakreste a ku: “Hikokwalaho, yanani eka vamatiko hinkwavo, mi va endla vadyondzisiwa.” (Matewu 28:19, 20) Vantshwa a va vekeriwanga etlhelo eka vutihlamuleri bya ku hlanganyela entirhweni lowu. Mupisalema wa hi lerisa: “Ḍunisani Yehova . . . madžaha ni v̌anhwana, ŝikoša ni v̌ana! A v̌a ḍunise v̌ito ra Yehova! Hikuv̌a v̌ito ra yena hi rona ntsena le’ri tlakukeke; v̌uhosi bya yena byi tlakukile ku tlula misav̌a ni matilo.” (Pisalema 148:7, 12, 13) Kambe a wu fanelanga u languta xiavelo lexi xi ri ndzhwalo. Kahle-kahle, i lunghelo—entiyisweni u nga va un’wana wa “vatirhi-kulo[bye] eka Xikwembu.”—1 Vakorinto 3:9.

Ku vuriwa yini hi loko u titwa u nga faneleki? Muprofeta Yeremiya u titwe hi ndlela leyi fanaka emikarhini ya Bibele. U te: “Oho! Hosi Yehova! v̌ona, a nḍi tiv̌i ku v̌ulav̌ula, hikuv̌a nḍa ha ri šihlangi.” Xana Yehova u te yini? “U nga ṭhuki u ku: Nḍi šihlangi! hikuv̌a u ta famba e ka hikwav̌o lav̌a nḍi nga ta ku ruma ka v̌ona, kambe u v̌ulav̌ula hikwaŝo leŝi nḍi nga ta ku lerisa ŝona.” (Yeremiya 1:6, 7) Hi ku pfuniwa hi Yehovha, Yeremiya u endle sweswo ku ringana 40 wa malembe!

Swa fana ni le ka Vakreste namuntlha, ‘mhaka ya leswaku hi faneleka kahle yi huma eka Xikwembu.’ (2 Vakorinto 3:5) Hambi loko u ri ni tingana hi ntumbuluko, u ri mbulwa, Xikwembu xi nga ku pfuna leswaku u va ni xivindzi xo vulavula. Evandlheni ra Vukreste ku ni malunghiselelo lama nga ku pfunaka leswaku u ‘faneleka kahle’ tanihi mudyondzisi wa Rito ra Xikwembu. Loko u vona onge u lava mpfuno wo karhi wa munhu hi xiyexe, ha yini u nga vulavuli ni un’wana wa valanguteri va vandlha? Nkarhi wun’wana swi nga ha lava ntsena leswaku u va ni xiyimiso xa dyondzo ya Bibele ya munhu hi xiyexe kumbe u tirha ni un’wana la nga ni ntokoto swinene.

Leswi U Nga Swi Hetisisaka

Ku vulavula hi Xikwembu swi nga ku endla u titwa u hetisise swo karhi. Hi xikombiso, vanghana va wena vo tala va lava tinhlamulo, va lava mpfuno hakunene. Va hava nkongomiso naswona a va byi voni kahle vumundzuku. Va tivutisa, ‘Ha yini hi ri laha? Xana hi kongome kwihi? Ha yini misava yi ri ni swiphiqo swo tala swonghasi?’ Tanihi Mukreste, u na tona tinhlamulo, naswona handle ko kanakana u le xiyin’weni lexinene xa ku hundzisela vutivi byo tano eka tintangha ta wena. Tanihi leswi mi ringanaka, va nga ha swi tsakela ku vulavula na wena ematshan’weni yo vulavula ni munhu lonkulu.

I ntiyiso leswaku minkarhi yin’wana a va nge ku yingisi. Kambe u nga ha va kuma vanhu lava amukelaka rungula ra Bibele. Muntshwa un’wana la nga Mbhoni a a tshame ebazini a ri karhi a hlaya buku yakwe leyi nge Swivutiso Leswi Vantshwa Va Swi Vutisaka—Tinhlamulo Leti Tirhaka.a Mufana loyi a tshame etlhelo ka yena u sungule ku hlaya na yena. Mufana loyi u te: “Leyi i buku leyinene! Buku leyi yi vulavula swo tala hi Xikwembu. Vanhu vo tala a va byi tsakeli vukhongeri.” Muntshwa loyi wa Mbhoni u tirhise nkarhi lowu leswaku a va ni bulo leri naveke hi vito ra Xikwembu.

I ntiyiso leswaku loko u tivula Mukreste, u fanele u hanya tanihi hi yena. (1 Petro 2:12) Ku tikhoma lokunene ka Vukreste ku tlhandleka ntikelo eka rungula ra wena. Ehleketa hi ntokoto wa muntshwa la vuriwaka Eric. A a tsakisiwa hi ku tikhoma lokunene ka vantshwa lava nga Timbhoni exikolweni xa yena. Leswi swi n’wi endle a tsakela ku dyondza swo tala hi Xikwembu. Ku sunguriwe dyondzo ya Bibele na yena, namuntlha i Mukreste la khuvuriweke la tirhaka eyindlu-nkulu ya misava hinkwayo ya Timbhoni ta Yehovha eNew York.

Ku vulavula hi Xikwembu swi nga ku pfuna na wena! Ku nga tirha tanihi xisirhelelo. Loko vanghana va wena va swi tiva leswaku u wun’wana wa Timbhoni ta Yehovha, vo tala va ta ku xixima. A va nge tali ku ku tshikilela leswaku u endla leswo biha, loko va xiya leswaku u ni mimpimanyeto leyi tlakukeke ya ku tikhoma ni loko va tiva leswaku u ta va angula hi ku va nyikela vumbhoni.

Kavula, leswi a swi vuli swona leswaku nkarhi wun’wana ni wun’wana loko u pfula nomu u fanele u tshaha matsalwa. Wa ha yi tsakela mintlango, swiambalo kumbe vuyimbeleri naswona u ta rhandza ku vulavula hi swilo swo fana ni sweswo nkarhi wun’wana. Kambe tsundzuka: “Nomo wu vula leswi mbilu yi teleke swona.” (Matewu 12:34) Loko rirhandzu ra Xikwembu ri ri embilwini ya wena hakunene, hi ntolovelo u ta rhandza ku vulavula ha xona. Enkandziyisweni lowu landzelaka, hi ta vulavula hi tindlela tin’wana leti u nga swi endlaka ha tona hi laha ku humelelaka.

[Nhlamuselo ya le hansi]

[Xifaniso lexi nga eka tluka 15]

Xana wa chava ku voniwa hi vanghana va wena va le xikolweni loko u ri entirhweni wa le rivaleni wo chumayela?