Ndyangu Wa Vukreste Wu Endla Swilo Swin’we
“Ndza mi khongotela vamakwerhu, [leswaku] mi hlangana mi va van’we eku anakanyeni ne makungwini.”—1 VAKORINTO 1:10.
1. Xiyimo hi xihi malunghana ni ku hlangana emindyangwini yo tala?
XANA ndyangu wa wena wu hlanganile? Kumbe xana un’wana ni un’wana u vonaka a endla leswi a swi rhandzaka? Xana mi endla swilo swin’we? Kumbe a hi kanyingi laha hinkwenu mi vaka ndhawu yin’we hi nkarhi lowu fanaka? Rito leri nge “ndyangu” ri vula yindlu leyi hlanganeke.a Kambe a hi mindyangu hinkwayo yi hlanganeke. Mudyondzisi un’wana wa le yunivhesiti ya le Britain u kale a ku: “Ematshan’wini yo va ndyangu wu ri vumbiwa bya vanhu lava twananaka, . . . i xihlovo xa ku nga khathalelani.” Xana sweswo swi tano hi ndyangu wa wena? Loko swi ri tano, xana wu fanele ku va hi ndlela yoleyo?
2. Hi vahi vanhu lava ku vulavuriwaka ha vona eBibeleni lava kombisaka vumbhoni bya leswaku a va huma emindyangwini leyinene?
2 Ku hlangana kumbe ku avana ka ndyangu hi ntolovelo swi titshege hi varhangeri, hambi i vatswari vambirhi kumbe mutswari un’we. Eminkarhini ya ku tsariwa ka Bibele, mindyangu leyi hlanganeke leyi a yi gandzela swin’we a yi kuma nkateko wa Yehovha. Leswi a swi ri tano eIsrayele wa khale, laha n’wana wa xisati wa Yefta, kun’we na Samsoni na Samuwele va nyikeleke vumbhoni hi tindlela to hambana, bya leswaku va huma endyangwini lowu chavaka Xikwembu. (Vaavanyisi 11:30-40; 13:2-25; 1 Samuwele 1:21-23; 2:18-21) Eku sunguleni ka minkarhi ya Vukreste, Timotiya, nakulobye la tshembekaka wa Pawulo loyi a fambeke na Pawulo eka man’wana ya maendzo yakwe ya vurhumiwa, u kurisiwe hi ku dyondzisiwa Matsalwa ya Xiheveru hi Luwisa, ku nga kokwa wakwe wa xisati, ni mana wakwe Yunika. U ve mudyondzisiwa ni murhumiwa la xiyekaka swonghasi!—Mintirho 16:1, 2; 2 Timotiya 1:5; 3:14, 15; nakambe vona Mintirho 21:8, 9.
Ha Yini Hi Endla Swilo Swin’we?
3, 4. (a) Hi tihi timfanelo leti faneleke ku va kona endyangwini lowu hlanganeke? (b) Xana kaya ri nga va ndhawu leyi tlulaka yindlu ntsena hi ndlela yihi?
3 Ha yini ku endla swilo swin’we swi pfuna mindyangu? Hikuva swi endla leswaku ku va ni ku twisisana ni ku xiximana lokukulu. Ematshan’wini yo titlhengusela ekule ni van’wana, ha tshinelelana swinene ni ku tiyisana. Xihloko lexi xa ha ku humelelaka eka magazini lowu nge Family Relations xi te: “Ka ha ku humelela langutelo leri twisisekaka swinene leri kombisaka timfanelo leti kongomeke ta ‘mindyangu leyo tiya.’ Timfanelo to tano ti katsa ku khathalela ni ku tlangela van’wana, vun’we, ku vulavurisana lokunene, vuswikoti byo ntlhantlha swiphiqo ni ku tiya swinene emoyeni.”
4 Loko timfanelo leti ti ri kona endyangwini, kaya a ra ha fani ni garachi ya petirolo, ku nga xivandla lexi u hundzaka u chela petirolo ntsena eka xona. A ko va yindlu ntsena. I ndhawu leyinene leyi hlanganisaka swirho swa ndyangu. I xivandla lexinene xa ku khathalelana ni rirhandzu, ntwela-vusiwana ni ku twisisana. (Swivuriso 4:3, 4) I ndhawu leyinene leyi ku kumiwaka vun’we bya ndyangu eka yona, hayi baku ra ku kwetlembetana ni ku avana. Kambe xana leswi swi fikelerisiwa ku yini?
Ku Khoma Dyondzo Ya Ndyangu Swin’we
5. I yini lexi hi xi tirhisaka leswaku hi dyondza vugandzeri bya ntiyiso?
5 Vugandzeri bya ntiyiso bya Yehovha byi dyondziwa hi ku tirhisa nyiko ya hina ya ku anakanyisisa, kumbe “matimba ya ku anakanya.” (Varhoma 12:1, NW) Mahanyelo ya hina a ma fanelanga ku lawuriwa hi mintlhaveko leyi tshamelaka ku hundzuka, tanihi leyi yi kombisiwaka hi ku chumayela ka vafundhisi va TV. Ematshan’wini ya sweswo, hi susumetiwa hi dyondzo ya hina ya nkarhi na nkarhi ya Bibele ni ku anakanyisisa hi yona, kun’we ni tibuku leti pfunaka ku dyondza Bibele leti lunghiseriwaka hi “nandza la tshembekaka, wo tlhariha.” (Matewu 24:45) Swiendlo swa hina swa Vukreste hi swi endla hikwalaho ka leswi hi kumaka mianakanyo ya Kreste eka xiyimo kumbe ndzingo wihi na wihi lowu nga vaka kona. Emhakeni yoleyo, Yehovha i Mudyondzisi wa hina Lonkulu.—Pisalema 25:9; Esaya 54:13; 1 Vakorinto 2:16.
6. Hi xihi xikombiso xa misava hinkwayo xa dyondzo ya ndyangu lexi hi nga na xona?
6 Dyondzo ya ndyangu ya Bibele yi hoxa xandla swinene eka vumoya bya ndyangu wun’wana ni wun’wana wa Vukreste. Xana dyondzo ya n’wina ya ndyangu mi yi khoma rini? Loko yi tshuka yi khomiwa handle ko kunguhatiwa kumbe hi xitshuketa, kutani a hi dyondzo leyi khomiwaka nkarhi na nkarhi, kumbe ni ku khomiwa a yi khomiwi. Ku khoma dyondzo ya ndyangu swin’we swi lava xiyimiso lexi landzeleriwaka, lexi nga hundzukiki. Kutani un’wana ni un’wana wa swi tiva leswaku u fanele ku va kona hi siku ro karhi ni nkarhi wo karhi leswaku a ta khoma nhlangano wa ndyangu wa swakudya swa moya. Swirho swa ndyangu wa Bethele leswi tlulaka 12 000 emisaveni hinkwayo swa swi tiva leswaku dyondzo ya swona ya ndyangu yi khomiwa hi Musumbunuku ni madyambu. Vatinyiketeri lava va le Bethele swa va tsakisa swonghasi loko va tsundzuka leswaku hinkwavo va khoma dyondzo leyi fanaka loko siku ri hela, eswihlaleni swa Pacific na New Zealand, kutani ku landzela Australia, Japani, Taiwan, Hong Kong, ivi ku landzela Asia, Afrika na Yuropa, kutani ku ya hetelela Amerika. Hambi leswi va nga hambana hi magidi ya tikhilomitara ni leswi va vulavulaka tindzimi to hambana swinene, dyondzo leyi ya ndyangu yi susumetela swirho swa ndyangu wa Bethele leswaku swi titwa swi hlanganile. Hambi leswi ndyangu wa n’wina wu nga wutsongo, mi nga swi kota ku hlakulela moya lowu fanaka hi dyondzo ya n’wina ya ndyangu.—1 Petro 2:17; 5:9.
7. Hi ku landza marito ya Petro, hi fanele hi ri languta njhani rito ra ntiyiso?
7 Muapostola Petro wa hi tsundzuxa: “Tanihi swihlangi leswa ha ku velekiwaka, mi fanele ku navela ntswamba lowu tengeke wa moya, leswaku ha wona mi ta kota ku kula mi ya eku ponisiweni, hikuva mi nantswile vunene bya Hosi.” (1 Petro 2:2, 3) Petro u nyikela xifaniso lexinene swonghasi hi marito wolawo! U tirhise riendli ra Xigriki, e·pi·po·theʹsa·te, leri hi ku ya hi Linguistic Key to the Greek New Testament, ri humaka eka rito leri vulaka “ku navela.” Ri vula ku navela lokukulu. Xana u tshama u yi xiya ndlela leyi xiharhi lexa ha ku velekiwaka xi lavisisaka vele ra mana wa xona ha yona, ni ndlela leyi n’wana a enerisekaka ha yona loko a mama vele ra mana wakwe? Hi fanele ku navela rito ra ntiyiso hi ndlela leyi fanaka. Mudyondzi wa Mugriki, William Barclay, u te: “Eka Mukreste wa xiviri, ku dyondza rito ra Xikwembu a hi ntirho lowu tshikilelaka, kambe swa n’wi tsakisa, hikuva wa swi tiva leswaku mbilu ya yena yi ta kuma swakudya leswi a swi lavaka eka rona.”
8. I mphikamakaneta yihi leyi langutaneke ni nhloko ya ndyangu eku fambiseni ka dyondzo ya ndyangu?
8 Nhloko ya ndyangu yi ni vutihlamuleri lebyikulu eka dyondzo ya ndyangu. U fanele ku tiyiseka leswaku dyondzo ya kona ya tsakisa eka hinkwavo ni leswaku hinkwavo va hlanganyela. Vana a va fanelanga ku vona onge dyondzo ya kona entiyisweni i ya lava kuleke ntsena. Ntikelo wa dyondzo i wa nkoka swinene ku tlula mpimo wa mhaka leyi dyondziwaka. Endla leswaku Bibele yi va leyi hanyaka. Loko swi koteka, pfuna vana va wena ku tirhisa mahlo ya mianakanyo leswaku va vona swivandla ni swivumbeko swa Palestina, laha swiendlakalo leswi ku buriwaka ha swona swi humeleleke kona. Hinkwavo va fanele ku khutaziwa leswaku va endla ndzavisiso wa vona kutani va avelana rungula leri va ri kumeke ni ndyangu. Hi ndlela leyi, vana na vona va nga ‘kula va ri karhi va tirhela Yehovha.’—1 Samuwele 2:20, 21.
Ku Va Swin’we Eku Nyikeleni Ka Evhangeli
9. Ntirho wo chumayela wu nga endlisiwa ku yini leswaku wu va ntokoto lowu tsakisaka endyangwini?
9 Yesu u te: “Evhangeli yi fanele ku rhanga yi twarisiwa ematikweni hinkwawo.” (Marka 13:10) Marito wolawo ma nyika Mukreste un’wana ni un’wana la nga ni ripfalo xiavelo xo karhi—ku nga ku vula evhangeli, ku avelana mahungu lamanene ya Mfumo wa Xikwembu ni van’wana. Ku endla leswi kun’we tanihi ndyangu ku nga va ntokoto lowu khutazaka ni lowu tsakisaka. Vamanana na vatatana va tinyungubyisa hi vana va vona loko va nyikela mahungu lamanene. Mpatswa wun’wana lowu nga ni vana vanharhu va xinuna lava nga ni malembe ya le xikarhi ka 15 na 21 va vula leswaku minkarhi hinkwayo a va tolovele ku famba ni vana va vona entirhweni wa vona wo chumayela erivaleni hi Ravunharhu wun’wana ni wun’wana loko va vuyile exikolweni ni Mugqivela un’wana ni un’wana ni mixo. Tata wa kona u te: “Nkarhi wun’wana ni wun’wana hi va dyondzisa swo karhi. Naswona hi endla leswaku ku va ntokoto lowu tsakisaka ni lowu khutazaka.”
10. Vatswari va nga va pfunisa ku yini vana va vona ensin’wini?
10 Ku tirha swin’we tanihi ndyangu eku chumayeleni ni le ku dyondziseni swi nga tswala mihandzu swinene. Minkarhi yin’wana vanhu va angula kahle swinene eka rungula ra n’wana leri olovaka kambe ri ri ra xiviri. Kutani Manana na Tatana va va va ri kona ekusuhi leswaku va ta pfuna loko swi laveka. Vatswari va nga tiyiseka leswaku vana va vona va kuma vuleteri bya nkarhi na nkarhi ivi va va vatirheli ‘lava nga riki na tingana, lava tamelaka rito ra ntiyiso hi ndlela leyi faneleke.’ Ku chumayela swin’we hi ndlela leyi swi pfumelela vatswari ku xiyisisa langutelo, vuswikoti ni ku tikhoma lokunene ka n’wana wa vona ensin’wini. Hi ku va ni xiyimiso xa nkarhi na nkarhi, va vona nhluvuko wa n’wana wa vona ni ku n’wi nyika vuleteri ni xikhutazo lexi yaka emahlweni leswaku va tiyisa ripfumelo rakwe. Hi nkarhi lowu fanaka, vana va swi vona leswaku vatswari va vona i swikombiso leswinene ensin’wini. Eminkarhini leyi yo nonon’hwa ni ya hasahasa, ku tirha tanihi ndyangu lowu hlanganeke ni lowu khathalelanaka swi nga endla leswaku mi va lava hlayisekeke swinene endhawini leyi teleke vugevenga.—2 Timotiya 2:15; Vafilipiya 3:16.
11. I yini lexi nga ku tsanisaka hi ku hatlisa ku hisekela ka n’wana ntiyiso?
11 Vana va swi vona hi ku hatlisa loko vatswari va hanya vutomi lebyi cinca-cincaka. Loko vatswari va nga swi kombisi hi xiviri leswaku va wu rhandza ntiyiso ni vutirheli bya yindlu ni yindlu, vana va nge languteriwi leswaku va gingiriteka. Hi xikombiso, mutswari la hanyeke kahle loyi ntirho wa yena wa nsimu ku nga ku dyondza Bibele ntsena vhiki na vhiki ni vana va yena a nga dya mbitsi loko vana vakwe va kula.—Swivuriso 22:6; Vaefesa 6:4.
12. Mindyangu yin’wana yi nga wu kuma njhani nkateko wo hlawuleka lowu humaka eka Yehovha?
12 Mpfuno wa ku va “van’we eku anakanyeni” ku nga va leswaku ndyangu wu khomisana leswaku hambi ko va xirho xin’we ntsena xi tirha tanihi phayona ra nkarhi hinkwawo evandlheni. Mindyangu yo tala emisaveni hinkwayo yi endla sweswo, naswona hinkwayo yi kuma nkateko wa mintokoto ni ku humelela swinene ka xirho xa yona lexi phayonaka.—2 Vakorinto 13:11; Vafilipiya 2:1-4.
Ku Tamela Swiphiqo Swin’we
13, 14. (a) I swiyimo swihi leswi nga khumbaka vun’we bya ndyangu? (b) Swiphiqo swo tala swa ndyangu swi nga siveriwa hi ndlela yihi?
13 Eminkarhini leyi yo nonon’hwa ya “ntshikilelo” ni “khombo,” hinkwerhu ka hina ha karhateka. (2 Timotiya 3:1, Revised Standard Version; Phillips) Ku ni swiphiqo entirhweni wo tihanyisa, exikolweni, ehandle hambi ku ri ekaya hi koxe. Van’wana va karhatiwa hi vuvabyi kumbe ku karhateka loku phikelelaka emoyeni, leswi minkarhi yin’wana swi vangaka ku kwetlembetana ni ku nga twisisani endyangwini. Xana swiyimo swo tano swi nga lulamisiwa njhani? Xana swi nga lulamisiwa hi loko un’wana ni un’wana a khondla mavoko, a pfala nomu? Xana swi nga lulamisiwa hi ku tihambanisa ni van’wana hambi loko mi tshama ekaya rin’we? E-e. Ematshan’wini ya sweswo, hi fanele ku bula hi swiphiqo swa hina, kutani hi kombela ku pfunana. Naswona hi yihi ndhawu yo antswa yo bula hi swiphiqo leswi loko ku nga ri endyangwini lowu nga ni rirhandzu?—1 Vakorinto 16:14; 1 Petro 4:8.
14 Dokodela un’wana ni un’wana wa swi tiva leswaku ku sivela mavabyi swi tlula ku yimela ku ma tshungula. Leswi swi tano eka swiphiqo swa ndyangu. Bulo leri ntshunxekeke ni leri kongomeke hakanyingi ri nga sivela swiphiqo leswaku swi nga kuli. Hambi loko ko va ni swiphiqo leswikulu, swi nga tameriwa ni ku lulamisiwa loko ndyangu wu kambisisa swin’we misinya ya milawu ya Bibele leyi katsekaka. Hakanyingi ku kwetlembetana ku nga hundzuriwa vuxaka lebyinene hi ku tirhisa marito ya Pawulo lama nga eka Vakolosa 3:12-14 leyi nge: “Ambalani moya wa tintswalo, ni vunene, ni ku titsongahata, ni ku rhula, ni ku leha mbilu. Amukelanani, kutani loko un’wana a vilela hi un’wana, a va rivalelane. . . . Ehenhla ka leswi hinkwaswo, ku laveka rirhandzu, ri nga rona leri ri bohaka swilo hinkwaswo swi twanana hi ku hetiseka.”
Ku Tihungasa Swin’we
15, 16. (a) I mfanelo yihi leyi faneleke ku endla leswaku mindyangu ya Vukreste yi nga fani ni yin’wana? (b) Vukhongeri byin’wana byi humesa vanhu va muxaka muni, naswona ha yini?
15 Yehovha i Xikwembu lexi tsakeke, naswona ntiyiso i rungula leri tsakisaka—leri nyikaka vanhu ntshembo. Ku tlula kwalaho, wun’wana wa mihandzu ya moya i ntsako. Ntsako lowu wu hambane ngopfu ni nyanyuko wa nkarhinyana wa xitsutsumi lexi hluleke entlangwini wo phikizana. I ntlhaveko lowu dzimeke timitsu swinene wa ku eneriseka lowu khapaka embilwini hikwalaho ka ku hlakulela vuxaka lebyikulu lebyi u nga na byona na Yehovha. I ntsako lowu sekeriweke eka mimpimanyeto ya moya ni vuxaka lebyi akaka.—Vagalatiya 5:22; 1 Timotiya 1:11.
16 Hikwalaho, tanihi Timbhoni ta Yehovha ta Vukreste, a hi fanelanga ku titsona ntsako kumbe ku tshama hi khwanyanise nghohe. Vukhongeri byin’wana byi ni vanhu vo tano hi mhaka ya leswi vupfumeri bya vona byi kandziyisaka swilo leswi hundzeletiweke. Tidyondzo ta vona ti humesa vugandzeri lebyi nga ni munyama ni lebyi nga tsakisiki, ni lebyi byi nga fambisaniki na Bibele, naswona byi hundzeletiwile. A byi humesi mindyangu leyi kumaka ntsako hikwalaho ko tirhela Xikwembu. Yesu u swi vonile leswaku ku tihungasa ni ku tiphyuphyisa swi fanerile. Hi xikombiso, nkarhi wun’wana u rhambe vadyondzisiwa vakwe leswaku va ya ‘tshama va ri voxe endhawini leyi nga riki na munhu, va wisanyana.’—Marka 6:30-32; Pisalema 126:1-3; Yeremiya 30:18, 19.
17, 18. Mindyangu ya Vukreste yi nga tiphyuphyisa hi tindlela tihi leti faneleke?
17 Hi ku fanana mindyangu yi fanele ku tinyika nkarhi wo tihungasa. Mutswari un’wana u vule leswi landzelaka malunghana ni vana vakwe: “Hi endla swilo swo tala leswi tsakisaka, hi swi endla swin’we—hi ya eribuweni ra lwandle, hi tlanga bolo ephakeni, hi ya hungasa etintshaveni. Nkarhi na nkarhi, hi heta ‘siku hinkwaro ensin’wini tanihi maphayona’; endzhaku hi endla xinkhubyana xa swakudya swo hlawuleka, naswona hi pfa hi nyikana ni tinyiko.”
18 Swiringanyeto swin’wana leswi vatswari va nga swi kambisisaka i ku va ndyangu wu tihumesa wu ya entangeni wa swiharhi, etiphakeni to tihungasa, etimuziyama ni le tindhawini tin’wana leti tsakisaka. Ku teka maendzo yo famba-famba enhoveni, ku hlalela swinyenyana ni ku rima ntanga i mintirho leyi nga tisaka ntsako loko mi yi endla swin’we. Vatswari nakambe va nga khutaza vana va vona ku dyondza ku tlanga xichayana xa vuyimbeleri kumbe ku endla swin’wana leswi va nga tihungasaka ha swona. Entiyisweni, vatswari lava ringaniselaka va ta hlela nkarhi wo tlanga ni vana va vona. Loko mindyangu yi tlanga swin’we, yi tala ku va swin’we!
19. Hi wihi mboyamelo wa manguva lawa lowu nga hahlulaka ndyangu?
19 Masiku lawa swi tolovelekile leswaku vana va lava ku tihambanisa ni mindyangu ya ka vona, va endla leswi va swi rhandzaka loko swi ta emhakeni ya ku tihungasa. Hambi leswi ku nga riki na khombo loko muntshwa a tihungasa hi nkarhi wa yena, a hi vutlharhi ku n’wi pfumelela ku tshamela ku tihambanisa ni ndyangu a ya endla leswi yena a swi rhandzaka. Ku ri na sweswo, hi fanele ku tirhisa nsinya wa nawu lowu Pawulo a wu vuleke loko a ku: “Un’wana ni un’wana wa n’wina a nga tshuki a tikarhatela leswi swi nga swa yena ntsena, kambe a a tikarhatele ni leswi swi nga swa van’wana.”—Vafilipiya 2:4.
20. Minkarhi ya tinhlengeletano ni ya mintsombano yi nga va leyi tsakisaka hi ndlela yihi?
20 Hinkwerhu swa hi tsakisa swonghasi loko hi vona mindyangu yi tshame swin’we emintsombanweni ni le tinhlengeletanweni! Hi ndlela yoleyo vana lava kuleke hi ntolovelo va nga pfuna lavatsongo. Lunghiselelo ro tano nakambe ri sivela mboyamelo wo va vana van’wana va kondlo-a-ndzi-dyi va tshama hi mintlawa le ndzhaku, kutani va nga wu yingiseli kahle nongonoko wa ntsombano. Hambi ku ri riendzo ro ya ni ku vuya etinhlengeletanweni ri nga va leri tsakisaka loko ndyangu wu hlela swin’we leswaku ku ta fambiwa hi gondzo rihi, i tindhawu tihi leti nga ta valangiwa endleleni, ni leswaku ku ta tshamiwa kwihi. Anakanya leswaku a ku ri nkarhi lowu nyanyulaka njhani loko mindyangu yi famba swin’we yi ya eYerusalema hi nkarhi wa Yesu!—Luka 2:41, 42.
Mikateko Ya Ku Va Swin’we
21. (a) Hi nga tikarhatela njhani ku humelela evukatini? (b) Hi swihi swiringanyeto swa mune leswinene swa vukati lebyi khomelelaka?
21 A swi olovi ku vumba mindyangu leyi humelelaka ni leyi hlanganeke, naswona a yi vumbiwi hi xiwelo. Van’wana va swi kuma swi antswa ku tikhondlela mavoko, va dlaya vukati, ivi va ringeta ku tlhela va sungula nakambe. Kambe hakanyingi ku tlhela ku humelela swiphiqo leswi fanaka eka vukati bya vumbirhi kumbe bya vunharhu. Nhlamulo leyi antswaka swinene hi leyi ya Vukreste: Tikarhateleni ku va lava humelelaka hi ku tirhisa misinya ya milawu ya Bibele ya ku rhandzana ni ku xiximana. Mindyangu leyi hlanganeke yi titshege hi moya wa ku nyikana, wa ku pfumala vutianakanyi. Mutsundzuxi un’wana hi ta vukati u nyikele nhlamuselo yo olova yo endla leswaku vukati byi khomelela. U tsarile a ku: “Swilo swa mune swa nkoka leswi kumekaka eka vukati lebyinene i ku tiyimisela ku yingisela, ku kota ku tisola, ku kota ku nyikela nseketelo wa nkarhi na nkarhi hi tlhelo ra mintlhaveko ni ku navela ku khomana hi rirhandzu.” Swilo sweswo hakunene swi nga pfuna ku endla leswaku vukati byi khomelela hikuva swi sekeriwe ni le misinyeni leyinene ya milawu ya Bibele.—1 Vakorinto 13:1-8; Vaefesa 5:33; Yakobo 1:19.
22. Hi yihi mimpfuno yin’wana leyi kumiwaka hi ku va ni ndyangu lowu hlanganeke?
22 Loko hi landzela xitsundzuxo xa Bibele, hi ta va ni xisekelo lexi tiyeke xa ndyangu lowu hlanganeke, naswona mindyangu leyi hlanganeke i xisekelo xa vandlha leri hlanganeke ni leri tiyeke hi tlhelo ra moya. Xisweswo, hi ta kuma mikateko leyo tala leyi humaka eka Yehovha loko hi n’wi dzunisa swin’we hi laha ku engetelekeke.
[Nhlamuselo ya le hansi]
a “Ndyangu i rito leri humaka eka rito ra Xilatini leri nge familia, leri eku sunguleni a ri vula malandza ya yindlu leyikulu, ivi endzhaku ri vula yindlu hi yoxe leyi nga ni tatana, manana, vana—ni vatirhi.”—Origins—A Short Etymological Dictionary of Modern English, hi Eric Partridge.
Wa Tsundzuka Xana?
◻ Ha yini swi vuyerisa loko mindyangu yi endla swilo swin’we?
◻ Ha yini dyondzo ya nkarhi na nkarhi ya Bibele ya ndyangu yi ri ya nkoka?
◻ Ha yini swi ri swinene leswaku vatswari va tirha ntirho wa nsimu kun’we ni vana va vona?
◻ Ha yini swi pfuna ku bula swin’we hi swiphiqo swa ndyangu?
◻ Ha yini mindyangu ya Vukreste yi nga fanelanga ku titsona ntsako?
[Xifaniso lexi nga eka tluka 17]
Xana ndyangu wa wena wa hlangana, hambi ko va kan’we hi siku leswaku wu dya swakudya kun’we?
[Xifaniso lexi nga eka tluka 18]
Ku tihumesa ka ndyangu ku fanele ku va loku phyuphyisaka ni loku tsakisaka