U Nga Languti Swilo Leswi U Swi Vonaka Hi Mahlo Ntsena!
KU VA ni mahlo lama vonaka kahle i nkateko. Entiyisweni, vanhu vo tala va nga vula leswaku i swilo swi nga ri swingani ntsena leswi va nga na swona leswi nga swa risima ku tlula ku vona. Hambi swi ri tano, eka Vakreste, ku ni muxaka wun’wana wa ku vona lowu muapostola Pawulo a vulavuleke ha wona lowu nga wa nkoka swinene ku tlula ku vona lokunene ka nyama. Pawulo u tsarile: “Hi kongomisa mahlo ku nga ri eka leswi voniwaka, kambe eka leswi nga voniwiki.” (2 Vakorinto 4:18) Hakunene ku fanele ku ri ndlela yo vona ya nkoka swinene leyi endlaka leswaku munhu a vona swilo leswi nga voniwiki! Hi nga ha yi vula ndlela yo vona leyi hetisekeke ya muxaka wa moya.
Ha Yini Ku Ri Na Xilaveko?
Vakreste va lembe-xidzana ro sungula a va ri ni xilaveko xa xiviri xa ku va ni muxaka lowu wa ku vona ka moya. A va endla vutirheli bya vona bya Vukreste ehansi ka ku nonon’hweriwa lokukulu. Pawulo u swi veka hi ndlela leyi: “Hi kamanyetiwa hi matlhelo hinkwawo, kambe a hi manyiwanga; hi le ku kanakaneni, kambe a hi heli mbilu; ha hlotiwa, kambe a hi tshikiwanga ekhombyeni; ha tlumbiwa, kambe a hi herisiwi.”—2 Vakorinto 4:8, 9.
Ku nga khathariseki swiyimo swo tano, vadyondzisiwa lavo tshembeka va yime va tiyile. Hikwalaho ka ripfumelo leri tiyeke eka Xikwembu, va vule hi laha Pawulo a vuleke ha kona: “A hi heli mbilu; hambileswi hi hlakalaka hi tlhelo ra munhu wa hina wa le handle, hi tlhelo ra munhu wa hina wa le ndzeni, hi hundzuka lavantshwa siku rin’wana ni rin’wana.” Kambe, i yini lexi a xi endla va hundzuka siku rin’wana ni rin’wana? Pawulo u ye emahlweni a ku: “Hikuva maxangu lawa ya nga riki na ku tika ngopfu, lawa ya nga ya nkarhinyana ntsena, ma hi tisela ku kwetsima loku nga ni ntikelo swinene, loku nga heriki, loku tlulaka ngopfu mpimo hinkwawo. Kutani hi kongomisa mahlo ku nga ri eka leswi voniwaka, kambe eka leswi nga voniwiki; hikuva leswi voniwaka i swa nkarhinyana ntsena, kasi leswi nga voniwiki i swa minkarhi hinkwayo.”—2 Vakorinto 4:16-18.
Pawulo a a khutaza vamakwavo va moya leswaku va nga pfumeleli swiphiqo, ku nonon’hweriwa, nxaniso—mahlomulo ya muxaka wihi na wihi—swi va sivela ku vona hakelo leyi vangamaka leyi vekiweke emahlweni ka vona. Va fanele va nga languti ntsena swiyimo swa nkarhi wolowo, kambe va tshama va langute vuyelo lebyi tsakisaka bya mahanyelo ya Vukreste. Leswi hi swona swi va pfuneke ku pfuxeta ku tiyimisela ka vona ka siku na siku ko tiyisela enyimpini leyi. Namuntlha Vakreste na vona hi ndlela leyi fanaka va fanele va vona hi ndlela yoleyo leyinene hi tlhelo ra moya.
Languta Mahlomulo Ya Namuntlha Tanihi Ya Xinkarhana!
Hambi ha swi lava kumbe a hi swi lavi, siku na siku hi vona swilo leswi hi nga tsakeriki ku swi vona. Loko hi languta exivonini xikan’we-kan’we hi vona swivati ni mavala lama nga emirini wa hina, leswi kombisaka ku nga hetiseki ka nyama. Loko hi languta exivonini xa Rito ra Xikwembu, hi vona swivati swa moya, eka hina ni le ka van’wana. (Yakobo 1:22-25) Naswona loko hi languta maphepha-hungu ya siku na siku kumbe thelevhixini, timhaka ta ku pfumaleka ka vululami, nsele ni timhangu swi hi tlhava timbilu.
Sathana u lava ku hi endla leswaku hi heleriwa hi ntshembo hi ku tirhisa swilo leswi hi swi vonaka kumbe hi hambuka ivi hi sungula ku tsekatseka eripfumelweni. Xana leswi hi nga swi sivela njhani leswaku swi nga humeleli? Hi fanele ku landzela xikombiso lexi vekiweke hi Yesu Kreste, hi laha swi bumabumeriweke ha kona hi muapostola Petro loko a te: “Mi vitaneriwe swona, hikuva Kriste na yena ú twile ku vaviseka hikwalaho ka n’wina, a mi boxela ntila leswaku mi ta n’wi landzelela.” (1 Petro 2:21) Etimhakeni hinkwato ta vutomi bya Vukreste, Yesu a a ri xikombiso lexi hetisekeke.
Loko a kombisa Yesu tanihi xikombiso xerhu, Petro u boxe yinhla ya leswaku Yesu u xanisekile. Entiyisweni, Yesu u xaniseke ngopfu loko a ri laha misaveni. Tanihi “mutirheli lonkulu” (NW) wa Yehovha loyi a a ri kona eku vumbiweni ka vanhu, u swi tiva kahle leswi Xikwembu a xi swi kunguhatile hi vanhu. (Swivuriso 8:30, 31) Kambe sweswi u swi vone hi yexe leswi xidyoho ni ku nga hetiseki swi endleke leswaku va va swona. Siku na siku a boheka ku langutana ni ku nga hetiseki ni ku tsana ka vanhu. Sweswo swi fanele swi ve ndzingo eka yena.—Matewu 9:36; Marka 6:34.
Handle ko vona mahlomulo ya van’wana, Yesu u vone ni ya yena nwini. (Vaheveru 5:7, 8) Kambe hikwalaho ka leswi a a ri ni langutelo leri hetisekeke ra moya, u ma honisile leswaku a kota ku vona hakelo ya ku tlakuseriwa evuton’wini lebyi nga riki na ku fa hikwalaho ka vutshembeki byakwe. Kutani tanihi Hosi ya Vumesiya, u ta va ni lunghelo ro tlakusa vanhu lava xanisekaka exiyin’weni xa le hansi va tlhelela eku hetisekeni loku Yehovha a a ku kunguhatile eku sunguleni. Ku tshama a langute swilo swa nkarhi lowu taka leswi nga vonakiki swi n’wi pfune ku tshama a tsakile entirhweni wa Xikwembu ku nga khathariseki mahlomulo lawa a ma voneke siku na siku. Endzhaku Pawulo u tsarile: “Loyi a nga chavangiki ku byarha [mhandzi ya yena ya nxaniso, NW] a nga vuli nchumu hi tingana ta kona, hikwalaho ka ku tsaka loku vekiweke emahlweni ka yena; kutani sweswi ú tshamile evokweni ra xinene exiluvelweni xa Xikwembu.”—Vaheveru 12:2.
Yesu a nga pfumelelanga maxangu ni swiyimo leswi ringaka swi n’wi vangela gome, a hambuka endleleni kumbe ku tsekatseka eripfumelweni rakwe. Tanihi vadyondzisiwa va yena, hi fanele ku xi landzela kahle xikombiso xa yena lexi xiyekaka swinene.—Matewu 16:24.
Tshama U Langute Swilo Leswi Nga Heriki Leswi Nga Vonakiki!
Loko a vulavula hi swilo leswi pfuneke Yesu leswaku a tiyisela, Pawulo u tlhele a kombisa ndlela ya hina loko a tsale a ku: ‘A hi tsutsumeni hi ri ni ku tiyisela eku tsutsumeni ka mpfhuka lowu hi vekeriweke wona, naswona hi languta eka Yesu, musunguri ni muhetisisi wa ku pfumela ka hina.’ (Vaheveru 12:1, 2) Ina, leswaku hi tsutsuma mpfhuka wa Vukreste hi laha ku humelelaka naswona hi tsakile, hi fanele ku languta swilo leswi hi nga swi voniki enkarhini lowu. Kambe xana hi nga ‘languta swinene’ eka Yesu hi ndlela yihi, naswona xana swi ta hi pfuna yini?
Hi xikombiso, hi 1914, Yesu u vekiwe Hosi ya Mfumo wa Xikwembu, naswona u fuma a ri etilweni. Kavula, leswi a hi swi voni hi mahlo ya hina ya nyama. Kambe, loko hi ‘languta swinene’ eka Yesu, mahlo ya hina ya moya ma ta hi pfuna ku vona leswaku sweswi u lunghekele ku teka goza ro herisa fambiselo leri nga kona ro biha ni ku nghenisa Sathana ni ntshungu wakwe wa mademona ekheleni laha ku nga riki na ntirho. Loko hi langutisisa swinene, mahlo ya hina ya moya ya ta hi komba misava leyintshwa leyi hlamarisaka laha ‘rifu ri nga ta ka ri nga ha vi kona, hambi ku ri mahlomulo kumbe ku rila kumbe ku vaviseka. Hikuva leswo sungula swi hundzile.’—Nhlavutelo 19:11-16; 20:1-3; 21:4.
Hikwalaho, ematshan’wini yo tshikileriwa hi maxangu ya nkarhinyana lawa hi nga ha vaka hi langutana na wona siku na siku, ha yini hi nga languti swilo leswi nga heriki? Hi mahlo ya ripfumelo, ha yini hi nga honisi vuvabyi ni makwanga ya misava leyi leyi thyakisiweke leswaku hi ta vona paradeyisi leyi teleke hi vanhu lava hanyeke kahle, lava tsakeke ni lava khathalelanaka? Ha yini hi nga honisi swivati swa hina, emirini ni le moyeni, kutani hi tivona hi ntshunxiwile eka swona hi laha ku nga heriki hi nkoka wa gandzelo ra nkutsulo ra Kreste? Ha yini hi nga honisi ku halatiwa lokukulu ka ngati loku vangiweke hi nyimpi, vugevenga ni madzolonga kutani hi vona vanhu lava ha ku pfuxiwaka va ri karhi va leteriwa hi ku rhula ni vululami bya Yehovha?
Ku engetela kwalaho, ku ‘languta swinene’ eka Yesu swi ta katsa ni leswaku hi mahlo ya hina ya moya hi languta leswi Mfumo, hambi leswi wu nga vonakiki, ana se wu swi hetisiseke exikarhi ka vanhu va Xikwembu emisaveni: vun’we, ku rhula, rirhandzu, rirhandzu ra vumakwerhu ni rifuwo ra moya. Wansati un’wana wa Mukreste eJarimani, endzhaku ko hlalela vhidiyo leyi nge United by Divine Teaching, u tsarile: “Vhidiyo leyi yi ta ndzi pfuna ku tshama ndzi ri karhi ndzi tsundzuka leswaku vunyingi bya vamakwerhu va xinuna ni va xisati va Vakreste emisaveni hinkwayo hi nomo lowu va le ku tirheleni ka Yehovha hi ku tshembeka—naswona va endla leswi ku nga khathariseki nkaneto. Vona ndlela leyi vun’we bya vumakwerhu byi nga bya risima ha yona emisaveni leyi ya madzolonga ni rivengo!”
Xana na wena wa n’wi “vona” Yehovha, Yesu tintsumi leto tshembeka ni timiliyoni ta Vakreste-kuloni va yime na wena? Loko swi ri tano, a wu nge karhateki ngopfu hi “ku vilela hi swa misava” leswi nga ku hetaka matimba ni ku endla leswaku u “tsandzeka ku veka mihandzu” entirhweni wa Vukreste. (Matewu 13:22) Hikwalaho ‘languta swinene’ eka Yesu hi ku languta hi mahlo ya wena ya moya eMfun’weni wa Xikwembu lowu tlhomiweke ni le ka mikateko ya wona, ya sweswi ni ya nkarhi lowu taka.
Hanyela Ku Vona Leswi Nga Vonakiki!
Ku vona ku hambana lokukulu exikarhi ka misava leyintshwa ya Xikwembu ya hi laha ku nga heriki ni misava ya khale ya namuntlha leyi hlakalaka, hi fanele hi tikarhatela ku hanya hi ndlela leyi nga ta endla leswaku hi va lava fanelekaka ku vona hi xiviri swilo leswi namuntlha hi swi vonaka hi mahlo ya ripfumelo ntsena. Vunyingi bya vanhu lava nga ta pfuxiwa va ta hlamala ngopfu loko va pfuxeriwa emisaveni yo lulama ya paradeyisi leyi hambaneke swinene ni misava leyi va yi voneke va nga si fa. Anakanya ndlela leyi hi nga ta tsaka ha yona ku va ha ha hanya leswaku hi va hlanganisa ni ku va hlamusela leswi Xikwembu xi swi endleke!—Ringanisa Yuwele 2:21-27.
Kunene, mahlo ya moya lama vonaka kahle i ya risima naswona vona ndlela leyi swi nga swa nkoka ha yona ku ma hlayisa ya tengile! Leswi hi nga swi endla hi dyondzo ya Bibele ya munhu hi xiyexe ya nkarhi na nkarhi, ku va kona eminhlanganweni ya Vukreste, ku byela van’wana hi ntshembo wa hina lowu sekeriweke eBibeleni naswona nchumu wa nkoka swinene, ku khongelela nkongomiso wa Xikwembu. Leswi swi ta hi pfuna ku hlayisa mahlo ya hina ya moya ma ri manene naswona ma tengile, leswi nga ta endla leswaku hi kota ku languta swilo leswi nga voniwiki hi mahlo ntsena!